أنت مين؟ هل تعتبر نفسك شخصا؟ ايه هدفك في الحياه............

[3olomgy]

انا من صغرى بحلم بالعلم
وانا فى ابتدائى كنت عايز ادخل علوم عشان اكون عالم فلك زى كارل ساجان
لما دخلت اعدادى بدأت اتأثر بافكار الناس ...لازم تكون يا مهندس يا دكتور ؛ رحت سائلهم هى هندسة دى بتدرس ايه قالولى رياضة وفيزيا..طبعا ما صدقت لان انا كنت بعشق الرياضة و لازالت بعشق الفيزيا
فضل الهدف فى دماغى اثناء ثانوى بردو بس تشاء الاقدار انى ادخل علوم وانا الحمد لله سعيد جدا بده وحاسس براحة بال و يوم بعد يوم حبى للعلم وللكلية بيزيد
بالنسبة لهدفى فانا زى ما قلت كان نفسى ابقى عالم ...مؤمن اوى بالمقولة اللى بتقول ( هناك شىء واحد فقط صالح وهو العلم وهناك شىء واحد فقط طالح وهو الجهل ) .. شايف ان العلم هو الطريق الوحيد لاى تقدم او حضارة وعشان كده هدفى اصبح اسمى وابعد ..هدفى انى انشر العلم بين العامة ؛ اخرج الفيزيا من المعمل واخليها بين الناس .؛.فى الجامع ..فى الكنيسة..ع القهوة ..فى التليفزيون ؛ زى بالظبط ما اوروبا وامريكا عملوا ووصلوا العلم لحد السينما وابدعوا فى افلام الخيال العلمى ...نفسى الكتب العلمية تبقى فى ايد الناس كلها مش حكر على الناس اصحاب النضارات فقط.
عارف انى موهوم وان فيه ناس لمجرد سماع كلمة فيزياء او تكامل بتتخض او تتريأ ويكفى انى لما بقول لحد انى فى علوم بيبصلى نظرة شفقة وبيتعامل معايا على اساس انى فى مصيبة ويدعيلى بالنجاة
المهم كل اللى هعمله انى هسعى لهدفى بغض النظر عن الناس لانى مؤمن بيه اشد الايمان
بالنسبة لطريقة تحقيق الهدف فانا مش عارف هحققه ازاى ..بس ممكن الاول احقق ذاتى واكون عالم كبير - وانا اقدر على كده رغم السكة الطويلة - وبعدين اكون ثروة وبعدين افتح بالثروة دى مركز علمى كبير او جامعة خاصة بالعلوم فقط وتكون باجر رمزى ومالهاش شروط...ربنا يوفق
شكرا ع الموضوع