ملتقى طلبه اولي طب 2011/2010

[Magic Sword]

السلام عليكم ورحمه الله وبركاته
نتناول ان شاء الله في هذا المقال ايضا اعذروني شرح اخر للاناتومي ولكن مختلفه لان ماده الاناتومي تعتبر من اغتتت المواد اللي علينا والله الموفق
نبدا باسم الله
Anatomy 1

Anatomy , تشريح او تركيب الجسم .. مش هتاخد وظيفة الاعضاء .. هتاخد تركيب الاعضاء .. وعلاقتها ببعضيتها ايه
المادة دي بتدرسها في سنه اولى وبتكملها في سنه تانيه
هنا بنتكلم خصيصا عن منهج سنه اولى

الأدوات

1. بالطو ابيض
2. قفازات gloves
3. ملقاط أو فورسيبس _مش مهم قوي
4. العظم

بتشتري رقم 1 و 2 و 3 من المحلات اللي قدام اللكلية و جامع النور العظم من اسر الكلية زي ما ذكرنا في المقاله السابقه او تأجره من المشرحه فى الكليه
مصادر المذاكرة((للاناتومي فقط))


-هنذاكر منين؟؟

• كتاب د سامح دوس : احسن كتاب تقريبا في الاناتومي بالنسبة للرسومات .. رسوماته واضحة جدا وملونة

شرحه جميل جدا ومغطي المنهج بس ممكن تلاقيه مزود شوية تفاصيل ممكن تتعبك وانت بتذاكر ...

• كتاب د كاريمان : كويس بس صوره مش واضحة قوي هتحتاج تلونها او ترسم صور بنفسك، طريقة العرض سردية شوية

بس هتلاقي فيه cases applied anatomy بعد كل جزئية تقريبا ... خلي بالك منها مهمة جدا ,كمان هو كان مهم انك تزاكر منه قبل كدا لانه كان كتاب رئيسه القسم لكن السنه دي ممكن دكتور محب ينزل كتاب تانى او لا لو نزل كتاب تانى للقسم يبقى مهم يتزاكر منه جدا

• أطلس د.غازي : أطلس فيه صور بالالوان للبون والفليش و دياجرامز كتير حلو قوي وبيفيد في المذاكرة

• كتاب د كمال اسعد :

ممكن الرسومات اللي فيه مش تعجبك او مش تفهمك اوي عشان كدا ممكن تستعين برسومات كتاب دكتور سامح دوس ( ممكن تصورها ) شبه كتب د.كاريمان لحد كبير

• ورق د عباس اناتومي : راااائع جدا للناس اللي بتاخد معاه درس وهيساعد في الحفظ والتذكر في الامتحان .. بس يفضل للناس اللي مش بتاخد معاه درس تذاكر من اي مصدر تاني علشان غالبا مش هتعرف تفهم الورق من غير الدرس.

• ورق د اسامة : اكتر مصدر ورق ملخص وصغير جدا للناس المزنوقين ومعندهاش وقت تذاكر من كتب الشرح التانية ...

نصيحة متعتمدش عليه اعتماد اساسي لو عندك وقت

• في العملي ورق د.شريف تحفة وهيساعدك كتييير في العضم

Chapters

1. introduction: كتاب صغير بيتاخد اول السنة خالص .. بيشرح في المصطلحات التشريحية علشان تعرف تذاكر وتتعامل مع المادة بعد كده .. اول السنة خالص بيبقى صعب جدا بس بعد كده بيبقى سهل لدرجة انه يتراجع في ساعة مثلا ... مش لازم تضايق نفسك علشان تحفظه كلمة كلمة .. هتلاقي أسماء كتير فيه لعضلات و حاجات متعرفهاش هتاخد منها حاجات كتير على مدار السنه .. متتعبش نفسك فيها..افهم بس هو عاوزك تعرف ايه ومع الوقت هتلاقي الكلام ده سهل وبديهي بالنسبة لك..بس اهم حاجه انك متستهترش بيه اخر السنه زى ما معظمنا بيعمل لانه عليه درجه مش قليله فى الامتحان و درجاته مضمونه يعنى حرام عليك تضيعها من ايدك ...
2. Upper limb: بيشرح الطرف العلوي في جسم الانسان .. العظم والعضلات والاوعية الدموية والاعصاب وعلاقة كل حاجة بالتانية
3. Lower Limb : نفس نظام الupper بس على الطرف السفلي في الانسان بس هتحس انه اسهل لانك هتكون اتعودت على النظام
4. Thorax : هتاخد ال thoracic wall و الرئتين و القلب و المنطقة اللي ببين الرئتين و الحاجات اللي فيها
5. Embryology :بيشرح التطور الجنيني مش هتاخده كله في اولى ... هتاخد ال general بس يعني حوالي 20 صفحة من الكتاب بالاضافة لل special بتاع cvs & respiratory system

السيناريو الدراسي

• الاول طبعا الانترودكشن في اسبوع او اسبوعين كدة هتخلص
• السكاشن بتبدأ من تانى اسبوع او تالت اسبوع و بتبتدوا بحاجات خفيفه على العضم و كده
• نبدأ بقى السنة ب UPPER LIMB او الأطراف العلوية زى متفقنا ياتاخد درس يا تذاكر من كتاب القسم
• انت بتمشى كده

axilla ---> arm ----> forearm----->hand
تيجي تاخد axilla تاخد كل بقى bone و muscles و arteries و nerves و هكذا فى كله
هتخلص اكيد هتمتحن introduction و Upper و غالباً هيبعدوا عن الhand بس كون برده مستعد الأسئلة من كتاب MCQ بتاع القسم
من 15 درجة حلوين

• فى وقت نفسه هتاخد جزأ general EMBRYOLOGY و ده جزأ مهم

عن التطور الجنيني الكتاب بتاع القسم حلو فيه و غالبا هتاخد anomalies بتكون مهمة في امتحان العملي

• نيجى بقى لل Lower limb او الأطراف السفلية

هتبدأوة الترم التاني او آخر الترم الأول
الترتيب كده و انت نازل من thigh بعده gluteal بعد leg و بعد كده foot

• و بعد ماتخلص Lower limb فى امتحان تاني من 15

• بعدها هتخش على Thorax وبعده في امتحان تالت من 15 درجات

بيتاخد أعلى امتحانين من التلاتة وكمان بيكون في احد الامتحانات صور سبوت تحدد اسم المطلوب فى الرسم

• هتمتحن عملى بس قبل امتحان العملى اياك تجهد نفسك نظرى ده خطأ ركز في حاجات العملي

• بالنسبة طبعاً للعملى انت طول السنة هتحضر سكاشن سبوتنج احضرها حلو مش وحشة اما بالنسبة ل امتحان عملى هتخش هتلاقى ستين عينة دور على السلك بسرعة و اعرف ايه المطلوب فى السؤال و ملاحظة بلاش نضر بعض و تحرك السلك راعى ان فى زميل وراك برده

• بعد كده هتخش على اخر السنة MCQ و ال Essay و clinical cases

دي هتاخدوها في السكاشن و بتكون موجودة في الكتب
كتاب MCQ ده كتاب اساسى معاك و لازم تكون متابع فيه كويس
ممكن الكلام ده كله و نظام الامتحانات يتغير من حيث توزيعه درجاتها عشان فى رئيس قسم جديد

• حضور محاضرات الاناتومي له اهمية خاصة مهما كان الدكتور اللي بيشرح

لانهم بيجيبوا صور كتير ملونة للحاجة اللي بيشرحوها
الصور دي بتوضح المعلومة كتييير و تساعد على التخيل وبالتالي الحفظ
العملي / sections

• السكشن بيتقسم ساعتين

1. ساعة بتبقى شرحْ prelab في مدرج التشريح :ودي مهمة جدا جدا والشرح فيها بيبقى مفيد جدا جدا وممكن لو اعتمدت عليه بذمة متحتاجش درس اناتومي بيعيد على شرح المحاضرة والمجموعة بتبقى عددها اصغر من المحاضرات فالفهم بيبقى احسن
2. الساعة التانية بتبقى عملي في المشرحة و دي اللي بتحتاج فيها البالطو و الجوانتيات أو ال Gloves

بيجي معيد او مدرس بيشرح لمجموعة طلبة على الجثة الجزء اللي مفروض يتشرح .. وغالبا بيبقى ماشي ورا المحاضرات وال prelab المشرحة مهمة جدا علشان بتثبت المعلومة بجانب اهميتها لامتحان العملي اخر السنة.

• امتحان العملي بيكون 60 حاجة عليك تعرفهم يا اما تتعرف على حاجة ممسوكة في جثة او تلاقي علامة على عضمة بيسالك attached او related او تلاقي صورة او x-ray و بيسالك على اسم حاجة فيها

المذاكرة

• مذاكرة الاناتومي بتعتبر مبنية اساسا على الحفظ .. وعلى فهم العلاقة بين الحاجات اللي جنب بعضها في جسم الانسان.
• علشان تعرف تحفظ وبعد كده تفتكر اللي حفظته محتاج رسومات تخليك تتخيل الصورة في مخك .. ممكن رسومات زي اللي في الكتب زي كتاب د سامح دوس .. او اطلس سواء كان غالي او اطلس بسيط زي اطلس د فوزي جاب الله

• المشرحة كمان بتساعد في الحفظ وفهم العلاقة بين الحاجات وبعضها في جسم البني ادم

و لازم كمان تدخل المشرحه تراجع على الجثه بايدك

• لو رسمت انتا الحاجات بايدك وانتا بتذاكر هتفرق معاك جامد في ال

recall في الامتحان و خصوصا فى الثوراكس لان فى حاجات كتيره جدا هتبقى عاوز تعرف علاقتها باللى جنبها و مش هتدخل دماغك غير بالرسمه

• امتحانات التشريح جزء كبير منها بيتكرر وبالتالي مهم انك تذاكر امتحانات السنين اللي فاتت
• كتاب القسم بتاع ال Mcq مهم جدا

البحث

• بحث الاناتومي ب10 درجات
• بتتقسم الدفعة الى مجموعات حسب الارقام
• بيتقدم في صورة بريزنتيشن بالباور بوينت من 30 سلايد تقريبا
• كل مجموعة بتكون مع دكتور بيتابعوا معاه الشغل و بيعملوا البريزينتيشن قدامه

توزيع الدرجات و الامتحانات

• 250 درجة بيتقسمواا:

1. 60 درجة عملى على 30 عينه كل عينه فيها سؤالين
2. 10 درجات على البحث
3. 30 على اعلى درجتين فى الامتحانات التلاته اللى بتمتحنهم كل واحد ب 15 درجات بياخدوا اعلى اتنين
4. 4 درجات على حضور السكاشن
5. 15 درجه شفوى على لجنه واحده
6. 125 درجه نظرى 50 mcq

75 نظرى

• الامتياز من 212.5
• جيد جدا من 187.5
• جيد من 162.5
• مقبول150
• النجاح أكتر من 150

• نظام الدرجات ممكن يتغير السنه دى لان رئيس القسم اتغير

نظام الامتحان:

نظام امتحان mcq عباره عن
ورقه فيها الاسئله وورقه تانيه هنحل فيها هى عامله زى ورقه المربعات الفرق ان دى دواير مش مربعات
والفرق التانى ودا الاهم انها بتتصخخ يالكمبيوتر
ازاى ؟؟؟
كل سؤال له رقم مثلا 1 قدامه خمس دواير صغيره كل دايره فيها حرف a b c d e بالترتيب
سيادتك هتمسك القلم وتظلل الدايره الصح
خد بالك لازم التظليل يكون غامق وميتفعش تعمل اى علامه مثلا تعمل علا مه صح او شرطه لان الكمبيوتر مش هيفهم الكلام ده الكمبيوتر مبيشوفش غير يا ابيض مش متظلل يا اسود متظلل
ممكن تظلل بقلم ازرق او اسود بس نصيحه اعملوها بقلم رصاص غامق 2B مثلا عشان لو عايز ترجع فى الاجابه تقدر تمسح انما لو كنت عاملها بجاف ورجعت شطبت الكمبيوتر هيلغى الاجابه
لو الكمبيوتر لقى علامتين في نفس السؤال مش بيحسب حاجة لازم يتعرف على علامة واحدة بس
وهتكتب رقم الجلوس بتاعك بنفس الطريقه ازاى؟؟؟
فى اول الورقه مستطيل متقسم 5 خانات هتكتب الرقم بترتيب الاحاد والعشرات والمئات وبعدين الخانات الفاضيه تكتب صفر مثلا 00779
تحت كل خانه من الخانات الصغيره هتلاقى الارقام مكتوبه فى دواير بالطول من 0 ل9 هتعلم على الرقم اللى انت كتبته بتظليل غامق
مثلا انت كتبت 9 تعلم على 9 كنبت 0 تعلم على 0 وهكذا
بالنسبه لبقيه الامتحان الدكتوره قالت ان اهم ما يميز الاسئله انه ما فيش حاجه اسمها Give an account on الصيغه دى مش موجوده
لكن هييجى يقول مثلا describe او discuss
وشرط اساسى يقولك هو عايز منك ايه فى السؤال يعنى مثلا يقولك

• عن Ulnar Artery

How and where it begin
How and where it end
Its branches
يعنى ميسيبكش لايص فى السؤال مش عارف تبتدى منين
وكده بيبقى احسن فى التصحيح يعنى لو استوفيت النقط دى الدكتور يديك الدرجه مش راجعه لتقييمه الشخصى للاجابة
بالنسبه للحاجات المهمه

• قالت ان كل الحتت اللى ليها Clinical Importance هى من اهم الاسئله
• اهم حاجه فى الnerves الاصابه بتاعته
• نادرا لو سال عن relations بتاعت artery فيما عدا الحاجات المهمه

مثلا علاقه Axillary artery ب Brachial blexus

• صعب يجيى يقول علاقات Aorta مثلا لكن يقول تفرعات ماشى
• وقالت ان اهم حاجه فى الثواركس ان اى حاجه تتكلم عنها لازم تقول level بتاعها
• كمان Surface anatomy of Lungs and Plura and Pericardium and heart valves
• فى مواضيع بتبقى اقل اهميه لكن بيبقى ليها اهميه اذا كان ليه Clinical Importance زى lymph of the breast دا مهم جدا

varicose vein نفس الحكايه

• و كده يبقى خلصنا اناتومى 250 درجة غالين جداً ممكن ينقلوك فى التقدير لو عاكك شوية فى المواد التانية و كمان يفرقوا ترتيب

يتبع ....... ان شاء الله