الشهر مقسوم نصين نص ميه ونص طين

[أ/رضا عطيه]

معلشى ياأخوانى أصل أنا م الريف الجوانى
اللى كل الجديد فيه قطر وصفارته سورانى
وكل المسئولين اللى أعرفهم العمده والغفير حمدانى
أصله قريبنا قوى وواسطته وجمايله مغرقانى
أه ياغلبى وأأأأ أه يانى

الحضاره كانت هنا من زمان لكنها رحلت مع اللى كان
بس تركت فى قلوبنا إنسان يصلح لكل وقت وكل أوان
يصبر ويتحمل الهوان علشان يحافظ على أمن الأوطان
وإن قلت كده ياناس تلاقى كل خلق الله مخصمانى
والإهانه تنزل عليا زى التهانى

الشهر عندى مقسوم نصين نص ميه ونغنغه ونص فقر وطين
نص عدس نص فول ياموحدين وان دخلت اللحمه نبقى مبذرين
وكل اللى حيلتى مرتب وظيفتى وتلات أولاد محروسين م العين
إتربوا على حمد ربنا وكل أحلامهم مؤجله وصارت أمانى
ويعنى للغلابه هيكون إيه تانى

اللى على قلبى دايماعلى لسانى وده طبع ومفيش عندى تانى
واللى يزعل ياعم يزعل مادام رب العرش فى قلبى ووجدانى
واللى ينصحنى يوفر نصايحه لنفسه لأنى كدا أنا بفكر إنسانى
لابجيد النفاق ولا الرياق ولابرسم حياتى بفيلم وأغانى
ولافكرى ليبرالى ولاحتى إخوانى

اتعودت أحترم وأقدركل الناس وأكن لهم كل الموده والإخلاص
وأكره قوى اللى يغدر بينا ويكون رفيقه أشر الناس والوسواس
واحنا فى زمن العجب وكل شىء انقلب والحب بح خلص خلاص
كل واحد بيقول يلا نفسى وعفوا معظمنا صبح أنانى
والوطن لو راح هنجيبه منين تانى