أسرار.......البنات!!!؟؟!!

[thedentistmod]

المشاركة الأصلية كتبت بواسطة أحمد2025

ــ (( السلام عليكم ورحمة الله وبركاته )) ــ

أزيكم يا جماعة عاملين ايه؟ يارب تكونوا بخير وفى الجنة جميعا ان شاء الله
مش عارف بقى ياجماعة أنا ليه الحق ان اكتب موضوع زى ده ولا لا, بس عامة انا مش بحب اسيب حاجة فى قلبى ومبقولهاش,ولو انا أخدت فرصه فى المنتدى حقيقى هكتب حاجات كتير قوى

كتير ياجماعة أنا بفكر,بفكر فى البنات,بفكر ازاى عايشين؟ ازاى هما مستحملين الدنيا كده؟ ازاى العادات والتقاليد دمرتنا قوى كده؟؟
مش عارف لغاية دلوقتى انا ايه فى دماغى اكتبة بس انا عايز اقول ان البنات اتظلموا قوى فى مجتمعنا
مش عارف بس ممكن يكون أنا متأثر بحاجات بتحصل للبنات فى المجتمع علشان كده انا بكتب الموضوع
بيبقى فى ضغط وتوتر قوى على البنت من المجتمع نفسه
فى بنات كتير قوى هتفهم الموضوع من أول سطرين أنا كتبتهم فوق بس أنا مش عايز أدخل فى تفاصيل علشان....
يا جماعة مجتمعنا وحش قوى
يعنى ايه بنت تبقى ماشية فى الشارع وهى خايفة؟؟ يعنى ايه بنت تغطصب من عالم زبالة وهى ملهاش ذنب؟؟
يعنى ايه بنت لما تعدى 20 سنة ومتخطبتش تقوم القيامة عليها؟؟ يعنى ايه بنت تبقى حيتها كلها لغاية ما تجوز خوف وقلق وتوتر؟؟ يعنى ايه بنت لما تنجرح من حب مبتبقاش عايشة بعد كده؟؟ يعنى ايه بنت لازم تتجوز أى حد وخلاص علشان يتستر عرضها؟؟
أسئلة كتير قوى ياجماعة بتيجى فى دماغى أشد من دى بمراحل فى معناها
أنا أصلا مش عارف أنا كتبتب الكلام ده ليه؟؟
بس هو ممكن يضايق ناس كتير ,بس ممكن يكون حبيت أعبر عن حاجات بتواجهة البنات
ياريت حد يقولى أنا غلطت لما كتبت الموضوع ده؟؟؟
وبرضه حاسس ان الموضوع ده ممكن يتذف كعادة مواضيع 2025
والسلام عليكم ورحمة الله وبركاته

اولا انا ولد و لكن نفس الكلام اللى انت بتقوله ده بيجى فى دماغى
خلينا نعترف ان احنا فى بلادنا بنحكم بمعايير شرقية بالية غاية فى العبثية و لا علاقة لها بالدين و انما هى تنبع من موروثات شعبية لا يقبلها الدين
خد عندك موضوع ال****** و خيبة المجتمع اللى بيبص له بصورة مضحكة جدا و يحول الضحية الى مذنبة و الى مسئولة عن الذى حدث و يختلق اعذارا وهمية للقيام بهذه الفعلة الشنعاء و يقولك اللبس كان مفتوح و مع التاكيد على رفض الملابس المثيرة الا ان هذا فى النهاية ليس دافعا لهذه البشاعة باى صورة من الصور
خذ مثلا اخر مثل قضية تاخر الزواج و العبثية فى نظرة المجتمع لهذه القضية و تحديد سن الزواج بانه لا يزيد عن 25 سنة و ان من تجاوزته هى سيدة بائسة و لو كانت ناجحة فى كل شىء و فى عملها غير ان هذا يدفع بالمجتمع الى تجاهل كل شىء و النظر اليها على انها زى البيت الوقف و الكلام الفارغ ده

[أحمد2025]

المشاركة الأصلية كتبت بواسطة pureheart

مش متفقة معاك
يعنى مثلاً انا لما بمشى فى الشارع
ما بحسش ان انا خايفة الا نادر
و كمان موضوع ال****** اعتقد ان البنت
لو باينة انها خاية فدة
بيشجع الكلاب عليها انما لو ماشية و هى واثقة
من نفسها محدش حيقربلها و اتمنى تكون فاهم قصدى
و موضوع الجواز بيختلف ياختلاف المكان و التفكير بتاع الاهل
و معتقدش ان الموضوع بيوصل لدرجة القلق و الخوف
مش فاهمة قصدك فى ان البنت
لما تنجرح من حب متبقاش عايشة يعنى ازاى
ومعلش بردة مش فاهمه قصدك فى ان البنت لازم تتجوز عشان تتستر على عرضها

بصى انا ممكن اكون متفق معاكى سنة بسيطة فى اول نقطتين
مع انى برضه مصر ان الكلام ده ملوش علاقة بالثقة
بس فى النقطة التالته
انا مش قصدى ان البنت بتموت بعد الحب
لكن البنت اللى بتحب حد بجد بيأثر عليها نفسيا بعد كده لما يفركشوا
وبالنسبة للنقطة الرابعة انا افضت فيها كتير فى الردود السابقة
شكرا على مرورك

المشاركة الأصلية كتبت بواسطة cool heart

احم
انا اللى مش فاهمه

والثقه دى هتجيبها منين
وبعدين انتى بتبقى ماشيه فى الشارع مش خايفه زى مانتى بتقولى
ده شىء مش طبيعى ع فكره
يأما انتى بتلعبى تايكوندو
يأما فى حاجه غلط
العمليه مش عمليه كلاب وقطط
ومش ثقه او خوف
انتى ردك نفسه فى الجزئيه دى
بيفكرنى بسؤال
مين اللى جه الاول البيضه ولا الفرخه ؟؟
والمشكله ان سؤال ملوش جواب
لانها حلقه مفرغه
لا البيضه اللى جت الاول
ولا الفرخه هى اللى جت الاول
نفس الحوار هنا
لا الكلب بياكل القطه
ولا القطه هى اللى خلت الكلب ياكلها عشان هى خايفه
هو شعور طبيعى
بالافتقار للامن
نتيجه لوضع طبيعى بردو
وهو ان فعلا مفيش امن !!
وابسط مثال يثبت خطأ وجه نظرك
كان فى مجموعه من رواد الفضاء الروس
ومعاهم واحده من دوله تانيه
المهم طبعا معرفوش يتحكموا فى نفسهم وانتهكوا عرض الرائده دى
هل دول ناقصهم علم ؟
لا طبعا
بس اللى ناقصهم دين
احنا كذلك ناقصنا الدين
***
يعنى العمليه مش عمليه واحده واثقه او مش واثقه
اصل هتثق فى ايه
واحد شارب مخدرات ومشي بالصدفه فى نفس الشارع اللى هيا مروحه منه
***
الراجل مش بيبص للست ع انها عقل بيفكر وانسان بيحس
بينظرها بمنظور تانى

لا بتوصل ولاكتر من كده كمان

وبتكلم ع البلد دى
بتوصل انهم هيوافقوا ع اى عريس
المهم يشيل ع رأى أنون فى صاحب صاحبه ولا كان اشرف عبد الباقى
بتوصل ان بيتبص للاخت ع انها معيوبه
ع اساس انها زى السلع كده بالظبط
بدام فضلت للاخر يبقى السلعه دى فها حاجه غلط
وفى الارياف الكل بيعتقد انها معملها عمل لاخر كل ده من الهبل

يلا ماعلينا
شكرا ع الموضوع يا حاج احمد

تقريبا ده خير رد بالنسبة ليه على الرد اللى قبليه
نورت يا معلم

المشاركة الأصلية كتبت بواسطة dr_toka

شكرا ليك للموضوع ولصراحتك كمان
عندك حق فى كل اللى حضرتك قولته
بس مين يفهم ويقدر بقى

فعلا مين يفهم ومين يقدر

المشاركة الأصلية كتبت بواسطة the philosopher

أنا قريت أول مشاركة فى الموضوع ولسه مش قريت باقى المشاركات
بسجل متابعتى للموضوع وان شاء الله أرد لما أقرأ كل المشاركات بس مش دلوقتى
بعدين ان شاء الله
فى رعاية الله

فى انتظارك ان شاء الله

[أحمد2025]

المشاركة الأصلية كتبت بواسطة The Philosopher

بسم الله الرحمن الرحيم
ان شاء الله أبدأ أرد من المشاركة الأولى دى وبعدين أشوف بقية المشاركات

لا أكيد طبعا مش غلطت
دا أنا حتى غيرت اللون اللى بكتب بيه عشان يكون ردى واضح
فى رعاية الله
وعليكم السلام ورحمة الله وبركاته

على فكرة انا معظم حياتى عشتها فى الريف برضه
انا ممكن اكون اسأت التعبير فى أخر سؤال او حاجة
بس مش معنى كده ان البنت بالمطلق مش مظلومة فى مجتمعنا

[quote=pureheart;1526928]

المشاركة الأصلية كتبت بواسطة بنوته اهلاويه

لا انا و لا بلعب تايكوندو و لا حاجة
بس انا لما قولت يبقى عندها ثقة كنت اقصد انها متبقاش مبينة انها خايفة و اى حد يبصلها يبان على و شها الخوف و الرعب
مهو ده اللى بيطمع الكلاب فى البنات انهم عارفين ان البنت من دول بتتكسف و بتخاف و ملهاش وسيلة عشان تحمى نفسها بيها
يعنى انا مثلاً كنت لما بنزل اروح الدروس و روح بليل كنت بعمل حاجة عشان مبقاش ماشية خايفة كنت باخد معايا برفان صغير ( طبعاً مش عشان احطة ) عشان لو اى حد حسيت انه فيه حاجة ارشه فى وشه و اجرى و الحمد لله مستخدمتوهوش
و الحقيقة انا مش بتكلم على اللى شارب مخدرات انا بتكلم على الشباب العادى
اما موضوع رواد الفضاء فدول ناس فى مكان مغلق و معاهم واحدة بطولها و مش ديه الحالة اللى انا اقصدها انا اقصد البنات اللى ماشية فى الشارع او اللى فى الجامعة

انا قولت ان الموضوع بيختلف باختلاف الثقافة و الحقيقة انا معرفش اللى بيحصل فى الريف كويس فمقدرش احكم عليهم انما اعتقد ان الكلام بيختلف فى المدن و انا شايفة ان اللى يبص للبنت على انها سلعة و بتتعرض عشان تلاقى عريس يبقى لسه عايش فى العصر الحجرى و يبقى رايه ميتخدش عليه و لازم البنت تبقى عارفة انها مش سلعة و لا انها هم و لازم يتخلص منه و يبقى ليها رايها فى موضوع جوازها

مش عارف
بس برضه موضوع البرفان ده مش وسيله اطلاقا
يعنى كل بنت هتمشى فى ايداها برفان
طيب افرضى 3 عيال قبلوها
لا بيتهيألى موضوع الجواز ده لسه موجود ان البنات يكونوا عايزين عرسان
بدليل العنوسة ناو كبيرة بطريقة رهيبة

المشاركة الأصلية كتبت بواسطة pureheart

بص يا فارس
انا ملغتش موضوع ال****** و انا كلامى على ان (البنت فى الشارع مش بتبقى حاسة بالامن ) و انا شايفة ان الموضوع مش للدرجاتى و لو قلنا ان فى كل وقت البنت بتبقى خايفة يبقى معنى ده ان الولاد كلهم فاسدين و ده كلام مش صح و فى حاجة مهمة ان الولد فى اى مكان لو حس ان البنت خايفة يبقى ممكن يئذيها و الحقيقة ده مش كلامى انا سمعت مرة دكتور نفسية بيتكلم على موضوع ال****** و بيقول ان المغتصب لما يحس ان الفريسة خايفة ده بيشجعه و لو حاس انها قوية و و مش خايفة بيبعد عنها
اتمنى اكون قدرت اوضح وجهة نظرى

وجهة نظر برضه

المشاركة الأصلية كتبت بواسطة shren

والله حضرتك صريح واحنا فعلا لازم
نناقش القضيه دى
فعلا ليه البنت تمشى فى الشارع وهى خايفه
عشان مافيش امان طيب ليه ما يبقاش مافيش امان
انا بجد سعيده انا ولد هو اللى بيتكلم فى الموضوع داه
احنا لازم نحس بمشاكل بعض
لك اجمل تحياااااااااااااااتى

ربنا يخليكى
ثانكس جدا ع المرور الرائع

المشاركة الأصلية كتبت بواسطة حوراء الجنة

شكرا جدا علي الموضوع علي فكرة الموضوع
حلو اوى بس البنات مش مظلومين في كل الاماكن
لاننا في المدن عايشين حياتنا الحمد لله طبيعي الاختلاف في الخروج يعني مش زى الشباب عندهم
لكن الاصعب انه في بنات في مناطق معينة مش
بيخروجوا بعد ال6 سنين تصوروا
البنت مش بتتعلم لكن لو عايزة تتعلم بيجيبولها مدرسين في البيت حاجة تخنق صح
بس بجد الموضوع حلو

شكرا على المرور
ويارب يكون الموضوع عجبك

المشاركة الأصلية كتبت بواسطة فجر الإسلام

غلطت ازاي بس لما عملت الموضوع ده
بالعكس دي حاجه كويسه جدا ان ولد يكتب الكلام ده
ويبقى فعلا حاسس بالظلم اللي واقع عالبنات
لان الغالبيه بيلقوا اللوم عليها في كل حاجه وبيطلعوها غلطانه
ممكن البنت تبقى ماشيه في حالها وباحترامها وبرده تتعاكس
طب ايه ذنبها في كده

انا بشكرك عالتوبيك الجميل ده

لازم المجتمع يتغير
او الناس اللى فى ثقافتهم تتغير
شكرا على مرورك الطيب