ملتقى طلاب الصف الثالث الثانوى (علمى علوم) 2014

[lally adel]

المشاركة الأصلية كتبت بواسطة وردة الأمـل

السـلام عليكم ... اناا فى اولى ثانوى لسه .. ومش عارفه داخله جروب تالتة ليه !!
بس قلت اشوفه كده لانى ناوية علمى علوم ان شاء الله
فانا قرييت كلامك وبجد عجبنى اووى بس عايزاكى تساعدنى وتقوليلى كنت بتعملى ايه
فى اولى لانى والله تايهة خالص لانها اول سنة ليا وكده وحاسه انى مش على بعضى
ومرتبكة كده ومش عارفه اذاكر ازاى وابدأ منين ...
فانا عايزاكى تساعدنى انا الحمد لله
جبت الاضواء عربى بس مش عاجبنى اووى فى الشرح بس اسئلته يعنى كويسه
والامتحان فى المواد الكيمياء والاحياء والتاريخ وكماان المعاصر فى الرياضه والفرنساوى
جبتله كتاب اسمه جينيال والانجليزى سنيور .. وده اللى المستر قال هاتوه .

بس انا عايزاكى بقى تقوليلى كنتى بتتعاملى مع اولى ازاى وبتذاكريلها ازاى
وكماان بتذاكرى امتى لانى لازم اروح المدرسه كل يوم وبرجع الساعه 1 ولا 2 وساعات بيكون عندى درووس يعنى اخرى الساعه 4 او 5 كده ,,, وبكون فاضيه طول الليل بس طبعاا فترة الليل مش بكون مركزة فيها اوى مش بعرف اذاكر فيها اووى مش عارفه اعمل ايه بقى ؟؟؟؟

اسفة لانى اتكلمت كتيير ورغيب بس اتمنى تساعدينى الله يخليكى
لانى نفسى ادخل طب ان شاء الله زى حضرتك كده ..

بصى بقى .. سنة اولى دى انا عايزاكى ما تستهيفيهاش اوى و ف نفس الوقت ما تشيديش فيها زيادة عن اللزوم .. خير الامور الوسط ..
خبطى فيها زى ما انتى عايزة بس دايما خلى عينك على المواد اللى انتى محتاجاها بعد كدة ف ثانوية عامة .. حاولى تطلعى من السنة دى عارفة المواد دى ايه طريقة مذاكرتها و اولها ايه و اخرها ايه و ايه محتاج خل و ايه محتاج حفظ كدة يعنى .. جيبي اخر كل مادة من المواد اللى انتى محتاجاها بعد كدة دى عشان توفرى وقت التجربة ف ثانوية .. تبقى طالعه عارفة كل مادة ايه اولها و ايه اخرها و عارفة هتعملى ايه ف كل مادة منهم ..
المواد التانية اللى انتى مش محتاجاها زى مواد الادبي مثلا حاولى ما تهمليهمش بس ف نفس الوقت ما تموتيش نفسك ف مذاكرتهم .. يعنى كتاب واحد فيهم كفاية اوووى عليهم .. ذاكريهم اول باول و حلى ع اللى ذاكرتيه و خلاااص .. مش اكتر من كدة .. ماتركزيش اوووى معاهم الا قبل امتحانات الشهر و كدة ..
اولى انا كنت واخداها بغشومية شوية و بتاعمل بجدية زيادة عن اللزوم .. و موتت نفسي ف مذاكرة الجغرافيا و التاريخ لان انا بستتقل المواد الادبي دى ف كنت بذاكرها كتير عشان اقدر احفظها و المها .. بس بعد كدة زعلت ع الوقت اللى كنت بضيعه فيها و هى مش مستاهله اصلا ..
انا مكنتش باخد دروس ف اولى و كنت معتمدة ع المدرسة و مذاكرتى الشخصية ف كنت برجع م المدرسة انام و اصحى اقعد اذاكر لحد ما انام عشان المدرسة تانى يوم و الجمعه و السبت الم فيهم اللى ناقص بقى ..
انتى بقى حاولى انك تظبطى مواعيد دروسك بحيث ان يتبقالك وقت ترتاحى فيه بعد المدرسة و الدرس و تذاكرى .. لازم كل يوم تاخدى حاجة حتى لو صغيرة .. حتى لو هتذاكرى درس واحد بس و لا هتحلى على حاجة واحدة بس .. المهم ان ما يعديش الاسبوع منك الا و انتى عاملة 5 حاجات على مدار ال 5 ايام .. و الجمعه و السبت بقى سيبلهم الشغل التقيل يعنى مثلا لو مذاكرة فيها حفظ او عايزة تركيز عالى دول تخليهم للجمعه و السبت ..
انتى ف الاول هتحسي انك تعبانة و ان الدنيا زحمة و عندك 7 مواد و كل مادة اد كدة خصوصا المواد المنتهية اللى هى بتاخديها ف ترم واحد .. بس بعد شوية - حاولى ماتخليش الشوية دول كتير - هتتعودى ع النظام و ترتبي نفسك و تظبطى مواعيد نومك و صحيانك ..

و لا يهمك يا حبيبتى ارغى براحتك .. و اسئلى ع اللى انتى عايزاه

ربنا يقويكو