حوار مع متفوق/ة ف المنتدى ...

[einstien]

بسم الله الرحمن الرحيم
مجموعى 204.5 يعنى 99.8%
اكتر مادة بحبها : هو مش هقول مادة لان المواد بتتذاكر اى بتتحفظ لكن لو تقصدى اكتر علم بحبه هو الفيزياء - التكامل - الجبر - بعض مواضيع علم الاحياء
اكتر مادة بكررها العربى لاننا احنا بنحفظة وخلاص وانا عن نفسى كنت حافظ الكتاب كله مكنتش فاهم ولا كلمه الا القصه والنصوص والنحو انما القراءة معملتش بيها حاجة ولا فهمتها من اصله
نفسى اطلع ايه : انا نفسى ابقى دكتور الفيزياء النظريه فى AUC وممكن دكتور التحليل المركب فى نفس الجامعه لكن دة مش هيحصل لانى علمى علوم لكن تفكيرى انى بعد ماجمع الفلوس لكل دة ادخل اتعلم العلوم دى على حسابى فى جامعه خاصه او ادخل الAUC على حسابى بردو السبب لان الفيزياء والرياضيات هما الطريق الى معرفه الله لكنى بردو نفسى الاقى علاج لمرض السرطان فى المراحل الاخيرة حتى من بدء انتشار المرض
موضوع السهر نسبى فيه ناس بتحب تتعلم بالليل وفيه ناس بتتعلم بالنهار لكن انا شخصيا كنت بحب اتعلم بالليل اكتر
بذاكر كام ساعه : بردو مش هقول بذاكر هقوللك بتعلم كام ساعه انا بتعلم طول حياتى لكن لو تقصدى المذاكرة بتاعتنا انى امسك الصفحه واحفظها زى ما كنت بعمل فى العربى هقوللك انا بحفظ بسرعه ممكن تخلص حاجات كتير جدا فى 3 ساعات واعد فاضى باقى اليوم فى الوقت دة ممكن طلبه تانيه تعد10 ساعات على ماتحفظ لكن انا الحمد لله بحفظ بسرعه
اكتر وقت بحب اذاكر فيه والناس نايمه سواء بالليل بقى ولا بالنهار المهم تكون الناس نايمه والاغلب بيبقى بالليل
اكتر مشكله : هم مشكلتين واحدة مينفعش اقول عليها والتانيه انى ممكن وانا بذاكر اقرا السطر مثلا اول مرة محسش بحاجة تانى مرة وتالت مرة احس ان السطر بيشدنى لحاجة تانيه يعنى ممكن انسى الصفحه كلها وانسى انا ورايا ايه واعد ابحث على النت فيما يتضمنه السطر دة وبكدة احيانا مش بقدر اخلص كل حاجة لكن لو حصلت ممكن اسهر ساعتين ولا حاجة اخلص كل حاجة يعنى اقصد مشكلتى انى بدور كتير وانا بقرا
مكان المذاكرة : المطبخ
مووضوع اصحابى لا محدش بيشجعنى غير 2 بنت وولد بسسسسسسسسس مفيش حد تانى بيشجعنى غيرهم
هواياتى : احل رياضه كتسليه - العب بلياردو - شطرنج
طموحى : كتير يعنى مثلا نفسى الاقى علاج للسرطان - نفسى ابقى دكتور فيزياء نظريه او دكتور تحليل مركب ودة رياضه يعنى حلم بقى غريب شوية : نفسى اسرق بنك leumi زى ناجى عطا الله :P
اللى نفسى يتغير فى مصر : نفسى الناس تبطل تشتم فى بلدها - نفسى الناس تبطل تلبس قناع الدين - نفسى الناس تهتم بالعلم زى ماهم طول الناهر بيتكلموا فى الدين وبيفتوا فى الدين ونفسى الناس اللى مش متخصصين يبطلوا كلمه حرام او حلال - نفسى الناس يبقى عندها ضمير وصبر - نفسى الناس تحب بعض - نفسى نبطل نتكلم عن الغرب وكانهم هم العباقرة وكانهم هم شعوب الله ونحن الاغبياء الضعفاء - نفسى منقولش ان تعليمنا بايظ الا لما نخلى الطلبه اللى عندنا يحبوا التعليم الاول لان الطلبه مبتحبش التعليم - نفسى العدل ينتشر ونفسى نحترم اللى ينتقدنا وينتقد االاخر بس كدة
الحقيقه بقى معرفش اعضاء كتير هنا عشان اختار فاختاروا انتوا اللى تحبوووووه
شكرررررررا على موضوعكم الجميل