«-.¸¸,.-~*دروس دورة فن الطهي مع الأخت أحلام مفقودة *~-.,¸¸.-»

[أحلام مفقودة]

ازيكم ياحبايب قلبي
يارب تكونوا كلكم بخير وبأحسن حال
النهارده ان شاء الله عندنا طبق انا مدمناه بطريقه مش عارفه اقولكم ازاي والبيت عندي هنا لما بعملوه بصراحه مش بيخلوه فسفوسه
النهارده عنــــــــدنــــــــــــــــــــا
كيكه النسكافيه
تعالوا كده نتعرف الكيكه دي بتتكون من ايه وبتتعمل ازاي

مقاديرها
3بيضات
3/4كوب سكر
2/1كوب زيت
2/1كوب حليب
2ملعقه نسكافيه
ملعقه كبيره بيكنج بودر
فانليا
1كوب دقيق


تعالوا بقي نعرف ازاي نعمل الكيكه دي

طريقه التحضير
اول حاجه نجهز ادوات اللي هنشتغل فيها(وماننساش واحنا واقفين الذكر ياجماعه)اول حاجه نجيب طبق فارغ ونكسر البيضه فيه قبل مانحطها في المضرب بالشكل ده

وبعدين نحضها في المضرب ونضرب على الهادي ونستمر في باقي البيض بنفس الطريقه
بعد كده نبدا نضيف المكونات نحط بقي رشه الفانليا ونستمر في الخفق ونبدا في تسريع المضرب وبعد كده نحط السكر
ونضرب ونحط الزيت

ونضرب لمده 3دقايق كده لغايه لما يتخلطوا جامد مع بعض ويصبح عندنا سائل كريمي بعد كده نجيب النسكافيه ونحط الملعقتين في نص كوب الحليب وندوبهم في بعض

وبعدين نضيفهم على الخليط

ونضرب بعد كده نجيب كوب الدقيق اللي خافقين فيه ملعقه البيكنج بودر ونحط حبه حبه مش كله مره وحده لغايه لما نخلص الطبق كله

وده هيكون شكل الخليط في النهايه

بعد كده نيجي بقي لتحضير الصنيه لازم ولا بد ان تكون الصنيه متبطنه كويس علشان الكيكه تقلب معاكي علطول
نحط فيها شويه زيت وندهن الصنيه كلها والاطراف كمان ونجيب شويه دقيق ونوزعها على الصنيه كلها وهتكون عنندنا الصنيه في النهايه بالشكل ده

نشغل بقي الفرن يسخن (من تحت)عقبال ما نحط الخليط في الصنيه وبعدين نفرغ بقي الخليط في الصنيه بالشكل ده

ونسيبها 3دقايق كده لغايه لما يسخن الفرن
بعد كده ندخلها الفرن لمده(20) دقيقه مانفتحش الفرن(اللي هيفتح هيضرب انا بقول اهو) بعد لما يعدي الوقت ده نفتح حته كده نشوفها خلصت ولا لسه لو الباب بتاع الفرن زجاج يبقي شوفي منه بعد لما تخلص نقفل الفرن ونسيبها جوه شويه لغايه لما نجهز حاجتنا الباقيه ودي صورتها بعد ماطلعت


للتـــــزين
علبه قشطه/ملعقه نسكافيه/ظرف دريم ويب(كريم شانتيه)
كل ده بيضرب في بعضه دي طريقه
الطريقه الثانيه
انا بعمل قشطه في البيت طعمها يجنن
وممكن تستخدميها في حاجات كتير لو محتاجاها
3كوب حليب
6ملاعق دقيق
3ملاعق سكر
يتحطوا على النار ونفضل نقلب فيهم لغايه لما يتماسكوا جدا
ونقفل عليها لما تبرد نضيف عليها علبه القشطه الجاهزه وتتقلب في بعض وبعد كده نحط النسكافيه والكريم شانتيه ونضرب وهيكون عندنا قشطه بالنسكافيه طعمها يجنن


بعد كده نجيب الكيكه ونقسمها نصين ونحط على النص الاول طبقه من القشطه ونفردها عليها بالشكل ده

وبعد كده نحط الطبقه التانيه ونغطي الكيكه بالقشطه خالص ونزينها من فوق








كده الحمد لله طبقنا خلص النهارده
فاصل ونواصل
اوعوا تغيروا استنونا
واشغلوا لسانكم بذكر الله والصلاه على نبينا محمد صلى الله عليه وسلم