اسمع حقيقة الclinical فى صيدلة عين شمس

[Dr. akram]

اليوم كنت فى كلية الصيدلة جامعة عين شمس لان موعد الكشف الطبى كان لى هناك اليوم.
و قابلت طلاب كثيرين منهم من طلع بتقدير امتياز و جيد جدا و جيد ,, عادى زى اى كلية و قابلت طالب يسمى مؤمن فى سنة اولى او بمعنى اصح طالع سنة اولى( ملحوظة : سنة اولى هى السنة اللى بعد اعدادى) و سألته عن كل حاجة عن صيدلة عين شمس و الحقيقة الطالب كان فى منتهى الزوق و جاوبنى على كل حاجة و انا كمان حبيت اقولكوا هو قال لى ايه عشان نبقى كلنا على نـــــــــــور قبل دخولنا الكلية.

1- الفيزياء كثيرة فى الصيدلة و على اكثر من ترم و بتدرس فى علوم و كمان فيه دكاترة كتير من علوم بيجوا يدرسوا لنا.
2- الرياضة بداية من الترم الاول و منها ما هو من رياضة 2 و آخرى رياضة باحتة .
3- حقيقة اول شهر هتجد نفسك مش فاهم اى حاجة و ده شئ طبيعى جدا و لازم تقاومه بانك تذاكر حتى و لو مش فاهم و ما تفوتش رمضان منك حتى العشر ايام دول لان اليوم بيفرق معانا و ذاكر طول ما انت مش فاهم لان طبيعة الدراسة هناك بالانجليزى و الدكاترة طبعا كلامهم معظمه انجليزى و الدراسة نفسها كلها انجليزى و لاتينى كمان فده بيسبب صدمة لبعض الطلاب و بيفتكروا انه لا يمكن انهم يفهموا المواد دى لكن الحقيقة بتتفهم بدون ما الواحد يحس ( سبحان الله ) الكلمة دى انا قولتها قال لى فعلا دى لازم تصدقها .
و طبعا الحمد لله انه قال لى كده و هو الطالب ده كان جايب جيد جدا و قال لى لولا انى لاقيت اللى قال لى النصيحة دى كان زمانى ((اعوذ بالله )) ..
4- الكلية رغم انك هتحس بصعوبة الترم الاول لانه حاجة جديدة عليك الا انك هتحب الكلية لان الدكاترة محترمين و متجاوبين مع الطلاب و متواضعين.
5- السكاشن تبدأ من الساعة 8 صباحا و مادامت 8 يبقى 8 ما فيش تأخير اما المحاضرات فهى 8 صباحا برده لكن ممكن تتأخر نص ساعة و لا ســــــاعه.
6- ليك يوم اجازة فى الاسبوع حسب ترتيبك بالحرف الابجدى بخلاف الجمعة و ده فى الترم الاول اما فى الترم التانى فاحتمال ما بيبقاش فيه يوم اجازة لانهم بيوزعوا المواد على الستة ايام عشان تبقى اخف على الطالب.
7- اخيـــــــــــــــرا : عن ال CLINICAL PHARMACY
للأسف الاخ احمد بتاع اسكندرية قال كلام منه الصحيح يشكر عليه و منه الخاطئ لكن عموما يشكر و الصحيح اللى قاله هى وظيفة الصيدلانى الاكلينيكى لكن نظام الدراسة بمجرد دخول الطالب صيدلة اى جامعة غير جامعة عين شمس و جامعة تانية ماكنش متذكرها هيدرس مواده عادى اما ذلك القسم يدفع عليه فلوس و هو مبلغ 11000 جنيه فى جامعة القاهرة يعنى مش 13000 , اما فى صيدلة عين شمس هناك 10 اقسام لكن مش معنى كده انك هتختار قسم تتخصص فيه لأ , ده ممكن تعمل فيه دبلومة التى تعادل الماجيستير و دى مش بتفرق حاجة فى الوظيفة خالص ده للزيادة فقط لذلك فالصيدلة الاكلينيكية كأى قسم فى صيدلة عين شمس يمكن ان تؤخذ فيها دبلومة مثلما يمكن ان تأخذ دبلومة ORGANIC , و لكن فى عين شمس قسم الاكلينيكال ببلاش بس و انت مش بتدرسه فى سنة تالته و رابعة بس لأ , ده انت بتدرسه من اعدادى و منه علم الانسجة و علم التشريح و لذلك فالعشرة اقسام بتدرسهم على الخمس سنين دراسة يعنى انت يا خريج صيدلة عين شمس انت بتتخرج صيدلى عادى مع صيدلى اكلينيكى يمكنك ان تتوظف باى منهما حسب و فرة العمل ,, بس هى دى كل حاجة عن الاكلينيكال....
أرجو انكوا تكونوا استفدتوا من اللى انا كتبته و يا رب ما حد يتعقد لان كان من باب اولى اتعقد انا بس لما تبقى داخل على نور انك شئ عادى جدا و مش انت لوحدك اللى مش هتبقى فاهم هيبقى الامر EASY و ان حتى اللى ايه مش هيفهم يبقى خلاص عادى جدا و ربنا يوفقنا كلنا ...