أخر طرق النصب أدخل وإستلم جايزتك

[عز وحيد]

السلام عليكم ورحمة الله وبركاته
أصدقائى أعضاء الثانوية
حبيت إنى أحكيلكم عن أخر طرق النصب إلى شوفتها وإتعرضت ليها
الطريقة الأولى
وأنا نازل القاهرة لقضاء مصلحة معينة
روحت عشان أفطر
وفى طريقى وأنا بدور عن مطعم أكل فيه
لاقيت شاب جنتل واقف
وبيقولى حضرتك أتفضل ممكن تكسب معانا فى عرضنا
فأنا ما صدقتش قولتله مش فاضى أفطر الأول وأجيلك
قلى بس تعالى بس أتفضل الورقة ديه
وخربش إلى عليها لو لقيت الكلمة مشابهة
لكلمة من أربع كلمات تحت تكسب
فقولت أنا كده كده حظى مش كويس فى الحاجات ديه أخربش وأريحه
المفاجأة إنى الكلمة مشابهة
يعنى كسبت
قلى مبروك يا فندم حضرتك كسبت معايا وإتفضل إستلم جايزتك
أنا قولت فى عقل بالى ده إيه الوقعة ديه هو أنا مش هخلص منك أنا عاوز أفطر
فقولتله طيب هروح أفطر وأجى أستلمها
فأصر إنى لازم أدخل معاه وأستلم الجايزة بعد ما قالى ده دقيقة واحدة
فقولت طيب أخلص وأخلص نفسى وأدخل فيه حاجة أخدها وأمشى
ما فيش بردوه أخلص منه وأروح أفطر
فالمهم دخلت جوه
فلاقيت واحدة مستنية جوه قاعدة على مكتب وقالتلى إتفضل يا فندم
وقعدت بقى حكتلى
مبروك يا فندم أنت كسبت معانا جايزتين
جايزة عينية (موبايل أو كاميرا فيديو أو شوية حاجات كده قالتهم ) بصراحة مش فاكر منهم إلا دول
وكمان جايزة تانية عبارة عن أسبوع مصيف ل 6 أفراد
أنا قلت فى عقل بالى إن البلية لعبت معايا وعديت وحظى تمام المرة ديه
بس رجعت وسألت نفسى طيب وأنا عملت إيه عشان أفوز بالجايزة ديه
وزى ما تكون سمعتنى فقالت يا فندم أنت حضرتك هتعملنا دعاية عن طريق الجايزة إلى هتاخدها
وكمان هتجيب معاك يوم إستلام الجايزة اسرة مكونة من فردين زوج وزوجة
وكمان هتدفعلنا عشرين جنيه كتأمين عشان تيجى تستلم الجايزة
وقفت بقى كده
وكل شىء بان أودامى
قولت لنفسى بقى ده كله عشان العشرين جنيه ياااااااااااااااه
تعبتونى وجوعت أكتر من ما أنا جعان
ولا فيه جايزة ولا حاجة
حتى لو دفعت العشرين جنيه هروح فرع الشركة بعد كام يوم عشان أستلمها
فطبعا إستخدمت ذكائى فى الموضوع ده
وقولت
لأ أنا هروح أفطر الأول وأجى لحضرتك
وروجت خالع والحمد لله
ياترى ده فعلا كان نصب
ولا أنا إلى متهيئلى
الطريقة التانية بقى إن شاء هقولكم عليها وقت تانى
لأن أنا وقعت فيها بقى فعلا
والسلام عليكم ورحمة الله وبركاته