عادى والا عاديه .... حرامى والا حرامية

[بورسعيدى]

عادى والا عاديه .... حرامى والا حرامية
فى يوم عادى ,فى بيت عادى,اتولد طفل عادى ,ابوه اب عادى,وامه ام عاديه.
وعشان كل الظروف العاديه,قالوا نسمى الواد عادى.

وسموه عادى.
وعاش عادى طفوله عاديه.
كبر عادى,خلص الابتدائيه والاعداديه,وكان برضه عادى,بس كان حاسس ان كل حاجه حواليه عاديه اوى,وقال ليه لا ما اخليش العادى ولو لمره مش عادى؟؟؟؟؟؟؟؟

قال لباباه ولمامته: انا هطلع الاول على المدرسه,لا على الجمهوريه كلها.
الاب والام بصوا لبعض وقالوا: بس انت تنجح, المهم تعدى وتخلص دراستك وخلاص,يا ابنى لا اول ولا اخر بقى بينفع.

بس عادى قال لا انا هبقى الاول,دايما الاول وبكره تشوفوا.

وزاكر عادى,بس كل انا يفكر انه هيكون الاول,يفتكر" لا اول بينفع ولا اخر بقى ينفع" يتهد ويبطل مزاكره.
وهكذااااااااااااااا........
ونجح عادى فىالثانوى نجاح عااااااااااااااادى.

قال لاصحابه: كل اللى فات مش مهم المهم اللى جاى,انا هزاكر وهتفوق وانجح,وهكون اول دفعتى وابقى معيد وبعدين دكتور,وهعمل وهعمل وهعمل................
بصوا اصحابه لبعض وصحكوا وقالوا:
ماتروح تعمل شاى احسن من الكلام ده اللى لا يودى ولا يجيب,يا ابنى معيد ايه ولا دكتور ايه,يا شيخ روح,دا انت عادى ابن عادى وكل عيلتك عادى فى عادى,هتعمل ايه انت يا سى عادى بين اللى عايشين عيشه مش عاديه,ولا اهليهم ناس عادين,والنبى اقعدلك فى جنب.

وقال عادى لا انا لازم ابقى مش عادى.

وكالعاده يفتح عادى الكتاب,يفتكر البوقين اياهم,تتقفل الدنيا فى وشه,ويغمق لون الحياه.

واستسلم عادى.

والعادى,ان عادى فضل عادى واتخرج وهو عادى.

قال بس مستقبلى فى الشغل,فى مشروع اعمله.


اهله واصحابه سمعوا,الدنيا قامت ما قعدتش,

انت اتجننت,مشاريع ايه وكلام فاضى ايه ,دور على شغل ثابت فى الحكومه,حاجه مضمون,ال مشروع ال,ولو فشل هتبقى تعمل ايه,تندب ولا تقف على النواصى تلقط رزقك.

وكالعاده اتهدت كل احلام عادى.
ورضى بالشغل العادى.

واتجوز عادى بنت عاديه, وعاشوا فى بيت عادى.
قال عادى لمراته نفسى اشوف اللى مقدرتش احققه لنفسى فى ولادى,هربيهم واعلمهم واديهم الحريه فى قرارتهم,عايز ولادى يكونوا......ويكونوا............
اما مرات عادى,فبعد ما سمعت الكلمتين,بصتله وكانه ما سمعتش حاجه,قالتله, الا ما درتش مش جارتنا ساميه سابت البيت؟؟؟؟؟؟؟؟؟؟؟

خلف عادى,وبدا يربى ولاده بالطريقه اللى هو عايزاه,و بداوا يكبروا,وبدات الخلافات بين عادى وبين عاديه مراته تزيد ,وكل يوم نفس الاسطوانه:
انت اللى هتبوظ العيال دول,انت لا ترحم ولا تسيب رحمه ربنا تنزل,انت هتخيب املهم,ال حريه ال.
ومش بس كده,دى لمت العيله وعيله العيله,وكل على دماغ عادى.
وعادى يقول: لا,انا لازم اعمل حاجه,مش هسمح بجيل تانى من العاديين.

وكالعاده,استسلم عادى,وقفل على نفسه,وقال مالها الحياه العاديه,انا هعيش عادى وهموت عادى.

وعاش عادى ومات عادى,ولا حد خد خبر بوجود عادى,ولا بموت عادى.
اصله عادى.

وعادى ضحيه,زى ما كتير مننا ضحيه,لحرامى, لا مجموعه حراميه,ولو ان مش قصدهم يكونوا حراميه.
عرفت الحراميه؟
يا ترى اتسرقتوا كام مره؟
ويا ترى هنقضيها عادى وعاديه؟؟؟؟؟؟؟؟

يا خوفى منك انت وهى