رسائل إلى ........ من مواطن مصرى

[أ/رضا عطيه]

"إرشى الملايكة"

مصر ثايرة
وانت لافف وسط دايرة
ما انت بترج الازازة
والطبيعى تشوفها فايرة


مصر فايقة غصب عنها
بنج اذا تقدر تبنج
نعمل ايه اذا دا اوانها؟؟
نقولله طب ياشعب هنج؟؟!!


مصر تتمطع تقطع اي حبل
اللى جايين بالدوبارة طبيعى هبل
لو يناير كان اسد يلزمله شبل
صوت زئيره وهبشته فى القوة دوبل

الوطن ياساحبه بيلف التراك
السمك قطع بز***ته الشباك
الطوفان اللى يقفله للهلاك
مش هتقدر لو هيبقى مين معاك

مش هتقدر الا لو ترشى الملايكة
لو يكون الغش له لألهنا سكة
لينا رب انتوا فى خلقه هاموش وفكه
قدرته تدك السما فوق راسكوا دكة

مش هتقعد الا لو يتصفى دمى
دم كل اللى سجد لله بجد
دا انت لسة بتقول يا هادى وبتسمى
وماشى تدهس فى الجنينة احلى ورد

اجمع الورد اللى هتحطه على قبرك
فهمه يا شعب انك انت خلاص نفد صبرك
قولت انا للكرسى اشرررب هو دا قدرك
الطوفان هيدوس على عشيرتك وعلى غفرك
لو نضيف من جوا كان يوم ربنا سترك
انما بتهتف بأسمه وماشى عكس ماهو أمرك


الشاعرة : نور عبد الله