نفسي انسى امي

[أحمـدنجـم]

أول مرة اتمنى انساكي
امسح صورتك م الأحلام
وامر قلبي ينسى هواكي
يمكن تقدر عيني تنام
عارفة انا ليه بتمنى انساكي؟
اصلك غبتي عني خلاص
كل ما افكر اني هلاقي
زيك حب ما بين الناس
زيك احساس
اسند راسي
القى الصدر حجارة وقاسي
القى الحب كلام اوهام
علشان كده بتمنى انساكي
يمكن تقدر عيني تنام
نفسي اقولها لحد يا أمي
نفسي في حد يحس بهمي
كلمة ماما
زي المية في حضن غمامة
زي جناح رحمة في حمامة
كلمة ماما
ياما وياما
كنت صغير وهي بتكبر تجري في دمي
كنت صغير واكبر اكتر روحها تسمي
كلمة ماما
اغلى من اختى اخويا مراتي خالي وعمي
لسه بقولها قبل ما نام
يمكن تقدر عيني تنام
نفسي انساكي اصل رجوعك شيء ممنوع
مش هتجيبك ليا دموع
ولا معجزة الله ليسوع
حبك حب الفطرة يا امي بعدك كل الحب كلام مصنوع
علشان كده بتمنى انساكي
وامسح صورتك م الأحلام
يمكن تقدر عيني يا أمي
في حضن الدنيا القاسية تنام
نفسي انساكي