|
||||||
| أرشيف المنتدى هنا نقل الموضوعات المكررة والروابط التى لا تعمل |
|
|
أدوات الموضوع | ابحث في الموضوع | انواع عرض الموضوع |
|
|
|
#1
05-09-2014, 11:24 PM
|
||||
|
||||
اقتباس:
مخبيش عليكي يا لمى أنا كمان عملت نفس الحركة مع المنتدى اللي كنت بتابعها عليه ^^
مش مشكلة أهم شيء الناس تستفيــد، كملي للآخر بقى ..
__________________
|
|
#2
05-09-2014, 11:27 PM
|
||||
|
||||
|
الحلقه التاسعه :  ذهب فـــاروق إلي باب المنزل وأخذ يصرخ بأعلي صوته : - حــــــــد يلحقني بسررررعه ، النبض وقف وانا مش عارف أعمل إيـــــــــــــه صعد رجال الإسعاف بسرعه وحملوا محمد وذهبوا به إلي المستشفي ، أخبر فاروق والدة محمد أن تتصل بوالده ليأتي إليهم في المستشفي ، وذهب هو معهم في عربه الإسعاف ________________ إستلمت حفصه رسالة سلمي وقامت بالرد عليها ، وكان محتوي الرسالة : - حبيبتي يا سلمي ربنا يبارك فيكي ، أيـــوه كده بقي ياعم ، وعلي فكره طالما حطيتي رجلك علي اول الطريق هتلاقيكي مع الوقت بتقربي من ربنا أكتر وتسيبي حاجات كتير غلط بتعمليها علشان رضا ربنا ، انا وثقت فيكي وعارفه إنك أدها . ___________ حمـل رجال الإسعاف محمد وأدخلوه إلي غرفة العمليات وجلس فاروق بالخارج يدعو الله ان ينجي صاحبه . وبعدما يقرب من الـنصف ساعة خرجت الممرضه مسرعه نحو غرفة ما ، فنادي عليها فاروق قائلا : - يا استاذة لو سمحتي طمنيني عليه وقبل ان تختفي من أمام نظره جاوبته بحزن : - ادعيله عادت الممرضه بسرعه أكبر من المره السابقه ودخلت إلي غرفة العمليات مره اخري ولكن سرعان ماخرج الطبيب وتبدو علي وجهة ملامح الحزن والغضب معا ، لم يلتفت إلي فاروق ولكن سار في طريقه فأمسك فاروق بيده من الخلف وقال بلهفه : - يا دكتور بعد إذنك طمني ، هو محدش عاوز يقولي حاجه ليه ؟!! أفلت يده بغضب ونظر إليه بحنق قائلا : - جايين تجيبوه دلوقتي بعد إيه ؟!! نظر له بعدم فهم وقال : - مش فاهم يا دكتور ! أكمل بغضب : - إزاي تسيب أخوك الفتره دي كلها بيعاني من ضيق التنفس ومحدش يفكر حتي إنه يوديه المستشفي يشوف ماله !! تعجب من كلام الطبيب فهو لا يعلم شيئا فقال بلهفه : - يا دكتور الله يخليك فهمني انا مش فاهم حاجه ، وكمان انا صاحبه مش اخوه وهو والده راجل كبير ف السن واخواته كلهم بنات وانا معرفش حاجه عن اللي حضرتك بتقوله ده ربت علي كتفه وقال بأسي : - صاحبك جاله ضيق تنفس مفاجئ وكان لازم يتحط بسرعه تحت جهاز التنفس الصناعي لأن حالته كانت متأخره ، بس للأسف وصل هنا متأخر وإحنا عملنا كل اللي نقدر عليه بس دي إرادة ربنا لم يكن يريد أن يصدق ما يسمعه فقال بعدم إستيعاب : - يعني إيه ؟ نظر إلي الأرض وقال بهدوء : - البقاء لله وقعت الكلمة علي مسمع فاروق كالصاعقه ، ارتمي علي اول كرسي بجواره وهو لا يصدق ما سمعه ، نظر إلي السماء بضع دقائق بدون ان يتفوه بأي حرف ثم نهض من مكانه ذاهبا إلي غرفة الطبيب وقال بجديه : - ممكن حضرتك تقولي إيه الاجراءات اللي المفروض نعملها علشان نخرجه من هنا ؟ نظر إليه الطبيب بدهشه ، فمن دقائق كان منهارا تماما ولكن ماذا حدث له الآن ومن أين اتي بكل هذه القوه انتشله فاروق من شروده قائلا : متستغربش يا دكتور .. انا لازم أبقي أقوي من كده كمان .. محمد والده كبير في السن وانا لازم أقف جنبه في الوقت ده .. ممكن بقي حضرتك تقولي مطلوب مننا إيه دلوقتي بالظبط ؟ _________________ ظهرت ملامح الرعب علي وجه إسلام وقال بصوت حــاد : - إنت بتقول إيه ؟ إنت بتتكلم بجد ؟!! حاول فاروق الإحتفاظ بدموعه في عينيه ولكنه لم يستطع فقال بصراخ : - بقولك محمد مات قدام عيني .. عـــارف يعني إيه مات قدام عيني ؟ عارف يعني إيه اخر حاجه يقولهالي تبقي خلي بالك من إسلام وخليه يقرب من ربنا ؟ عارف يعني إيه كان نفسه يكون أحسن من كده بس انت كنت دايما بتتريق عليه وكنت السبب في انه فضل واقف مكانه ومتقدمش خطوه من ساعة ما عرفك ؟ طيب عارف يعني إيه هو دلوقتي ميت ؟ يعني بيتحاسب هـــاه ؟ عارف يعني إيه بيتحاسب ؟ بجد انا مش متخيل إنت إزاي يجيلك عين تيجي هنــا تاني بعد كل اللي حصل ده ؟!! نظر للجانب الآخر وقال هامسا : كان نفسي أكون قريب منه قبل ما يموت يمكن كنت أقدر اساعده يقرب من ربنا شويه ، يمكن كنت أكتشف مرضه واقنعه يروح للدكتور ويهتم بصحته شويه ، كان نفسي في حاجات كتير اووووي بس خلاص مبقاش ينفع . هو بس دلوقتي محتاج دعائنا وربنا يرحمه برحمته ثم عاود النظر لإسلام وقال بعصبيه : ممكن بقي مشوفش وشك قدامي تــــاني ؟ ولا دي كمان صعبه ؟ وعلي فكره عمري ما هسامحك ولا هعفيك من المسئولية .. لأنك أكيد كنت بتشوفه تعبان قدامك وعمرك ما فكرت تسألة مالك ؟ وعمري ما هنسي انه كان ممكن يكون أفضل لولا إنه عنده صاحب زيك .. إتفضل من قدامي يا استاذ مش عاوزين نشوفك في الشارع هنا تاني قال إسلام بصوت مختنق من كثرة البكاء : - يا فاروق انا والله العظيم ما اعرف أي حــاجه من اللي انت بتقوله ده ؟ بالله عليك قولي انك بتكدب وان ده محصلش وانا اوعدك والله هعمل كل حاجه هو عاوزها .. حاول التسامك قائلا : - يا ريت كنت بعرف اكدب يا إسلام .. يلا إتفضل من هنا بعد إذنك لاني تعبت ومبقيتش قادر استحمل ولا كلمه زياده وخصوصا منــك إلتفت إسلام خلفه وعاود النظر إلي فاروق قائلا بصوت متقطع : - يعني إيه ؟!!! يعني الصيوان اللي ورا ده بتاع محمد ؟ يعني خلاص كده مش هشوفه تانــــي ؟!! قال بنفاذ صبر : - والله إنت ممكن تروح تتأكد بنفسك .. بعد إذنك يا استاذ ثم تركه وذهب بعيدا . وقف إسلام بضع دقائق يترجي قدماه ان تحملانه ليذهب إلي منتصف الشارع حيث يقف والد محمد ، مرت اللحظات من بين منزل فاروق إلي منزل محمد وكأنها ساعات بل سنين يحاول فيها إسلام إستيعاب كل ما حدث ، يحاول الإقتناع بأن محمد قد مات بالفعل وإنه لن يراه ثانية ، يحاول معرفة كيف سيعيش بمرارة الذنب الذي وضعه فاروق علي عاتقه ، يحاول إستيعاب كل ما حدث ولكنه لا يستطيع . أحس فجأة بأحد يلمس كفه وإذا به يري والد محمد غارقا في البكاء ويسلم عليه بحراره ويأخذه في حضنه .. ظل في حضنه بضع لحظات ومن ثم انتفض قائلا : - عمي هو محمد مات فعلا ؟ إرتمي الأب علي الكرسي خلفه وهو يقول بصوت متقطع : - راح عند اللي أحسن مني ومنك إمتلأت عيناه بالدموع وحاول الكلام ولكنه لم يستطع . ظل جالسا بجوار والد محمد بعض الوقت قد يكون دقيقه او ساعه او عدة ساعات ، لا يعلم شيئا ، كل ما يعلمه هو أنه لا يشعر بشئ سوي المراره ظل هكذا طويلا حتي وجد شخصا يربت علي كتفه قائلا : - البقاء لله يا استاذ ، معلش بنستأذن حضرتك تطلع ترتاح علشان هنشيل الكراسي نظر حوله فإذا به لايري احدا سواه فقام في هدوء وذهب بدون ان يتفوه بأي كلمة . عــاد إلي منزله بعد منتصف الليل وفتح الباب بهدوء فإذا به يري والدته واخته في إنتظاره ، قالت هند بلهفه : - إيـــــه يا إسلام انت بتهزر ؟!! سهران ده كله بره بتعمل إيه ؟!! قال بعدم إهتمام : - خلاص جيت أهو ثم ذهب إلي غرفته وأغلق الباب وراءه ، ولكن هند لازالت تريد إن تعرف لماذا تأخر كل هذا الوقت وخصوصا لأنه غير معتاد علي ذلك لانه يعرف انه المسئول الوحيد عن والدته وعنها لذلك لايجب ان يتركهما وحدهما ذهبت إلي غرفته وطرقت الباب ولكنه لم يفتح ، فتحت وقالت بعصبيه : - يعني إيه خلاص جيت أهو ؟ إحنا قلقنا عليك جدا يا إسلام خوفنا لاقدر الله يكون حصلك حاجه ؟ وقافل موبايلك ليه كمان ؟ وضع غطاء السرير فوق رأسه وقال بحده : - إمشي يا هند أزاحت الغطاء عن وجهه وقالت بغضب : - لأ مش همشي إلا لما تقولي إتأخرت لييه كده ؟ وبعدين انت بتكلمني بلا مبالاه ليه كده ؟ حصل إيه يعني ؟ هو انا عملتلك حاجه ؟ نهض من مكانه وهو ثائر وأخد يصرخ قائلا : - عاوزه تعرفي حصل إيه ؟ هــــــاه ؟ أقولك يا ستي .. محمد صاحبي مـــــات وانا كنت السبب في موته ، فاكره لما رن عليا وانا معبرتوش ؟ ساعتها كان بيموت وانــا اول واحد إتصل بيه ، أصله كان فاكرني صاحب بجد وهلحقه !! طيب عارفه ان والده اول ماشافني اخدني بالحضن جـــامد ، أصله فاكرني زي ابنه وبيقولي انت من ريحة الغالي .. مسكين الراجل ميعرفش ان ابنه كان ممكن يكون أحسن من كده بكتيــــر لو مكنش عنده صاحب ندل زيي ، ميعرفش ان ابنه دلوقتي بيتحاسب والله أعلم هو دلوقتي مرتاح ولا لأ ؟ ميعرفش اني لما كنت بشوف محمد تعبان كان اخري أقوله مالك وأجيبله مايه وعصير ، حتي مهانش عليا أضغط عليه وأقوله نروح لدكتور نشوف مالك !! كنت عارف انه طـــول عمره بيكره الدكاتره بس عمري ما فكرت انه ممكن يموت بسبب مرضه ، عمري ما فكرت ان صديق عمــــري يروح مني بسرعه كده وفي لمح البصر !! كان دايما يقولي عاوزين نلحق نقرب من ربنا قبل ما نموت وانا كنت بضحك عليه وأقوله ياعم إحنا لسه قدامنا العمر طويل ، مكنتش اعرف انه كان قدامه يوم واحد ويموت .. إتسعت عينا هند وأخذت تحرك رأسها بعدم تصديق قائله : - إنت بتقـول إيــ قاطعها إسلام بحده وأردف قائلا : - عارفه أخر حاجه قالها إيه قبل ما يموت ؟ قالهم خلوا بالكم من إسلام وخلوه يقرب من ربنا علشان مش عاوزه يموت زيي ؟ عارفه يعني إيه يوصيهم عليا قبل ما يوصيهم علي أهله ؟ دلوقتي بس عرفت قيمة انه كان دايما يقولي انه بيحبني أكتر من نفسه اخذ يتنفس بصعوبه وهو يقول بصوت متقطع : ااااااااااااه أقول إيه ولا إيه بس ؟ أطـــلعي يا هند دلوقتي وسيبوني في حـالي ومحدش يدخل عليــــا تـــــاني مفهوووووووم حاولت هند تهدئته ولكنها لم تستطع فذهبت للخارج وأغلقت الباب خلفها والدموع في عينيها _____________ اخذ إسلام ينظر إلي سقف الغرفه لساعات بدون أن يتفوه بأي حرف ، كانت دموعه تتساقط كالسيل ، رجع بذاكرته للخلف وأخد يتذكر وفاة والده وكيف ساعده محمد علي إجتياز هذه المحنه كـان يري الموقف أمامه وكأنه حدث بالأمس .. عندنا علم إسلام بوفاة والده كان بالصف الثاني الثانوي ، لم يكن يعلم ماذا يفعل وهو في مثل هذا السن الصغير فما كان منه إلا انه اتصل بأقرب صديق له وقال بصوت متقطع من كثره البكـــاء : - محمد الحقنــي يا محمد أبويا مــــات مــــات إنتفض من مكانه وقال بقلق : - بتقول إيـــه يا إسلام ؟! أخد يصرخ بشده : - محمد انا حاسس إني هموووت إلحقني بســـرعه قال في توتر : - حـــاضر جاي حااالا أهو ، خلي بالك من نفسك تذكر عندما أخده محمد في حضنه وأخد يربت علي كتفه وهو يقول بجديه : - إسلــام إنت راجل البيت دلوقتي ولازم تكون أقوي من كده ، وانا جنبك أهو وعمري ما هسيبك ثم أومأ برأسه مؤكدا : - انا من دلوقتي راجل البيت معاك ، ومفيش حاجه اختك ولا مامتك هتحتاجها إلا وهتكون موجوده بإذن الله ، يلــا إمسح دموعك وروح هدي مامتك وأختك وحسسهم إن ليهم ظهر وسند قال إسلام والدموع بين عينيه : - يا محمد انا ثانوية عامه ومسئولية الدراسه لوحدها صعبه عليــا ، هعمل إيه بس ولا هشيل مسئوليتهم إزاي ؟!! انا حاسس إني اتكسرت ومش هرجع تاني نظر إليه بصرامه وقال بصوت قوي : - هنعمل الـإثنين يا إسلام بإذن الله ، هندخل هندسه زي ما بنحلم دايما وبرضو هنكون رجالة ونشيل أهلنا علي راسنا بإذن الله ، انا جنبك أهو متقلقش تذكر عندما كان يتصل به يوميا ويسأله : هل تحتاجون شيئا ؟ تذكر عندما كان يتصل به ويقول أنا قادم الآن فماذا أحضر معي ؟ تذكر عندما وقف بجانبه ولم يتركه للحزن والإحباط وأخد يذاكر له كل ما فاته ويذكره دوما بحلمهم وبإن والده سيكون فخورا به إذا إلتحق بكلية الهندسه كما تمني . تذكر كيف كان محمد الاب الثاني له وإنه لم يتركة لحظة ، وفي مقابل ذلك عندما شعر محمد بالتعب وفكر في الإتصال بأقرب صديق له لم يلق منه ردا وكان التأخير هو السبب في وفاته أخذ يضرب الفراش بقــوه رهيبه وهو ثائر تماما ، أخذ يلوم نفسه بقوه علي ضياع صديقه منه ، أخذ يتذكر مواقف كثيره حدثت بينهما وكان بين الغضب والضحك والبكاء والألم حتي شعر بالتعب وذهب في النوم -------------------------------------------------------- السؤال هنا : هل لازم الحاجه تضيع مننا علشان نحس بقيمتها ؟ هل لازم نندم وقت لا ينفع الندم ؟ هل حد مستعد للموت ؟ ولا كله بيقول انا لسه في عز شبابي ؟ يـــــاتري محمد هيكون مصيره إيه ؟ اه كان جواه خير بس متحركش ؟ هل لازم نبقي زيه ولا نبدأ نفوق بقي ؟!!
__________________
|
|
#3
05-09-2014, 11:32 PM
|
||||
|
||||
|
الحلقه العاشرة :
إستيقظ إسلام من نومه فوجد نفسه قد نام وهو جالس وبالفعل لم يدخل عليه أحد كما طلب ، فتح باب غرفته وذهب إلي الخارج فوجد والدته تجلس وتقرأ القرآن ، نظر لها بإبتسامه خفيفه فأحست بوجوده فجاءت مسرعه مسحت علي شعره بحنان وقالت بهدوء : - البقاء لله يا إسلام ، عامل إيه دلوقتي ؟ رد بإبتسامه خفيفه : - الحمد لله يا أمي قالت بحماس : - عارف كنت بعمل إيه دلوقتي ؟ نظر إلي المصحف وقال بتعجب : - اه بتقرأي قرآن فقالت بسعاده : - أيوه منا أعده بقرأ قرآن دلوقتي وهدعي لمحمد صاحبك كتيــــر اوووي بإذن الله إنشرح صدره وشعر بسعاده بالغه وقال بإهتمام : - ربنا يخليكي يــا أمي ثم أردف بتساؤل : - هو انا ينفع أعمله حاجه تنفعه دلوقتي بعد ما مات ؟ ربتت علي كتفه وقالت بإبتسامه : - أيــــوه طبعا يا حبيبتي ، كان في حديث عن الرسول صلي الله عليه وسلم بيقول : إذا مات ابن آدم انقطع عمله إلا من ثلاث: صدقة جارية أو علم ينتفع به أو ولد صالح يدعو له " رواة مسلم يعني إنت ممكن تطلع صدقه عنه ، او لو كان بيقولك أي معلومه مفيده نفذها وفيد بيها الناس وكمان دايما خليك فاكره بدعائك نظر لها بإمتنان وقال : - ماشي يا امي شكرا تركها وذهب إلي غرفته ، جلس علي فراشه ولكنه سرعان ما تذكر إنه لم يصلي الفجر كعادة كل يوم ، ولكن اليوم أحس برغبه ملحه في أداء الصلاة فذهب وتوضأ وصلي ثم جلس علي فراشه مره آخري يردد : تطلع صدقه عنه معلومه مفيده نفذها خليك فاكره بدعائك _______________________ أمسكت سلمي بهاتفها ونظرت إليه بفرحه ثم ذهبت وأغلقت باب الغرفه وأخدت تغني بصوت مرتفع : احساسك لما ايديك بتمد لخير .. اول ما تشوف الفرحة فى عين الغير .. وكأنك فى السما طاير فوق اعلى من الطير .. وكفاية يكون ربنا عنك راضى وفرحاااان وحلمنا فى قلبنا جوانا الخير يزيد ... حتى النجوم لو فى السما عمرها ما تكون بعييييد خليك زى ما ربنا عايزك يلاقيك ... لو تسعد غيرك يكبر فيه الحب وفيك وتكون فوق زى نجوم السما اه ويعليك ... خلينا نكبر اجمل شئ جوا الانسان وأخدت تردد بحماس شديد حتي إرتفع صوتها فدخلت عليها ولاء وقالت بصراخ : - أيـــــــه يا بنتي بتصوووتي كده ليــــــه ؟ صوتك واصل لآخر الشارع إنتبهت سلمي وقالت بإحراج : - معلش مأخدتش بالي ، أصلي لسه منزلاها جديد وعجبتني اوي نظرت لها بعدم فهم قائله : - هي إيه دي ؟ قالت بسعاده بالغه : - دي انشوده جديده كده لقيتها علي النت لمنشد إسمه محمد عباس كانت حفصه قالتلي عليه ، بس تحفه اوووي يا بت يا ألاء بإذن الله هنزل كل الأناشيد بتاعته ثم أردفت بإبتسامه كبيره : - وكمان نزلتها من غير موسيقي شعرت ولاء بالغضب وقالت بصوت ساخر : - يعني تبطلي أغاني وتسمعي أناشيد ونقول ماشي ، لكن تقوليلي كمان من غير موسيقي وبتاع !! ليه يعني هو حرام ؟!! يعني حتي لو اغنيه دينيه وفيها موسيقي هتدخلك النار يعني !! إيه التفكير الغريب ده تنهدت سلمي بعمق وقالت بهدوء : - يا بنتي انا مقولتش حرام ولا هتدخلوا النار ولا الكلام ده ، كل الحكاية إني سمعت حديث عن الرسول صلي الله عليه وسلم بيقول : ليكونن من أمتي أقوام يستحلون الحر والحرير والخمر والمعازف " رواة البخاري وبصراحه خوفت بقي أكون من الناس دول فقررت أكون في السليم ثم أردفت بأريحيه قائله : - وبعدين يا ستي انا كده مرتاحه جداااا وحاسه اني مش بعمل حاجه غلط ، إدعيلي بقي ربنا يهديني ويقربني منه أكتر ، بجد حاسه الأيام دي براحه نفسيه كده غريــبه نظرت إليها للحظات وقالت بتساؤل : - تفتكري يا بت يا ولاء يكون ربنا راضي عني وهداني للطريق الصح علشان كده انا مرتاحه ؟ نظرت ولاء بإبتسامه : - مش عارفه ؟ يمكن ! إبتسمت سلمي وقالت بضحكة مستفزة : - بت يا ولاء انا عارفه إنك اقتنعتي وخلاص مش هتسمعي اغاني تاني ، هاه بقي تحبي أنزلك كام نشيد معايا ؟! تركتها ولاء وذهبت وهي تقول : - دي لسعت باين !! أغلقت سلمي باب الغرفه وأخذت تنشد كما كانت تفعل ، ولكن بصوت أقل _____________________ قامت سلمي بتحميل بعض الأناشيد الدينيه ثم فتحت الحساب الخاص بها علي موقع الفيس بوك ، لم تكن حفصه موجوده في ذلك الوقت فأخذت تتصفح كعادتها حتي وصلتها رسالة مفاجئة : - بتعملي إيه بقي من غيري ؟:D أطلقت سلمي ضحكة عاليه وكتبت : - هههههههه إنتي جيتي إمتي يا بنتي ؟ يا بنتي إحنا موجودين في كل وقت وكل مكان - - ليـــه يعني سوبر مان مثلا ؟ - هههههه أحسن طبعا ،، احم احم اللهم زدني تواضعا ،، المهم أخبارك إيه ؟ - أخباري حلوه وبتسلم عليكي مبدأيا كده المسلسل خلص الحمد لله وهحاول مشوفش غيره تاني ، وحملت شوية أناشيد كده للناس اللي قولتيلي عليهم دول وأهي ماشيه الحمد لله - أيــوه بقي بقي بقي حاسه يا بت يا سلمي إني هدخل الجنه بسببك تعجبت سلمي قليلا وفكرت بضع لحظات وكتبت بتردد : - بسببي أنا ؟!! إزاي ؟ - أصل انا دايما ببعت جروبات دينيه للبنات اللي عندي وبنصحهم وبكتبلهم بوستات وكده ، لكن مكنتش بلاقي أي تفاعل معايا ، سعات كتير كان بيجيلي إحباط وأقول خلاص بقي ماهم مش راضيين يقرأوا هعمل إيه يعني ، بس كنت برجع أفتكر الحديث عن الرسول صلي الله عليه وسلم اللي بيقول فيه : " لأن يهدي الله بك رجلاً واحداً خير لك من حمر النعم " متفق عليه " من دعا إلى هدى كان له من الأجر مثل أجور من تبعه لا ينقص ذلك من أجورهم شيئاً ومن دعا إلى ضلالة كان عليه من الإثم مثل آثام من تبعه لا ينقص ذلك من آثامهم شيئا " اخرجه مسلم وكمان أفتكر الآيه دي " وَمَنْ أَحْسَنُ قَوْلاً مِّمَّن دَعَا إِلَى اللَّهِ وَعَمِلَ صَالِحاً وَقَالَ إِنَّنِي مِنَ الْمُسْلِمِينَ " وأقعد أقول لنفسي اوعي تيأسي ، مش يمكن بنت تكون محتاجه نصيحتك وبسبب كلمة منك حياتها كلها تتغير ، مش يمكن كلمة منك تقوليها لواحده فيهم تكون سبب في دخولك الجنه لحد بقي يا ستي لما لقيتك بعتالي إنك عاوزة تتغيري وكده ففرحت اوووووي بقي إن اخيرا تعبي جه بفايده وبإذن الله زي ما إتجمعنا في الدنيا علي طاعه ربنا نتجمع فـ الجنه كمان - يــــاه يا حفصه إنتي بجد جميله اوووي ربنا يجازيكي خير - وإياكي يـــــارب - طيب بصي صحيح كنت عاوزة أسألك علي حاجه مهمه - إتفضل أباشا - بصي هو انا دايما مش بصلي الظهر في الكلية بس لما بروح بصليه ، هو كده عادي ؟ - طيب ومش بتصليه ليه ؟!! - ماهو انا مش هينفع أصلي ببنطلون - بنطـلوون كمـــــــان ، لالا أنا كده هضرب وربنــــا ، طيب قوليلي هو إنتي شايفه إيه ؟ - يعني إيه ؟ - بصي ع السؤال اللي فوق ده وجاوبي إنتي يعني شايفه إنك لما تروحي عند ربنا هتقدري تقوليله يارب انا كنت بضيع الظهر علطول علشان لابسه بنطلون ؟ تفتكري دي هتبقي إجابه مقنعه - اممم مش عارفه بقي قالت بعناد : - لأ عارفه تنهدت سلمي بعمق وقالت بتردد : - طيب أعمل إيه ؟! - عندك جيب ؟ - اه عندي 2 بس والباقي بنطلونات ، بس بصراحه مش بحبهم وبحس إنهم بيلخموني - طيب ممكن علشان ربنا يرضي عننا نعمل تجربه صغننه لإسبوع واحد بس ؟ - شو هاي التجربه ؟ - ههههههههههههههه كده تبقي موافقه بصي يا ستي إنتي الإسبوع الجاي فـ الجامعه إنزلي من بيتك متوضيه وإلبسي طقم واسع كده وجيبه واسعه من الـ 2 اللي عندك ، وإنزلي وإنتي في نيتك إنك هترضي ربنا وإنك مش عاوزه حاجه من الدنيا غير رضاه عنك وإدعي إنه يثبتك ويحببك في اللبس ده ومترجعيش للبنطلونات تاني - إيه ده يا بنتي ، يعني هرمي اللبس اللي عندي كله وكل ما اروح الجامعه هروح بالجيبتين دول ؟!! - يا ستي وهو حد قالك إرميهم إعملي اللي بقولك عليه بس وبعدين هنشوف هنعمل فيهم إيه ؟ أوكشن ؟ - ماشي - وعد هاه ؟ - عييييب ، سلمي مش بترجع في كلمتها أبــــــدا نجرب إسبوع مش هنخسر حاجه - مــاشي يابو صلاح همشي انا بقي ، عاوز حاجه يا حاج ؟ - شكـــرا يا حاج رمضان ، إبقي سلملي ع العيال أغلقت حفصه الهاتف الخاص بها وجلست سلمي تفكر فيما دار بينهما ، تنهدت بعمق وقالت بعنـــاد : - نجــــرب وإحنا هنخسر إيه يعني ، مش يمكن أرتاح ويروح تأنيب الضمير اللي عندي ده ____________________ وفي المساء إرتدي إسلام ملابسه وفتح باب الشقه وكاد أن يخرج لولا سماعه صوت والدته : - إسلــام رايح فين ؟! إلتفت إليها قائلا : - رايح عند محمد لمعت عيناها بالدموع وربتت علي كتفه قائله : - بس محمد مات يا إسلام ! زفر بضيق : - عـــارف يا أمي عــــارف متخافيش لسه متجننتش !! انا رايح عنده البيت أشوف لو محتاجين حاجه يعني ، وما تنسيش هو وقف معايا أد إيه يوم وفاة بابا إبتسمت قائله : - وهو حد ينسي برضو اللي عمله معانا ، ربنا يرحمه برحمته - ماشي يا أمي عايزه حاجه إجيبها معايا ؟ - تيجي بالسلامه يا حبيبي _____________ وصل إلي الشارع الذي يقطن به محمد ونظر إليه بحزن : تذكر كيف كان يأتي معه دائما إلي هنا ، تذكر صدمته عندما سمع بخبر الوفاه ، تذكر نظرات فاروق الغاضبه والساخطه عليه ، تذكر والده وهو يأخذه بـ حضنه لأنه أعز صديق لولده ، تذكر جلوسه لوقت طويل جدا وهو غير مستوعب ماحدث ، أخذ يتذكر الكثير من الأشياء ولكنه استفاق من شروده علي شئ صغير يمسك ببنطاله فنظر فإذا به يري طفلا صغيره يجذبه من البنطال . نظر إليه إسلام متعجبا ، فتبسم الطفل قائلا : - حمو ممكن تفتحلي دي ؟ نظر إليه إسلام بإبتسامه وأمسك كيس المقرمشات وقام بفتحه قائلا : - إتفضل يا حبيبي نظر له الطفل بإمتنان وأطلق قبله في الهواء وذهب مسرعا وهو يقول : - ثكلن يا حمو تبسم إسلام وأكمل طريقه .. صعد درجات السلم بصعوبه شديده ووقف أمام الباب للحظات ثم وضع يده علي الباب وأخذ ينقر بهدوء فتح الأب الباب وقال بإبتسامه هادئه : - إتفضل يا إسلام يابني تنهد إسلام قائله : - ربنا يخليك يا عمي ، أسف اني جيت من غير ميعاد بس حبيت أسألكم إذا كنتوا محتاجين حاجه انا موجود ، حضرتك عارف محمد كان بالنسبالي إيه وطبعا انا زي إبنك برضو ثم أردف بإبتسامه : صح ولا إيه ؟ إبتسم الاب قائلا : - طبعا يا بني ربنا يبارك فيك ، بس الحقيقه فاروق مش مخليني محتاج حاجه ودايما معايا الحمد لله وبيجيلنا في اليوم أكتر من مره ربنا يبارك فيكم جميعــا - طيب يا عمي لو إحتجت أي حاجه كلمني وانا أجي لحضرتك فورااا ، وإعتبرني برد أي حاجه من جمايل محمد عليا - بإذن الله يا بني ، إتفضل ادخل طيب - ربنا يبارك في عمر حضرتك ، بعد إذنك _____________ نزل درجات السلم بحزن ووقف امام المنزل وهو يقول بضيق : - حتي دي كمان عملتها يا فاروق ، أكتر وقت كانوا محتاجيني فيه لاقوك إنت بدالي ، حقيقي انا مستحقش اني أكون " صديق " أصلا نظر أمامه فإذا به يراه مره آخري : يا تري ماذا سيحدث بينهما ؟ غدا سنعرف إن شاء الله ------------------------------------------------------------- ياتري إسلام هيكون مصيره إيه بعد اللي حصل ده ؟ وهل سلمي هتقدر تكمل طريقها ولا هتلاقي صعوبات بتواجهها ؟ هنعرف ده في الحلقات الجايه بإذن الله
__________________
|
| العلامات المرجعية |
| الكلمات الدلالية (Tags) |
| أحمد, الحلال, سلمى, إسلام, هند |
«
الموضوع السابق
|
الموضوع التالي
»
| أدوات الموضوع | ابحث في الموضوع |
| انواع عرض الموضوع | |
العرض المتطور
|
|
جميع الأوقات بتوقيت GMT +2. الساعة الآن 04:44 AM.
