زهقت قرفت تعبت

[أ/رضا عطيه]

زهقت قرفت تعبت
أعيش عمرى كدا زى الجدران مجرد جدار لمليون بستان
وكام واحد عايشين فى أمان والباقى فى الغلب والحرمان
تزينوه بهواكم وتشوهوه بهواكم و تهدموه وقت الطوفان
زهقت قرفت تعبت -أعيش مجرد ستار للكبار وبلاعنوان

زهقت قرفت تعبت
رب الكون خلق لى لسان زيكم وفصيح
والمطلوب منى دايما تمثيل دور الجريح
تمثال للغلب والهم وسط بيوت م الصفيح
مقطعه هدومه وكمان أعمىأخرس كسيح
ويوم فى السنه لاغير أنا الشعب أناالكبير
وباقى السنه ورقه فاضيه فى مهب الريح


زهقت قرفت تعبت
أكون تمثال الحريه على باب القصر الجمهورى
يتغنى بيه الكل والكل بيتقرب منىويغازل عيونى
مجرد إعلان يصدر كام بيان وكأنى مش إنسان
ولما يوصل المذكور لمبتغاه فى المجهول يرمونى



زهقت قرفت تعبت من استغلالى لتثبيت السلطان
زهقت قرفت تعبت إنى أكون شعله لفتن الشيطان
زهقت قرفت تعبت من أنى أعيش كدا بلا عنوان
ياعالم ياخلق أنا المصرى رغم أنفكم أعظم إنسان

نفسى أكون أنا صاحب كلمتى وأبنى بعرقى دولتى
زهقت من الباشا والبيه اللى دايما بيخطف لقمتى
قرفت من الدكاتره فى شخص واحدوبيرشدخطوتى
تعبت من تعبى اللى تعب قلبى وراعبنى فى خلوتى
ونخبه راحت ونخبه جايه وقرود بتتنطط وتشكك فى زمتى
وأنا اللى بحب البلدى وياويله فى اللى هيهمل قوتى

إهداء إلى كل مصرى حقيقى اتعلم فى مدارسها
ويعتز بعاداتها وتقاليدها
ويتصدى لأى إنسا ن يسىء لمشاعرهاوتاريخها
وأنا واحد من الشعب وبتكلم باسم الشعب