هتسيبيني؟ طب اجلديني

[أنت___عمري]

المشاركة الأصلية كتبت بواسطة ~ْ*~ْ*أحمد نجم*ْ~*ْ~

اقلعي جلدك .. اجلديني

متخافيش لو قلبي يصرخ
مترحميش لو تبكي عيني
اجلدي ايوه هنا جامد هنا
كلنا اتلفتنا يا ترى الضربة لفين هتتوجه أكيد للقلب
قطعي كل الهنا فرحة سنيني
لو صعبت عليكي هِمّي
غمي عينك واجلديني
*****
اجلديني يا قلب طيب
ع الكبر عرف القساوة
وامسكي كرباج يشيب
أعمى يجهل خوف هداوة
ضهري انكشفلك صبي يلا
مش هقولك كلمة والله
مش هقولك خافي الله
لوني فيا العذاب
ارسمي بومة وغراب
وارفعي كلمة خراب
واجلديني
*****
هتسيبيني؟
ياه على بساطة السؤال وفيه كل الاستحالة وفيه كل الصعوبة وفيه كل الحزن والألم وعدم التصديق
خلاص .. بقولك .. هتسيبيني؟
هتغيبي وغروبك بدا
مليون ضحية ف المدى
الشاعر أحب أن يصف لنا حمرة السماء وقت الغروب فرآها مليون ذبيح ياااااه تحفة والله
والدم فار والانتحار .. تو .. ابتدا
هتسيبيني؟
هتنسي حتى ضمتي؟
هتنسي صوتي لمستي؟
هتنسي كلمة يا حبيبتي؟
كانت حياتك دنيتي
شوفوا حسن الالتفات من المخاطب للمتكلم (حياتك) (دنيتي) فنان
هتسبيني؟
طب اجلديني
خلى آخر حاجة بنا علامة فيا
منسهاش مهما هعيش
الطير ما ينسى عش ضمه
بين حطانه طلعله ريش
الشاعر عاوز يقنعنا بالفكرة فساق مثالاً لا يحتمل الجدل ودا تشبيه ضمني زي ما درسنا في البلاغة فعلاً (الطير ما ينسى عش ضمه بين حيطانه طلعله ريش) الطير ما ينكرش وطنه انما ابن آدم يعملها
اجلديني عشان تعيشي
حتى لو هبقى .. مفيش
الشاعر لا يجد صعوبة في اختيار القافية التي تجسد المعنى تأملوا معي كلمة (مفيش) اد ايه فيها العدم واد ايه البساطة فيها
اجلديني
هتسيبيني؟
قبل ما تمشي اسرقي من عيني نومها
لملمي كل الحاجات واطمسي عني مكانها
حتى ألواني امسحيها
سيبي الاسود في هدومي
حداد
في منامي
كوابيس
حتى في لون الحيطان
كآبة واكتئاب
سيبي الاسود
حتى في نور النجف
عتمة وظلام
سيبي الاسود
حتى في النورس كمان
الله يا بورسعيدي على التأثر ببيئتك ويا روعة التصوير والخيال تخيلوا النوارس هتتلون بالأسود حتى كل شيء في بيئة الشاعر هيتلون
سيبي الاسود
حتى في عيوني وبياضها
أخي الشاعر أعتقد أنك هنا لو قولتلها سيبي الأبيض هيكون أحلى لأن العين لو ابيضت هيكون عمى مش فاهم قصد حضرتك ايه يعني حضرتك مش بعدل والله لو قلت
إلا في عيوني وسوادها سيبي الأبيض
أيه رأي حضرتك وفيها اقتباس من القرآن الكريم :"وابيضت عيناه من الحزن فهو كظيم"

سيبي الاسود
حتى في سمايا وقمرها
كل رموز الحب هتسود
سيبي الاسود
حتى في الشمس ونهارها
والنهار كمان؟
سيبي الاسود
حتى في القلب اللي حبك
والقلب نفسه هيسود خلاص هيميل لمين بعد كده؟
سيبي الاسود
حتى في زماني ووقتي ودنيتي كل اللي ليا
سيبي الاسود
واجلديني
سيبي جلدك اعمله بعدك غطا
اعمله بعدك فنار يهديني دايماً في الخطا
انسجه في برد الشتا بالطو وشال
ارسمه في الصيف مصايف فيها شطك والخيال
ولما اموت يبقى الكفن
فيه اندفن
يحميني م الدود م العفن
يبقى جنة يوم قيامتي
يبقى هامتي اللي ما تعرف تنكسر
يبقى حبي اللي لا يمكن يندثر
سيبي جلدك
هعمله صفحة وقلم
واكتب قصايد بحري فيها منتظم
على نبض قلبي والألم
هوصف حياتي بعد الحياة
هوصف عدم
هوصف حبيبة سابت أثر
مينتهيش فاق الهرم
سيبي جلدك
واجلديني
هتسيبيني؟
هنام لوحدي؟
هيكون سريري ولا لحدي؟
اتخنقت
خلاص مفيش
عندي كلام
هيقولوا شعري مش تمام
لاني مش لاقي النهاية
والنهاية
هتسيبيني
دي النهاية
اجدليني
دي النهاية

*********

أخي الشاعر هدخل تاني صدقني وأكمل تعليقي على رائعتك .. تقبل مروري وكلامي أخي الحبيب