حكايتى مع التعليم

[dr.zomba]

1: ما هو موقف ولى الأمر من هذا الموضوع؟
موقف ولي الامر يجاوب عليه ولي امر
2: هل ما فعله الأب كان صح أم غلط ؟
والله يا استاذ عصام مش عارف بس المفروض اني بروح المدرسة اتعلم مش اتعذب
3: هل الأسرة أخذت حق ابنها أم أهملت فى هذا الحق؟
بس كان علي الاقل عتاب بسيط بينكم وبين بعض
4؟ ماذا يحدث لو تم عمل تقرير لهذا الموضوع ؟
مش عارف اذا كانت المدرسة او الادراة كانت هتجيب للطالب حقه ولا لا بس شايف انه لو كان عتاب ولو بسيط حتي

طب انا هحكي لحضرتك عن حاجة

كان في مدرس دين بستني للطالب اي كلمة عشان يضربه بالجلدة يعني مره طالب بيقوله: يا استاذ اللي قاعد جنبي بيقولي ( مش فاكر بصراحه كان ايه سؤاله بس كان بيسال سؤال في الدين )
قاله : افتح ايدك واداله جلدتين تمام وقاله لما يعوز يسال يسالني طب مش كان يعمله براحه ليه الضرب
وحاجات كتير زي دي كان مابيصدق ان حد يساله عشان يضربه وكان بينزلنا المكتبة ويدينا كتب نقرأها ويخلي كل واحد يقوم يقرأ اللي يغلط في حرف واحد يضربه كل حرف بضربه
دا تعذيب ولا مش تعذيب ؟ وصل لدرجة ان محدش بقي بيطيقه وبقينا عمالين نفكر نعمل فيه مقلب عشان نجيب حقنا بس مش رضينا وخلصنا السنه واحنا بنكره الراجل دا ولحد دلوقتي

ومره مدرس زراعه كان بيدخل في الحصص ومعاه طلبه يبيعوا تمر وعصير برتقال وسوبيا ودخلنا في حصة رسم
وكانت المدرسه موقفه الطلبه اللي مجابوش كراسة الرسم وانا كنت منهم واتضربت وخليتنا نتزنب لاخر الحصه وخلاص المدرس دا داخل بيقولها :عملوا ايه دا يا ابله
قالته مجابوش كراريس الرسم قالنا اطلعولي برا ( عند السبوره يعني لاننا كنا متزنبين في مكانا ) وفضل يكملنا بالراحه ويقولنا يعني ينفع كدا يارجاله متجيبوش الكراريس عيب ومش عيب وعموما الوحدة المنتجة بتبيع كراريس الرسم ( اللي هو ماسكها ) وهبعتلكوا عيال يجيبوا تشتروها منهم

راحت انا قولتله: طب واللي عنده كراسه ونسيها في البيت
قال: اااااااااااااه لا اللي عنده ومجبهاش يطلعلي برا بقي وهاتي يا ابلة العصايا
هي قالته : ما انا خلاص ضربتهم قالها :معلش هاتيها
وكنت انا اول استفتاح 6 عصيان والعصايا تنكسر علي ايدي انا ساعتها عيطت بس مش عشان الضرب عشان صعبت عليا نفسي اني انضرب ظلم

وروحت البيت وحكيت لولدتي وتاني يوم جاتلي هي وخالي وبصراحه المدرسه اتقلبت فوق دماغه
وبعتولي يواجهوني بالمدرس لما بيقولي انا ضربتك كام عصايا يا ابني قولتله 6 قالي 6 لالالا هما اتنين قولتله الفصل كله شايف راح ساكت
وطلعت الفصل
مفيش 10 دقايق ربع ساعه ولقيته طالع بيقول كل واحد اشتري وعايز يرجع الكراسه يرجعها دلوقتي الفصل كله رجعهاله إلا اتنين او تلاته

ايه راي حضرتك في دول بقي؟