ازمة ثقة

[ابانوب ايليا]

اهلا بكم اخوتى الاعضاء

انا طبعا خلصت سنة تانية ورايح السنة الجاية سنة تالتة ثانوى بس عندى مشكلتين والتانية مترتبة على الاولى

المشكلة الاولى انى كل سنة مش بجيب مجموع كبير ومش بطلع فى الترتيب الا تقريبا مرة واحدة كانت فى تانية اعدادى يعنى انا فى 3 اعدادى جبت 285.5 من 300 وفى اولى ثانوى جبت 260.5 من 300 وفى تانية ثانوى جبت 227 من 260 .

صحيح ان بعض الدرجات بتكون اى كلام وبيكون فيه ظلم وان السنين اللى فاتت مش مقياس بس برضه ده بيخلينى مش واثق فى نفسى يعنى انا على سبيل المثال الميكانيكا السنة دى رغم تفاهة الامتحان جبت فيها 15 من 20 وفيه ناس مكنتش عارفة فيها حاجة جابت 18 و17 وتقريبا انا اقل واحد فى الناس الى هى من ال15 ومافوق فى الميكانيكا ومحدش جايب اقل منى غير الناس اللى هى بايعة القضية تماما ....

انا كل مادخل الموقع هنا واشوف مجاميع الناس اللى زيى فى تانية ورايحين تالتة بياجيلى احباط شديد ده غير المتفوقين اللى عندنا فى المدرسة اللى عددهم كبير وده بيخلى املى ضعيف جدا انى اكون ضمن ال10 الاوائل السنة الجاية.

وهى دى مشكلتى التانية ان ده سبب ليا ازمة ثقة ان انا اخترت انى ادخل علمى علوم السنة الجاية ونفسى وحلم حياتى ادخل طب بشرى بس حاسس انها صعبة جدا على واحد فى مستوايا علما انى السنين اللى فاتت مكنتش بذاكر يعنى كانت مذاكرة بسيطة وكنت مشغول كتير بالنت والكورة والكمبيوتر حتى فى اسبوع الامتحانات فهل لو شديت حيلى السنة الجاية وقطعت نفسى من المذاكرة حقدر احقق حلمى فى الكلية اللى انا بتمناها وانى اقدر اقتحم الترتيب فى ظل وجود طلبة عباقرة كتيرة فى مدرستنا اقل واحد فيهم احسن منى بكتير.. فهل اقدر؟ انا عندى امل فى ربنا انه يساعدنى ويكون معايا.