شوية ملاحظات ونصايح مهمة جداً للمقبلين على الثانوية الأزهرية

[سيف-الاسلام]

بسم الله الرحمن الرحيم
السلام عليكم ورحمة الله وبركاته

كيف حالكم أيها المقبلين على الثانوية الأزهرية؟

أرجو أن تكونوا بخير.

اليوم أنا معكم بشوية ملاحظات هامة وشوية نصايح مهمة على قد تجربتى:

أولاً: هقوللكم ان اللى يعمل بالملاحظات والنصايح دى بإذن الله هيكون من الأوائل على الجمهورية.
ثانياً: سؤال سيطرح نفسه: طب انت يا سيف الاسلام ما طلعتش من الأوائل على الجمهورية ليه؟
أقوللكم: أولاً أنا بحب أذل نفسى شوية علشان ما تتكبرش على حد فكنت بدعى ربنا انى أجيب مجموع حلو بس ما أطلعش من الأوائل أبداً.
وثانياً إنى ما عملتش اللى عليا وما عملتش كل الملاحظات دى وكانت نيتى بها بعض السوء وغششت الولاد فى مادة الصرف فكانت جزاتى انى لازم أنقص لأنى ما عملتش اللى عليا.

تعالوا بينا بقا نشوف الملاحظات والنصايح اللى انا استفدتها (وطبعاً كما تعودت أن أقول: التجربة الواحدة لا تكفى لاثبات نظرية)

أولاً: انت عايز فى الثانوية الأزهرية تدخل تحل فى الامتحان وتجيب النهاية وبس. وبعد كده تبقى تذاكر اللى انت عايزه فى أى سنة تانية.
فتعالوا بينا ناخد المختصر المفيد فى الثانوية الأزهرية.

نمسك مادة مادة:
- القرآن الكريم:
الامتحان التحريرى: دا بقا مكشوف أوى فى الأزهر ومحتاج جهد بسيط علشان تجيب النهاية فيه. ازاى يعنى؟
أقلك ازاى؟
الامتحان التحريرى عبارة عن أربع أسئلة:
السؤال الأول والثانى فى المنهج: وطبعاً واحد عاوز يتفوق لازم يحفظ المنهج زى اسمه.
السؤال الثالث: ودا يستحق يبقى فى الماضى كله ولكن هو بيبقا دايماً فى:
1- أول البقرة لغايت المنهج (ودى بتبقا نقطة من السؤال)
2- آل عمران كاملة (ودى بتبقى نقطتين من السؤال)
يعنى مطلوب منك للسؤال الأول والثانى والثالث: حفظ سورتى البقرة وآل عمران.
نيجى للسؤال الرابع: السؤال الرابع ده دايماً بيبقا فى أوائل السور ودايماً تلت آيات أو خمسة: فحضرتك هتمسك القرآن من أوله لآخره وتحفظ أول خمس آيات فقط من كل سورة. أكد عليهم وبلاش تزود عن كده علشان ما تنساش الخمسة دول.
وخد بالك دايماً بيجيب سورة من السور اللى فى السؤال الرابع من السور اللى بتبدأ ب "حم"
فخد بالك من السور دى واوعى تتلخبط فيهم لتضيعلك درجتين.

يعنى مطلوب منك تحفظ البقرة وآل عمران ومطلوب منك كل يوم تحفظ خمس آيات من أول السورة.
كل يوم تحفظ خمس آيات من أول سورة
فف100 يوم هتلاقى نفسك خلصت أوائل سور القرآن .
وترجع تعيد عليهم.
كده يبقا ضمنت بإذن الله الامتحان التحريرى فى القرآن الكريم.


- الامتحان الشفوى: دا بقا مشكلة صعبة جداً: لأنها تتوقف على تقدير الأستاذ لك. ولكن تعال ناخد بردوا شوية ملاحظات عليه.
لو دخلت لأستاذ وسألك: حافظ ايه يا ابنى أو يا بنتى؟
وانت طبعاً ممكن تكون مش حافظ القرآن كله أو حافظه بس مش حلو (ودا غالب الطلبة)
انت بقا ترد على الأستاذ وبثقة وتقوله: حافظ القرآن كله بإذن الله تعالى يا أستاذ.
أهم حاجة الثقة فى النفس. اوعى تنهز قدامه.
ولو سألك تانى: متأكد يا ابنى؟ قله بثقة: متأكد طبعاً يا أستاذ.

وبعد كده هيسألك وأسئلة الاساتذه دول هتبقا على قسمين:
فى أساتذه: يبدأ يسألك فى كل سورة من سور القرآن (وطبعاً حضرتك هتجاوب فى سورة آل عمران والبقرة وأوائل السور لأنك حافظهم للتحريرى وغير كده مش هتجاوب)
مش مشكلة اوعى تنهز. وصدقنى لو سألك فى كل سورة من سور القرآن يبقا هيديك النهاية حتى لو ما جاوبتش الا فى البقرة بس.

وأهم حاجة انك ترتل وانت بتقرأ. وتقرأ بثقة عالية فى نفسك. واوعى تقول للأستاذ كلمة غلط أو كلمة استعلاء أو تكبر.

وفى أساتذه: يسألك فى المنهج وبس. ودا تخاف منه جداً. ممكن يديك تسعة من عشرة. والدرجة دى هتضيع منك كتير.

وممكن الأستاذ اللى بيمتحنك مش يسألك: حافظ ايه؟
ودا تخاف منه جداً لانه تقريباً وغالبا دا بيحصل: هيحط للجنة كلها درجة واحدة. ييحط للكل عشرة ، ييحط للكل تمانية أو تسعة.

ربنا يوقعك فى واحد من اللى بيسألوا فى السور كلها بس يديك النهاية. آه هيتعب أعصابك لكن هيديك النهاية.

وواحد منكم هيخطر فى باله سؤال ويقول: طب يا سيف الاسلام انت ناقص فى الشفوى درجتين ليه؟
هقله: أنا ناقص لسبب: ان الأستاذ اللى كان بيمتحنى كنت متخانق فيه يومها.
جه قالى: غشش الواد اللى جنبك. قلتله: لأ.
قالى: دا جزاتنا اننا بنساعدكم وفى الآخر تعملوا فينا كده.
قلتله: جزاتكم طبعاً لأن دى مش شكل لجنة ولا دول شكل مراقبين وهتتحاسبوا على كده يوم القيامة واعمل اللى انت عايزه يا أستاذ. أنا ما بخافش إلا من ربى.

خلصت اللجنة طلعت رحت الشفوى لقيته فى وشى.
هو ادانى 8 علشان انا كنت حافظ والحمد لله مفيش سؤال مش جاوبته مع انه سأل فى كل سورة من سور القرآن.
ولكن نقصنى درجتين علشان قليت أدبى عليه.

فنصيحة منى: سايسهم وتعامل معاهم حلو.
وتصدقوا انى بتكلم معاهم حلو خالص بس اليوم ده زعقت فيه لأنى كنت فى الامتحان وفى حتة شاكك فيه وخايف لتطلع غلط فكانت أعصابى تعبانة وهو جاى يقلى: غششه.

ثانياً: التفسير:
دا بقا يا أستاذى ويا أستاذتى بيسموه عندنا: بعبع الثانوية الأزهرية.
ولكن أنا اكتشفت انه اليف جداً وطيب وزى العسل وفيه علم كتير جداً.
بس عاوز شوية تنظيم ويكون التنظيم ده من أول السنة. علشان ما تتزنقشى فيه فى آخر السنة زيى.
تنظيم ازاى يعنى من أول السنة؟؟؟؟؟
أقلك: كتاب التفسير فيه حاجات كتيرة ممكن تلخبطك فى الامتحان حتى لو مذاكره وحافظه زى اسمك. بس هتتلخبط.
فهنعمل حاجة لطيفة ظريفة:
هنجيب من أول السنة دستة ورق فلوسكاب (الورق الكبير المسطر)
وهنكتب فى ورقة منهم من فوق:
تجميع لآراء الجمل فى كتاب التفسير.
وتروح جاى عامل جدول كاتب فى الخانة الأولى منه اسم السورة (ما انت عليك سورتين فى العلمى)
وفى خانة تكتب رقم الفقرة أو الدرس يعنى (لأن المفروض فى الامتحان انك هتتذكر حتى شكل الدرس)
وفى خانة تكتب الآية اللى الجمل ليه رأى فيها.
وفى خانو تكتب رأيه فى الآية.

وهكذا.
وملاحظة هتلاقى رأيين للجمل فى سورة محمد.
خد بالك من الرأى الصغير اللى الناس بتنساه ده.

ونجيب ورقة تانية ونكتب فوق: تجميع لآراء القرطبى.
وتجمعهم زى الجمل

وتجيب ورقة تالتة ونكتب فوق: تجميع لآراء الطبرانى.
وتجمعهم.

أما عن الكشاف فآرائه كتيرة وصعب ان يجى فى الامتحان يقلك هات رأى الجمل فى الآية دى ويسكت من غير تبيين ولا توضيح.

أما الجمل والطبرانى والقرطبى فبيجى فى الامتحان يحطلك آيات ويقلك: ما رأى الجمل فى هذه الآيات؟
وانت تقعد تعصر فى ذاكرتك عن أول كلمة من الراى. ولو حد قالهالك هتكمل.
لكن مش هتلاقيها فى ذاكرتك أبداً.
لكن لو عملت زى ما انا بقلك وجمعت آرائه فى ورقة وراجعتها ليله الامتحان. هتدخل الامتحان أسد.

وتجيب كمان ورقة رابعة تكتب فيها: المقصود من قول الله تعالى " الذين كفروا"
هتلاقى فى السورة كذا " الذين كفروا" وكل واحدة وليها مقصود.
فتجمعهم علشان ما تتلخبطش.

وتجيب ورقة خامسة وتكتب فيها: اعراب الفاءات.
لأن هتلاقى عندك كذا فاء فى السورة وكل واحدة ليها اعراب (واحدة للترتيب والتانية للعطف وكده يعنى)

وتجيب ورقة سادسة وتكتب فيها : اعرابات ومعانى بتلخبط فيها.
اكتب كده فوق.
وتكتب فى الورقة دى الحاجات اللى حضرتك حاسس انك ممكن تنساها أو تتلخبط فيها.

وممكن تلاقى مثلاً فى تجميع الطبرانى أو القرطبى أو غيره هياخد أكتر من ورقة.
فمن البديهى ومن غير ما أقول: هتجيب ورقة كمان وتكمل فيها وبعدين تدبسهم فى بعض.

وطبعاً: التفسير علشان تضمن فيه النهاية لازم يتحفظ بالنص. اعتبر اللى بيصحح ما بيفهمش وحطها بالنص ليه فى ورقة الاجابة علشان مش يبقى ليه حجة.
حتى المعنى العام للآية او شرحها يعنى. دا يتحفظ برضوا بالنص.
احنا عاوزين أى درجة.
ومش عاوزين مصحح غبى ينقصنا درجة ولا درجتين لأنه مش فاهم حاجة.
تصدقوا والله فى التفسير ده كان بيبقا هاين عليا أكتبله رقم الصفحة كمان.


أكملكم المواد التانية بعدين لأنى ورايا شوية مشاغل.
تابعوا معى فى هذا الموضوع.
وأظن انى بتكلم بأسلوب سهل جداً.
أسلوب لم اعهد أن أتكلم به قبل ذلك.
ولكن لا أعرف لماذا أتكلم به معكم؟
فسامحونى على ذلك الأسلوب العامى.

وبإذن الله لنا عودة ومع باقى المواد.