اشمعنا أنا يارب اللي مش بعرف أطير ؟؟

[Specialist hossam]

السلام عليكم و رحمة الله و بركاته


الست أم حنفي ابنها ( داس عليه فيل ) و مات ,
قعدت في الجنازة تعيط و تقطع في شعر اختها -اللي كانت بتتباهى بيه- و تقول :
اشمعنى ابني أنا يارب , ده كان أحسن ولادي و ......



أما عم فكري جت له ( أزمة في كعب الجزمة ) و بقى مش عارف يتحرك و لا يمشي ,
و بقى كل شوية بيقول :
يا رب انت خلقت الناس كلهم أصحاء
اشمعنى أنا اللي خليتني مش عارف أمشي و لا أتحرك ؟؟



أما سمير أفندي الراجل ( المُسأَّف ) و المفكر الكبير ,
فكان كلما مشي في الشارع و رأى أعمى أو أخرس أو معوق أو مبتلى ,
قال فيه نفسه , هو فين العدل في كده ؟؟
اشمعنى دول اللي ربنا يخلقهم معوقين غير باقي الناس الأصحاء

و ..... الأمثلة كثيرة

طبعا فيه ناس هترفض - بالفطرة - التصرفات بتاعة أم حنفي و عم فكري و سمير أفندي
و فيه ناس هتفكر فيها من تحت لتحت كده و تقول لعقلها : هششش حرام اللي انت بتفكر فيه ده
و ناس هتقول علناً : هو فين العدل و الحكمة في كده ؟؟


مع إن المسألة سهلة إن شاء الله
و هديلك مثال توضيحي , افتح معايا كتاب الوزارة صــ53ـــ :

افرض إن ربنا خلق الناس كلهم سواسية ,
كلهم بيض و حلوين و أمامير و طول بعرض بصحة بفلوس بكل حاجة زي بعض ,
و عاشوا في تبات و نبات و سكنوا في منتجعات و فيلات

و بعدها ربنا أنعم على واحد منهم و اعطاه جناحين يطير بهما ,
يقدر الباقيين يقولوا : إشمعنا هو بيعرف يطير و احنا لأ ؟؟
هيكون الرد عليهم إن ده ( زيادة و فضل ) من ربنا على الراجل ده ,
طالما ( ما حدش أخد منكم ) حاجة يبقى ما تتظلموش ,

طيب لو ربنا ( أنعم و تفضل ) على الناس جميعا و أعطاهم كلهم أجنحة إلا واحد فقط ,
هل يحق للواحد ده إنه يقول : إشمعنا أنا يا رب اللي مش بعرف أطير ؟؟
لأ برضو ,
لأن ربنا ما ظلموش و ( ما أخدش منه حاجة ) , إنما ( أعطى غيره ) تفضلاً


نفس المبدأ ده بينطبق على أصحاب القصص الأخرى اللي ذكرناها في الأول ,

قال تعالى :
{ وَاللهُ أَخْرَجَكُم مِّن بُطُونِ أُمَّهَاتِكُمْ لاَ تَعْلَمُونَ شَيْئًا وَجَعَلَ لَكُمُ الْسَّمْعَ وَالأَبْصَارَ وَالأَفْئِدَةَ لَعَلَّكُمْ تَشْكُرُونَ } [النحل -78]

" { أَخْرَجَكُمْ مِنْ بُطُونِ أُمَّهَاتِكُمْ لا تَعْلَمُونَ شَيْئًا } ولا تقدرون على شيء " [تفسير السعدي]

" { لا تَعْلَمُونَ شَيْئًا } تَمَّ الكلام , ثم ابتدأ فقال جل وعلا { وَجَعَلَ لَكُمُ السَّمْعَ وَالأبْصَارَ وَالأفْئِدَةَ } " [تفسير البغوي]

يعني أصلا الطبيعي بتاع الناس كلها إننا خرجنا للدنيا لا نعلم شيئا و لا نقدر على فعل شيء
و كل الحاجات اللي احنا فيها من سمع و بصر و أفئدة و أعضاء و .....
كل الحاجات دي نعم من الله و فضل و ( زيادة ) ,

زي الجناحات كده في المثال اللي ضربناه ,
لو ربنا ما أعطاش واحد الجناحات دي
أو أعطاها لواحد و بعدين أخدها منه ,
الشخص ده مالوش أن يعترض , لأنه واخد الجناحات دي زيادة أصلا,

فلما ربنا يبتلي واحد و ( ياخذ منه ) حاجة ,
هو في الحقيقة ( لم يأخذها منه ) لكنه جل و علا ( لم يعطيها إياه ) أصلاً ,
لأن الإنسان لا يملكها من البداية ,
و الله غير ظالمٍ له إذا لم يعطها له من البداية ,
أو أعطاها له ثم أخذها منه ,
لأنها تفضلاً و زيادة ,
فلا يحق لهذا الذي لم يُعطهِ الله الزيادة أن يعترض ,

كما في الحديث :

(( إنما أجلكم في أجل من خلا من الأمم ، كما بين صلاة العصر ومغرب الشمس ،
ومثلكم ومثل اليهود والنصارى ، كمثل رجل استعمل عمالا ،
فقال : من يعمل لي إلى نصف النهار على قيراط ،
فعملت اليهود ،
فقال : من يعمل لي من نصف النهار إلى العصر ،
فعملت النصارى ،
ثم أنتم تعملون من العصر إلى المغرب بقيراطين قيراطين ،
قالوا : نحن أكثر عملا وأقل عطاء ،
قال : هل ظلمتكم من حقكم ؟
قالوا : لا ،
قال : فذاك فضلي أوتيه من شئت))
[ الراوي: عبدالله بن عمر - المحدث: البخاري -
المصدر: صحيح البخاري - الصفحة أو الرقم: 5021
خلاصة حكم المحدث: صحيح ]




و لأن الله عز وجل كريم و رؤوف و رحيم بعباده ,
فإنه يساوي بينهم حتى في فضله و زيادته عليهم من النعم ,
و هو لا يمنع فضله و نعمه عن أحدٍ دون غيره ( إلا لحكمةٍ ) علمناها أو جهلناها ,


و للمزيد عن الرضا بالقضاء بالشرع و بالعقل يُرجى قراءة الموضوع التالي

ليك اعتراض على قضاء ربنا ؟؟


و جزاكم الله خيرا
و كل عام أنتم بخير ,

لا تنسوا صيام ايام العشر الاول من ذى الحجة
حتى لو الايام اللى فاتت دى مصمتش
اتمنى كل رد يقول انه صايم
ـ

[eman only]

موضوع رائع

وربنا خلق كل شىء وبمواصفاته

وربنا اعطى لكل انسان وطير وحيوان نعمه

زى الطيور نعمة الطير

يسلمووو

[وردة خجوله]

موضوع جميل وفعلا بقيت اسمع كتير ليه انا ياارب مع ان مش من حق اى انسان الاعتراض على قضاء ربنا وقدرة
وربنا ماظلمش حد واعطى كل انسان مايميزة والحمد لله على نعمه التى لا تعد ولا تحصى

[Specialist hossam]

جزاكم الله خيرا

[كرستال اردنية]

جزاك الله خيرا

[Specialist hossam]

المشاركة الأصلية كتبت بواسطة كرستال اردنية

جزاك الله خيرا

وجزاكم مثله

[ابو اسامة]

ان الله لا يظلم الناس شيئا ولكن الناس انفسهم يظلمون " صدق الله العظيم "

[Dr. Hoda Ahmed]

جزاكم الله كل خير

طريقة عرض رائعة لتوصيل فكرة المعظم بيقع فيها احيانا بسهولة اوى حتى لو مش عمدا

اللهم اهدنا جميعا

[d00ry]

جزاك الله خيرا و جعله الله فى ميزان حسناتك

[روووووز]

موضوع جميل جداا وطرح الموضوع بطريقة روووعة ولذيذة

وفعلا فى ناس كتير بتقول كده بس ده قضاء وقدر كل واحد ليه نصيب هيخده قبل مايموت لان ده متقسم عند ربنا

والحمد لله انا صمت الايام كلها

[Specialist hossam]

جزيتم الجنة جميعا
اسعدنى مروركم الطيب

[أبو إسراء A]

جزاك الله خيرا

[Specialist hossam]

المشاركة الأصلية كتبت بواسطة أبو إسراء a

جزاك الله خيرا

وجزاك مثله أخى الحبيب
وجزى الله خيرا صاحب الموضوع الأصلى فأنا مجرد ناقل فقط؛اسعدنى مرورك الطيب

[ibrahim elsayed]

ممتاز اخى الكريم
اسلوب العرض والانتقال من نقطه لاخرى ممتاز وسلس
بالتوفيق دائما

[Specialist hossam]

اسعدنى مرورك اخى الفاضل ...(( وخاصة توقيعك ))
اللهم لا تجعلنا ممن يأمرون الناس بالبر وينسون انفسهم