ايها الاخوة المواطنون ... قد قررت ترشيح نفسى للرئاسة "طرائف شعبنا"

[usernamo]

بسم الله الرحمن الرحيم

طبعاً العنوان غريب .. و من الواضح انه لا يفيد بشئ و الموضوع هايف .. و انصح مرضى القلب و السكر (( و اللى عندهم عضلات و هيضربونى )) ميخشوش الموضوع

الشعب المصرى معروف انه ابن نكتة .. عايز تضحك بجد روح قهوة بلدى .. و اقعد مع الناس اتكلم معاهم .. هتلاقى نفسك " بترفص من الضحك "

فانا هجيب بعض المواقف اللى بتنرفزنى شخصياً .. و بتضحكنى جداً فى نفس الوقت .. و هى بتعبر عشان شعبنا الاصيل

و من هذه المواقف ..

انك تروح مكان .. تطلع بطاقة .. و والدى قاعد جمبى . و الست بتكلم واحد جمبها وواقفة على الكاميرا و كده و هتصور.. فببص لبابا و بكلمه لقيتها بتقولى خلاص كده اتفضل .. بقولها خلاص ايه .. بتقولى انت اتصورت .. بقولها اللى هو يبقى ازاى الناس فى البطايق بوشها انا هبقى بقفايا .. ! .. بتقولى يلا بقى انت هتستظرف .. يحرق .. يلعن .. يخرب .. و لقيتها تضخمت .. و كانت هتضربنى انا و بابا .. طبعاً بابا كان عايز يقولها انه ظابط و كده .. ملحقناش و سابنى و خلع ..

و فى موقف تانى ..

انك تسحب الاسانسير .. بعد عناء سافر .. و اول ما تيجى تركبه .. تيجى بنت تبصلك بصه بريئة .. و تستخدم انوثتها و سحرها .. و فى الاخر تقفل باب الاسانسير فى وشك و تاخده و تطلع .. و المصيبة .. تسيب الباب مفتوح .. و انا ساكن فى السادس و اصلاً مفيش صحة خالص .. فده بيدعوا الواحد انه يطلع الطاقات اللى جواه فى الغناء طوال السفر الى الدور السادس طبعاً بالاغنية الشهيرة (( انا ركبى حديد ))

و فى موقف تالت ..

انك تبقى راكب الموصلة الشعبية .. الفلوكس .. و الراجل تقوله رايح تعاون مثلاً او هرم يقولك بصوت يملؤها التجشم و جميع انواع المخدرات .. و تدقع الاجرة .. و بعديها بخمس دقايق يقولك اهو وصلنا الطالبية .. اقوله طب انا قايلك التعاون و لسه بدرى .. يقولى هو كده .. ياعم يهيدك يرضيك .. مفيش انزل ياض .. و تلاقيه تطلع كمية اسلحه من فمه .. معرفش كانت فين .. و جرى وراك ... !!

و فى موقف رابع ..

قاعدين فى عزاء و كان قاعد جمبى واحد من بلدياتنا لذوذ حبوب كده .. فا الفراشة بتبقى فيها حتت مفتوحة ... فا و انا قاعد لقيت ايد بتطلع من الفتحة دى .. و لقيتها بتتجه صوب قفا الصعيدى و اللى ما شاء الله قفاه طريق يمرح به الخرفان و البعير .. و نزلت طراااااااااااااااخ على قفاه و انسحبت بسرعه .. و بدل ما يكون عزا اتقلب مضحكة .. و الراجل قامم حطة الجلبية فى بوقه .. و هاتك يا جرى و را الناس ! ..

و فى موقف خامس ..

قاعد انا و والدى فى فرح كبير لشخصية مشهورة و كان فيه ابن الشيخ الشعراوى .. و الفرح كان شبه دينى .. و اسماء الله الحسنى و مش عارف ايه .. بعد هما 10 دقايق .. لقيت الشيخ طلع سيجارة .. و ضرب و اشتغلت اغنية شعبية .. و كل الفرح انتفض . قلت عادى .. لكن الاقى الشيخ يقوم يرقص SLow دى اللى مش عادى ابداً !!..
...............
انا الموقف دى .. بحكيها عشان اطلع منها بحاجة ... ان شعبنا ..الشعب الوحيد اللى فى العالم .. اللى سلبياته مضحكة .. عشان كده احنا شعب غلابة و الله ..

و السؤال هنا .. ايه شعورك لما بتمر فى المواقف اللى زى دى ؟

طيب ليه بتضحك و مش بتتنرفز ؟؟

تفتكر دى سلبيات و لا ايجابيات .. اننا نضحك ؟؟

و تفتكر او تفتكرى .. اننا هنتقدم كده .. و لا شعبنا مالوش غير فى الضحك .. ؟


UsErNaMo

ThaNwYa

Giza :P