مذبحة الثانوية العامة متى ننهى هذه المآساة ؟

[hala azzam]

شكرا علي الموضوع الجميل ده بس انا عايزه اتكلم في شويه نقط كده
اولا:موضوع الدروس الخصوصيه انا شايفه ان احنا لو مش بناخذ دروس مش هنعرف الالف من كوز الدره(سوري يعني)بس بجد انا لو ماخدش دروس هسقط عارفين ليه علشان احنا اتعودما علي كده من صغرنا يعني لازم مدرس يكون شاطر(مش مهم يكون شرحوا حلو المهم ان احنا نخاف منه)علشان يحفظنا المنهج يدينا اول درس ويسمعهلنا وبعدين تاني درس ويسمعو وكده لغايه ما نوصل للاخر نكون نسينا الاول (قشطه)المهم ان انا شايفه ان موضوع الدروس ده المفروض يتلاشي مش يتلغي يعني نطور التعليم في المدارس تبدأ الطلبه تكون مش محتاجه انها تأخد دروس وبعدين الدروس مش عيبه لان هو المهم ان المعلومه توصل ولا المهم انها توصلنا منين؟وبعدين احنا كل مانتكلم في تطوير التعليم نقول الدروس الخصوصيه لا يا جماعه ده خلط انا شايفه ان اول حاجه للتطوير هو المدرس قبل المناهج كمان
ثانيا:المدرس انا نفسي في مدرسين بجد المدسين اللي بيتقال عليهم آباء مش واحد انا راحه اقعد معاه ساعه اهزر معاه اهزقه مهو بفلوسي بقي فين المدرسين اللي خايفين علينا بجد؟فين المدريس الي شايف فينا المستقبل ؟الي بيعلمنا وعايز يدينا كل ماعنده(من علم طبعا مش بالجزمه) انا محس ان كل المدرسين اللي انا بتعامل معاهم مرضي نفسيين(مع كل احترامي لكل المدرسين بس للاسف ديه الحقيقه) عارفين هي الحقيقه ليه لان اغلب الي بيدخلوا كليه تربيه بيدخلوها لانهم ماجبوش مجموع في ثانويه عامه وهي ديه النظره اللي حضرتك بتكلم عنها يعني انا مثلا عمري ماشفت واحد بيقول انا نفسي اطلع مدرس علشان كده لازم كليه تربيه تكون من ضمن الكليات المرموقه وتاخذ مجاميععاليه ومش اي حد يدخلها
ثالثا :ثقافه الناس احنا ماينفعش نجيب واحد في ثانويه عامه دلوقتي ونقله انت لازم تبطل دروس لا احنا لازم نوعي اولياء الامور قبل ما ولادهم يدخلو ابتدائي ان المدرسه هتقدملهم تعليم كويس وان هما مش هيكونوا محتاجين لدروس لان هي بقت برمجه اي واحد عنده ولاد او بنت يجري يسأل علي مدرسين وياخد ارقام تلفناتهم من غير مايعرف ابنه محتاج ولا لأ وكمان ممكن نعمل كرسات لاولياء الامور ازاي يساعوا ولادهو وازاي يكتشفوا مواهبهم
رابعا:احنا لازم يكون لينا فرصه ان احنا نعرف مواهبنا يعني انا مثلا لما كنت صغيره كنت بحب الرسم الطريز والشغل ده وكمان بحب الرياضه بس للاسف احنا مش عنده وقت نعمل اي حاجه هو المذاكره والدروس وبس خلاص كل الهوايات ديه اتنست (ولله الحمد)

اسفه علي الاطاله بس بجد الموضوع ده شغلني نفسي التعليم يتصلح نفسي ولادي مايظلموش زي انت عارفه انا لما بكون مخنوقه من المذاكره بدعي بي ايه(لا الله الا انت سبحانك اني كنت من الظالمين)