لما انا ابقى كده .. و انت تبقى كده .. يبقى اكيد بكرة احلى

[usernamo]

بسم الله الرحمن الرحيم

طبعاً من يومين كتبت موضوع و قلت ان شعبنا ليس شعباً جميلاً .. لكن اساء البعض قصدى ..

انا لم اعنف الشعب .. لغرض التعنيف .. حاشا لله ..

انا عايز اشوف حاجة احسن .. عايز الاقى بنت ماشية فى الشارع .. امنة على نفسها

متلاقيش حد يأذى شعورها بكلام تافه ! ..

او اسمع بودانى واحد واحد يكلم واحد ميعرفوش و يشتمه بأمه و ابوه .. (( اينعم انا بهزر مع اصحابى بألفاظ سوقية .. بس شباب مع بعض و اصحاب )) بس مجيش صوتى فى الشارع يبقى معدى صوت الشاحنات و بقول شتيمة مش كويسة ..

حرام .. بلاش نأذى مشاعر الناس .. لازم يكون فى قلوبنا و لو ذرة احساس ..

عايز الاقى واحد يقول انا هختار ده .. و التانى يسمعه و يقوله لا انا هختار ده .. و فى الاخر يخلص الكلام .. و يكملوا لعب مع بعض دومينو على القهوة او طاولة .. و ميبقاش فيه عنف ..

عايز الاقى راجل ماشى فى الشارع ضعيف كبير السن .. يلاقى شاب يعديه .. و يقوله الشكر لله يا والدى ..
مش يستهزأ بيه و العربيات تزمرله و تقوله يلا يا كذا و يا كذا ..(( مع انك فى يوم هتبقى زيه ))

عايز تبقى ماشى مع خطيبتك محافظ عليها .. راجل معاها .. الراجل هو يفضل مخليها جوهرة فى ايده .. لحد ما يتجوزها .. مش يستغلها .. كما يستغل الذئب تعثر الشاه ..

عايزك تبقى ماشية محترمة .. صوتك خافت .. صوتك مع صديقاتك فى الشارع مش عالى .. (( انا مش بكبت حريتك .. بس مش كل الناس هتفكر و تقول انك مع صحباتك )) خليكى محترمة فى لبسك .. خليكى يا بنت الحلال مسلمة قولاً و فعلاً .. خليكى زى الصدفة .. داخل القوقعة .. لا يكشف عنها سوى زوجك .. خلى إيمانك بالله جوه قلبك .. مش ايمانك بالله عشان فى البطاقة مسلمة ..

و عايزك تنزل تشوف العشوائيات بتاعت البلد .. تساعد فى بلدك البلد محتاجاك

عايزك يأخى حتة تدمع من قلبك .. لما تشوف واحد بقاله 20 سنة عنده امراض مش عارف يتعالج و انت يا حبيب والدتك يجيلك برد ترفص و تقعد فى السرير كالاموات ..

تعرف ... تعرف .. لما انت تعمل كده ...

تعرفى ها؟؟ .. لما انتى تعملى كده ..

انا كمان لو عملت كده ...

اكيد .. هيبقى بكرة احلى .. بكتير من امبارح ..

بكرة هيبقى احلى من انهارده ..

بكرة هيبقى احسن فى جميع الاحوال ...

بس قول .. ان شاء الله ..^^

UseRnaMo
ThnAwyA