كرسى الاعتراف

[أسيل رزق]

المشاركة الأصلية كتبت بواسطة بنت الإسـلام

هو البتاع ده نايم كده ليه

بصي دي تشكيلة بتاعتي على شرين كده
ممكن تسمها اسئلة شيران
زي نمار كده

-اكتر موقف انساني حصل معاكي(سؤال جديد جداليكي ياميهو يقى) كدابة

دى حاجة بينى وبين ربنا عارفة كل أما أتزنق فى مشكلة أدعى ربنا بالموقف ده مشكلتى تتحل على طول ،مع إنى نفسى أحكيه يمكن يصادف حد فيكم وتبقى نقطة بيضة فى حياته

3- والحلم اللي حلمتي بيه وفشلتي في تحقيقه?
مش فى ذهنى حاجة دلوقتى .. أصلى فشلت كتير
4-ايه احسن حاجة بتعمليها في يومك يعني مش بتحسي بالوقت وانتي بتعمليها؟
لما بدخل المنتدى العقيم ده
10- اتظلمتي من حد ظلم جامد قبل كدة ولسة مش مسمحاه لغية دلوقت؟؟وممكن تحكيلنا الموقف لو مش هيدايقك
أه كان ظلم مفيش بعده ظلم ، بس مش هقدر أحكى الموقف
11- ظلمتي حد قبل كده ومش راضي يسامحك؟؟وبردو احكيلنا الموقف
مفتكرش إن ده حصل
فى رايك:
مين::
احسن مشرف قسم؟ مستر مينا ماهر / آيه من الله
احسن مشرف ادارى؟ مفيش
احسن عضو؟ شريف الخضرى
احسن عضوة؟ بنوتة أهلاوية
احسن مدير موقع؟ مفيش
مين نفسك توقفيه نهائى؟ جنيرال ، قالوا الوداع قلت قشطة
توقفيه 3 ايام المستبدة ( رخامة )

ايه الموقف اللى ندمتى عليه فى حياتك ؟

انى عرفت شخصية وإتخدعت فيها

مين قدوتك من المنتدى ومن بره المنتدى ؟

محدش معين لما بشوف حد متميز فى شىء بحاول أكتسب الصفة دى منه

ايه اكتر حكمة بتحبيها وبتقتنعى بيها ؟

إذا أرددت شىء بشدة ، أطلق سراحه فإن عاد إليك فهو ملك لك إلى الأبد و
إن لم يعد فهو لمن يكن لك من البداية

هما اسئلة منقولة من ايام نسمة
مش بتوعي انا بس بس جاوبي

شوية اسئلة منك فيكي كده

عشان تعرفي انه من حفر حفرة لاخيه وقع فيها

4- ايه رايك فى الادارة حاليا ؟
زفت
5- بما انك مشرف ادارى شايف ان الادارة مسؤلية كبيرة
و هل هى شغلتك عن المشاركة او عن جامعتك؟
ركزى يا بت
6- من وجهة نظرك مين الاعضاء المميزين فى المنتدى؟
بنوتة أهلاوية / شريف الخضرى / فيفا / أحمد رضا / أسدات/ دكتور زوما / نسمة /زوبا حبيبتى
7- و مين اللى عدمهم احسن من وجودهم؟
ناس كتير فى المنتدى عدمهم أحسن من وجودهم .. جنيرال وكل المشرفين اللى مش بيدخلوا وعمك عبقر بالمرة .. هى خربانة خربانة
8- ايه اللى خلاك تختار هندسة ؟
انتى بتنقلى وخلاص !!!
9- مين من المنتدى بتشيل معاه سرك و مين من برة المنتدى برده؟
امممم حالياً مفيش حد بديله سرى أو اللى بقوله مايعتبرش سر ده مجرد شكوى أو محاولة لإجاد حل لمشكلتى .. من برا المنتدى يمكن فى بنت بتحبنى لدرجة ماتتوصفش بجد ربنا يخليهالى ممكن تعمل أى حاجة علشانى بفضفض معاها وأنا مطمنة جداً
10- لو بقيت مدير الموقع ايه التجديدات اللى هتعملها؟
هشيل طاقم الادارة بعمك عبقر وأحاول أختار ناس قد مناصبهم اللى هيكونوا فيها
11- ايه اكتر حاجة تضايقك؟
الكذب
12- و ايه اكتر حاجة تفرحك؟
حب الناس ليا
13- قولنا امنية حققتها و امنية لسة متححقتش
الحمد لله دخلت آداب عين شمس .. نفسى فى بيت صغير على البحر وتكون حواليه جنيه وإستابل خيل
14- اكتر موقف احرجك؟ متقولش مش فاكر
لما هو أكتر موقف محرج بتسألى ليه يا بت ، بصى يا ستى هو مش أكتر موقف محرج ولا حاجة بس كان فى أول السنة فى ولد فى الدفعة مش عارفة قاصد ولا هى بتيجى معاه كده دايماً يحرجنى يعنى مثلاً كان فى ملازم بتتوزع فا لقيته راح جاى إدانى ملزمة وبعدها لقيته جاى بيقولى انا مخدتش ملزمة ممكن تدينى اللى معاكى طبعاً إدتهاله مش عايزة الحركات الهبلة بتاعة الشباب دى وأنا فى اول سنة مش عايزة أبطح حد فى ماغه من أولها ..مرة تانية الجدول إتعدل فا جاب الجدول من شئون الطلبة وقبل محاضرة الفلسفة قال ياجماعة الجدول إتعدل فا قال هيمر على الكل وينقله لاقيته ساب الدغعة كلها وجه يدينى الجدول لسه بنقله لقيته راح خاطفه منى تانى وقالى أنقله أنا الأول كان منظرى وحش جداً .. فى نفس المحاضرة دكتور الفلسفة عنده كمية سخرية فظيعة فتفطسنا من الضحك،المهم الولد ده عامل فيها فلحوش وفاهم كل حاجة فا الدكتور سأل سؤال وبيسمع إجابتنا فا ده قام وقال كلام عجيب ومالهوش علاقة بالسؤال ولا بالفلسفة أصلاً والدكتور بهدله أخدلى حقى منه ومن ساعتها ماشفناش البنى آدم ده فى الدفعة بعد كده
15- يا ترى ايه السلبيات و الاجابيات فى المنتدى ؟
السلبيات وجود مشرفين وإداريين كتير مالهمش لازمة .. وكل واحد تافه بيدخل مشكلة فايهيص فى الهيصة و فاكر نفسه واد مفيش زيه ولا بنت مافيش زيها وبقى فى ناس كتير ماعندهاش أخلاق يعنى من آخر المش محترمين كتروا فى المنتدى أو بيتخفوا فى قناع الأدب والإحترام
الايجابيات فى بعض ناس محترمة جدعان وفى بنات محترمة يتصاحبوا
16- قولنا موقف مضحك
هههههه المواقف كتيرة ياختى..كنا فى جمعية رسالة فى قافلة إطعام أطفال أيتام ومسنين فى جزيرة الوراق .. المهم البنات بيقعدوا مع الأطفال البنات والشباب مع الأطفال الولاد فا كنا جايبين لعب أطفال ووزعناهم عليهم وفضل معايا حبه .. فا لبست ماسك وأصحابى صورونى بيه أظن شفتوا الصورة على الميل وكنت زى القمر .. المهم فى بنت عاملة فيها الزعيمة على العيال البنات الصغيرين بت كده زعبولة وكلبوزة وعاملة فيها رئيسة عصابة وتضرب فى دى وفى دى وكل شوية تيجى تشدنى من التونك وتقولى أبلة دوخينى البت دى خنقتنى المهم ضربت بنت أصغر منها وخارجة من أوضة الأكل وأنا لابسة الماسك ومش واخدة بالها رحت موطية عليها وعملت صوت وحش البت من خضتها ضربت فى السقف ونزلت تانى وكل اللى موجودين فضلوا يضحكوا على منظرها ههههههه . موقف بايخ مش كده؟
17- ايه هى فلسفتك فى الحياة؟
فى واحد بيسأل واحد تانى بيقوله فيما معناه : مريت ب 100 تجربة فاشلة ماذا إستفدت منهم؟؟ قاله: عرفت 100 طريقة تؤدى إلى الفشل
18- يا ترى حاسس انك استفدت بنسبة اد ايه من القسم التعليمى؟
بنسبة60%
19- بتدخل المنتدى متوسط كام ساعة فى اليوم ؟
هههههههه لا أنا بقيت أحسن من الأول أخرى على المنتدى6 مساءاً يعنى حوالى 6 ساعات
21- ايه رايك فى وضع مصر الحالى؟
لولا العدوان الإسرائيلى على غزة كان زمان الأسعار قلت عن كده بكتير .. مصر مش هتتعدل إلا لما يمسكها راجل بمعنى الكلمة
22- شخصيتك عالنت بتختلف عن الواقع
تقريباً لأ .. بس المفروض تسألى البناتيت اللى شافونى
رأيك فى كل من

اسدات: ولاء دماغ لواحدها وساعات بحس إنها سهونه دمها خفيف ولذيذة

بنت الاسلام : عسولة وعنيدة ومتفائلة وبحبها بمواضيعها وسلاطاتها وبابا غنوجها
ما رأيك بهذه الكلمات ..

الخيانة ..صعبة جداً وبتجرح أوى

المرأه..أساس المجتمع

الصداقة ..أسمى معانى الوجود بعد الحب

النميمة ..كتيرة أوى اليومين دول

النفاق ..بكرهه كره العمى

العاطفة..نعمة من الله ولولاها كانت الناس أكلت بعض

الرحمة..صعب الكلام عنها ، صفة جميلة جداً تفوق الوصف

العقلانية..أساس وجود الإنسان وبدونها يصبح حيوان

ايه الصورة اللى تتوقع اننا شايفينك فيها؟
ههههههه فى بنات بيقولولى إحنا كنا متخيلينك طول بعرض وضخمة كده ولما شافونى ماصدقوش إنى أسيل خالص .. و فى بنات بيقولوا كنا فاكرينك شريرة ووشك ده بيطلع شرار ههههههه وبرضة ماصدقوش لما شافونى
ايه الصفات اللى بتحمد ربنا انه وهبهالك؟
حب الناس ليا ،خفة دمى ، صراحتى ،فضولى فى تجربة أى شىء ( مش أوى يعنى )
و ايه الصفات اللى فى غيرك و تتمنى تكون عندك؟
البرود بتاع ياسمين وبسام ..و نفسى أبقى ذكية شوية
و ايه الصفات اللى مش عجباك فى نفسك؟
العصبية ، المبالغة فى الصراحة وخصوصأ إنى برمى دبش مش كلام ،لما بكون مضايقة ببقى وحشة موت ، وطيبة أوى ، عدم إحساسى بحب أصحابى يعنى عارفة انه بيحبونى ويمكن فى ناس من أفعالها معايا بحس إنى لما أموت هيموتوا معايا بس من كتر المشاكل اللى وقعت فيها فقدت الثقة فى الآخرين بنسبة كبيرة، ساعات بنم.
احكيلنا عن طفولتك باختصار يعنى فيما لا يزيد عن 10 صفحات
طفولتى كانت هادية ورقيقة زيادة عن اللزوم كنت إعتمادية على أمى جداً كنت بعيط من النظرة الحادة شوية ومازلت بصراحة ..لما بكون مبسوطة ببقى شقية موووت ودمى خفيف جداً بس كنت مغرورة أو بيتقال عليا مغرورة ماكنتش بحب أقعد مع ناس معينين ولا ألعب مع الأطفال كنت بقول أنا من طفلة علشان ألعب زى العيال دى .. كنت مرتبطة بأخويا جداً لحد 2 ثانوى حسيت إن كل واحد بقى ليه حياة مستقلة .. ماكنتش بحب ألعب غير مع أخويا و هو نفس النظام كان بيعاملنى على إنى أخوه مش أخته حتى المصايب بتاعة الأطفال كنا بنعملها سوا يولع هو فى البيت وألبسها أنا .. ماما كانت تسيبنى فى البيت فى مكان معين وتنزل تشترحى حاجات تيجى تلاقينى فى نفس المكان..الملخص يعنى كنت هادية ومنطوية وخجولة جداً وشقية مع أسرتى بس و مُسالمة جداً.
امتى اخر مرة عيطت؟ وليه؟
إمبارح .. بقالى سنة ماشية على إنى مادخلش حد فى قلبى لدرجة كبيرة ( أصحابى البنات ها علشان محدش يفهم حاجة غلط )بس ولاحظت إنى حبيت واحدة زيادة عن اللزوم وطلبت منها طلب بسيط جداً ورفضته ..حسيت إنها بتحبنى حب عادى مش قد حُبى ليها فصعبت عليا نفسى وعيطت طول الليل
اهلاوى ولا زملكاوى
أهلاوى طبعاً يا شقيق
اخر هدية استلمتها ؟ و من مين؟
بابا ربنا يخليهولى .. إدانى الموبايل الجديد
بتحب الاكل من برا اكتر ولا اكل البيت؟
أكل مامتى طبعاً بس عندى فضول فظيع للأكل برا إسئلى البت نسمة بالذات عليا
المسميات تهديها لمين؟ و ليه.؟
القلم الذهبى( بسام )أسلوبه مميز جداً ومختلف عن كل أعضاء المنتدى قلمه ذكى وصريح وله مذاق خالص
شهادة تقدير( أحمد رضا )أشعاره لا مثيل لها
وردة حمرا( بنوتة أهلاوية )سمنة حبيبتى بحبها جداً وأقل حاجة أقدمهلها هى وردة حمراء
وردة بيضاء( نسمة )طيبة و حنينة جداً وقلبى صافى ورقيقة
ورقة بيضاء( همس )ورقة بيضاء لتبدأ من جديد صفحة جديدة
اكمل:
عضو مميز(شريف الخضرى )
مشرف مميز( آيه من الله )
مشرف ادارى مميز(مفيش)
عضو مثقف(بسام)
عضو عدمه احسن من وجوده (جنيرال)

عارفة نهم مكركرين
بس الموضوع ده شطب على كل الاسئلة:abdoog8:
طيب ياختى ربنا يديكم الصحة


اشمعنى اسم اسيل؟؟؟
دخلت كنت هسجل بـ مها رزق قالى موجود ..انجليزى عربى عبرى هيرغليفى موجود آخر ما زهقت جربت أسيل وأنا عارفة إنه مش هيسجل .. لقيته راح مسجل .. وأسيل أصلاً أخت واحدة صحبتى .. بس يا ستى

خنقتينى يا بنتى نص الأسئلة مكررة

حرام عليكى من الساعة 9 و أنا بجاوب أسئلتك يا رخمة

عيال تجيب الشلل

بت يا إيمان مش عايزة أشوف وشك هنا تانى