فاضل حوالى شهر

[* Dr.Nour *]

السلام عليكم ورحمة الله وبركاته

طبعاً فاضل حوالى شهر على امتحانات الثانوية العامة
و ناس كتير لسة ماستعدتش
و كل شوية بنقول هنبدأ مذاكرة كويس و كل مرة غالباً بنبدأ بنشاط و بعدها ننسى
و أكتر حاجة بتقلل نشاطنا تقريباً هي النت
خلاص فاضل شهر يعني النت دلوقتي مالوش أي لازمة
بالعكس بيضيع وقتنا زيادة عن اللزوم

طيب المفروض نعمل إيه دلوقتي ؟ يعني نسيب النت خالص ؟
آه نحاول على قد ما نقدر نعمل كدة علشان خلاص الشهر دة بإذن الله فيه تحديد مصيرنا
يعني لو ذاكرنا فيه بأقصى جهد عندنا إن شاء الله ربنا هيكرمنا و نحقق أهدافنا
لكن لو برضو فضلنا كدة قاعدين على النت نضيع وقتنا خلاص ما نزعلش لما نجيب مجموع أقل من مستوانا و ندخل كليات مش بنحبها و نفضل طول عمرنا بنندم على إننا ما ذاكرناش الشهر دة بس

الشهر دة هو اه صغير لكن نقدر نعمل فيه حاجات كتيييييير أوي

يللا نتعب في الشهر دة و نسيب النت الـ30 يوم دول بس و حتى نفتحه أيام الامتحانات مش مهم لإننا لما بنفتح أيام الامتحانات كدة كدة مش بنعرف نقعد كتير علشان الوقت بيكون قصير

و والله عن تجربة أول ما نبدأ بس نذاكر ربنا بيساعدنا و بنكون عايزين نكمل و طول ما النت مش موجود الموضوع بينجح فعلاً

دلوقتي إحنا لازم نضحي علشان ربنا يكرمنا و يوفقنا و طبعاً صعب جداً إننا ما نفتحش النت لكن لو ضحينا بشوية الوقت بتوع النت علشان المذاكرة ربنا بجد هيحققلنا أهدافنا و مش هيخذلنا لإننا لو ما عملناش كدة مش هنستحق أصلاً و غيرنا هيعملوا كدة فأكيد ربنا هيوفق اللي بيتعب

مش شرط يكون التعب من أول السنة لكن دلوقتي خلاص إحنا قدامنا فرصة كبيرة لازم نستغلها و نتعب بجد و ندعي ربنا كتير

و إن شاء الله الشهر دة نستغله و ندخل الامتحانات و إحنا مش سايبين حاجة في المنهج و عاملين اللي علينا

و ربنا يوفقنا جميعاً .

السلام عليكم ورحمة الله وبركاته ..