كيفية تلخيص المواد الشرعية | المختصر المفيد :)

[Ahmed TiToOo2011]

نصيحتي الشخصية لمذاكرة أي مادة شرعية!



للكائن البرنس / أحمد سمير " أصل التواضع عنواني "





بسم الله الرحمن الرحيم ، وبه نستعين .. والصلاة والسلام علي أشرف المرسلين J
ندخل في الموضوع علي طول بقي :D

- . ناس كتير سألوني .. " إزاي نذاكر فقه ؟ إزاي نذاكر تفسير ؟ إزاي نذاكر حديث ؟ "


الإجابة ببساطة شديدة :
حاول تذاكر المواد النظري دي بطريقة رأسية .. يعني إيه برضه مش فاهم ! O.o
أقولك ... قوم دلوقتي هات كتاب المعهد أو أي مذكرة خارجية بتذاكر منها وافتح درس " الطلاق " ... وهات كشكول جديد بس استنضف شوية .. بلاش الكشكول أبو جنيه ونص ده .. أصل انا عارف شغل الأزهرية ده يعني هاهاها المهم ....
هات الكشكول .. وافتح اول صفحتين في الكشكول وسطره واكتب فوق كدة :
" رابعة رمز الصمود " بس بالخط العريض بقي شايف ناس مش عاجبها الكلام ؟! لو مش عاجبك الكلام أحب اقولك " اختلاف الآراء لا يفسد للود قضية " ولو عاجبك الكلام ، ياريت تقوم تعملي كوباية نسكافيه :P .. وبعدين سطر تسطيرة حلوة كدة ع مزاجك .. واكتب الكلمة وتعريفها في الجدول فوق ...
وإبدأ يا معلم بقي اشتغل كدة معانا صفحتين ان شاء الله تعريفات .. تمام؟
تمام
وبعدين خلصنا التعريفات هنعمل إيه ؟
هنعمل صفحة للأحكام اللي في الدرس كله ...
بس يبقي علي صيغة سؤال .. وجواب ...
وفي السؤال تكتب مع التعليل؟
وفي الإجابة تكتب الحكم ، وبعدين التعليل ........

· حاجة مهمة : متنساش تكتب السؤال بخط أحمر ، والإجابة بلون مختلف وليكون أزرق مثلاً ... بس استنضفوا وانتوا بتشتروا الاقلام برضه :D

كدة معانا كام صفحة؟ شايفك يا اللي بتقول 10 صفحات >_< .. ليه ياعم 10 صفحات؟ التعريفات يوم ما تبقي كتيرة يعني مش هتاخد اكتر من صفحتين .. بس انا بكلمك ع صفحات الكشكول الكبير أبو 8 جنيه ده .. قوم ياعم ارمي الكشكول ده وهات كشكول جديد .. لما تكتر الصفحات هتحس الموضوع صعب شوية ! مع انه سهل جداً ..
خلاصة الكلام يا دكتور , ويا دكتورة .. ويا بشمهندس ويا بشمهندسة ..
شايف بتوع الأدبي بيقولولي واحنا يا أبو حميد مالناش مسميات ولا ايه؟
أقولكوا ما انا لو ناديت لكل واحد بيقرأ ، مش هنخلص الكلمتين اللي عاوزين نقولهم بقي

· معانا كدة 4 صفحات .. صفحتين تعريفات ، صفحتين أحكام وتعليلات ...
· شوف بقي أكيد هتلاقي في كل باب اختلافات .. قال الزركشي ، وقال الزجاج .. وكل واحد قاعد يفتي بقي " أنا فقط أمزح ،قصدي كل واحد بيقول رأي مختلف عن التاني يعني ... بس علي فكرة اختلافهم ده رحمة لينا ^^ رحم الله علمائنا الكرام " ...
اكتب بقي في صفحة جديدة الاختلافات اللي بين العلمااء دي ....
بعد ما كتبت كل الكلام ده ، أكيد المعلومة بدأت تتسرب لعقلك ... هتجيب بقي الـ 5 ورقات دووول وتحفظهم عن ظهر قلب الكتابة ممكن تاخد معاك ساعة مثلا ... ؟ طيب تمام .. الحفظ بقي ان شاء الله هياخد معاك بالظبط ساعة برضه؟ طيب تمام ! كويس ... ساعتين في حفظ باب كامل ، بدل ما كنت بتحفظ صفحة فقه في ساعتين وتطلع مش فاهم حاجة برضه حاول انت تعمل ملخص بإيدك ، هيفيدك قوي الكشكول ده ، أحسن من المرشد .. وأحسن من كتاب المعهد " وربنا يجعل كلامنا خفيف عليه يارب ) .
·الخلاصة :
ذاكر المواد الشرعية علي انها اسهل مواد تتلخص ، وأسهل مواد تتقفل ... وعلي فكرة بترفعك جدًا في المجموع ...


حاجة كمان // متفضلش تردد بينك وبين نفسك .. " أنا مش هعرف ألم الفقه .. أنا مش هأعرف اذاكر الفقه .. أنا مش هأعرف الخص الفقه " .. دي غلطة كبيرة ع فكرة! .. لازم يكون عندك انطباع جيد عن كل المواد يا بركة علشان تقدر تذاكرها! وإلا ... انت عارف بقي
انا معاك ان في حاجات كتير بتبقي " مجعلصة " في الفقه ، وده أنسب وصف للحاجات دي الصراحة يعني! .. لكن في مثل بيقول " ما سهل فهمه ، سهل حفظه! "
أيوة ، يعني متمسكش الكتاب وتقعد تلخص ، وانت مش فاهم انت بتكتب ايه ؟!

** إفهم ، وبعدين لخص ، وبعدين احفظ ...


· آخر حاجة بقي : العبد لله اللي بيكتب الكلام ده لسة مفتحش المواد الشرعية ، يعني يدوب أخدت فكرة عن المواد كدة .. ذاكرت باب الطلاق ، والرجعة ، وسورة الذاريات واول 5 أحاديث .. ودول ذاكرتهم من 5 شهور فاتوا .. يعني يعتبر لسة هابدأ شرعي أهو ! – طبعاً انت بتقول دلوقتي " وانا مالي ياعم " ؟ .. " انت بتقولي الكلام ده ليه " ؟ .. أقولك يا سيدي علشان انا عارف ان معظم الناس في أزهر لسة مبدأوش شرعي ، وفقدوا الأمل .. فـ انا بقول كدة علشان متفقدش الأمل ، ومش بحور عليك ع فكرة .. دي حقيقة! انت تقدر تلم والله لو بدأت دلوقتي .. كل الحكاية شوية مجهود ..
وإفتكر دايماً يا عزيزي الجملة دي " ما لا يدرك كُله ، لا يترك كله " !!

أفوتكوا بالعافية ..