هو احنا بنزهق منها ؟ ولا بنخاف ؟ ولا بنكرهها ؟ طب وليه اصلا ؟

[bosy .. mostafa]

بسم الله الرحمن الرحيم
انا كنت هرغي و رغيت كتير اوي بس الموقع وقع نرفزني اوىىىىىىىى
نهايته اما ارغي تاني و هو انا يعني ورايا حاجه .. Just ثانويه عامه بس حاجه بسيطه خالص مالص

عايزه اقولك اني من كام يوم قلبت قلبه صعبه اوي و في وقت غير مناسب بالمره
لاقتني مره واحده قفشت عالمذاكره و ثانويه عامه و اللي عايز يذاكر في سنته دي و ماروحتش دروس ولا انجزت حاجه و ده كان نتيجه كبت لإني فضلت اكتر من اسبوعين مش اخد اجازه يوم الجمعه ولا اخرج .. بس طلعت الكبت بطريقه مثاليه اوىىىىىىىىى (هبقى اقولك ايه هي لما اشوفك عالميل اصلها متعبه شويه ههههههههه )
طبعاً ماقولكيش ماما كانت بتزعق لي (مش عشان مش بذاكر) لا بتزعق لي عشان عامله لها دوشه و بعيط و كده و كمان عشان ماعملتش الغدا بدالها ولا عملت الشقه و دي من اساسياتي
بعد ما طلعت الكبت بقى الحمد لله رب العالمين رجعت لطبيعتي و لجناني تاني و لمناكفتي مع الفيزيا و عبطي مع الاحياء و تمشيتي عالنيل مع العربي و شرب البيبسي مع علم النفس و قزقزة اللب بتاعة الانجليزي


بس تعرفي يا منى .. كل لما تبقى نفسي مفتوحه عالمذاكره و ده بيحصل لما نفسيتي بتكون تمام و ميه ميه (ودي حالات نادره ) لازم يحصل حاجه من دي
1. يا اما ماما تقولي انا تعبانه و عليكِ شغل البيت و شيلي ليلى بنت اخوكي بقى على مامتها تيجي من بره و ليلى طبعاً بتعيط بمعدل 3 ثواني لو سبتيها لوحدها

2.يا اما استاذ اشرف (مديري في الشغل) يتصل بيا عشان مؤتمر او بحث او اي مصيبه زرقا مطلوبه مني

3.يا اما ينتابني احساس رائع بالنوم و بينتهي اني بنام عالكتاب الحمد لله (و مش بينفع فيها لا نيسكافيه ولا قهوه ولا اي منبهات) و ييجي اخويا يصحيني و بعد ما اصحى يتريق عليا ويقولي (يا ضحية المذاكره)

عشان كده مش بحب نفسي تبقى مفتوحه عالمذاكره

تعرفي يا منى .. انا كنت مره بسأل ماما (هو احنا ماخلاص اتعلمنا نقرا و نكتب ايه لازمة الغلب ده بقى و فيزيا والذي منه) الاقيها تبص لي كده و تقولي (العلم نور يا بوسي .. اتنوري يا حبيبتي )

لحد ما كنت في يوم قاعده زيك كده و رحت راسمه ورقتين و معلقاهم في مدخل شقتنا الحمد لله كل اللي يدخل يشوفهم حتى جارنا كان جاي يزور اخويا فضل باصص في الصور ييجي تلات اربع ساعه و كان شبه الايموشن ده >>>
و جارتي هبه مسكتني تريقه ماقولكيش ههههههه

ما علينا

الاولى رسمت فيها حمار كبير اوي و كتبت تحتيه (شعارنا .. عك و ربك يفك)
التانيه رسمت فيها لمبه و كتبت جملة طه حسين الشهيره (التعليم كالماء و الهواء) بس زودت عليها (بس يا ناس الماء ملوث و الهواء فيه دخان تفتكروا التعليم كده ايه ؟؟ )

الحمد لله يعني بيشتكوا مني في البيت و بيقولوا لي على ما تخلصي ثانويه عامه هتكوني خلصتي علينا

انا في المذبحه اللي عندي دي .. تخيلي يوم الجمعه الجايه عندي احياء عالمنهج اللي اخدته كله (بابين و فصلين) و كل واحد طويل عريض
و اللي بعدها على طول فيزيا (اربع ابواب و عيشي فيهم )

و بعدين ناخد الاجازه
انا مابقتش عايزه اخد اجازه ده ضغط مش لطيف
و مستر الانجلش عشان متأخرين -على حد قوله- عايز يدينا تلات حصص الاسبوع الجاي
انا خلاص يا بنتي قريب هطلع فوق سطوح بيتنا و بما اني عندي فوبيا من الادوار العاليه فمش هحتاج ارمي نفسي لاني بمجرد ما ابص تحت بس هقع (بعد الحالات النفسيه اللي بتصيبني اثناء الطلوع) و لو حد فكر يسألني بتعملي ايه هقوله بجرب قفزة الثقه اصلي نفسي اقدم في الجيش

كفايه رغي عن نفسي بقى

==

بصي يا منى يا حبيبتي .. احنا جينا الدنيا دي عشان نؤدي رساله معينه ..
افتكر كنت في يوم قرفانه من المذاكره و بكلم واحده صاحبتي هنا في المنتدى -ربي يمسيها بالخير و يسعدها- قالت لي جمله حلوه اوي بتقول :
If you think you can or you can't you are right
و قالت لي ساعتها بلاش تحبطي نفسك و تقولي مش هقدر و مش هعمل و مش هسوي .. لإني كده خلاص حطيت في مخي اني مش هقدر اعمل حاجه يبقى فعلا مش هقدر .. لكن لو اقنعت نفسي اني هقدر و هوصل بامر الله .. يبقى هوصل و ربنا هيعيني
و ماينفعش اقعد ادعي ربنا باني احقق هدفي و انا مش بشتغله (وقل اعملوا فسيرى الله اعمالكم )
و اخيراً لازم نحط في اعتبارنا ان ربنا مش راح يضيع تعبنا ابدا ابدا و تعبنا مش راح يروح هدر ابدا

و بعدين ايه المشكله يا منى .. احنا في مصر
املي دماغك بالمعلومات الملخبطه اللي في المنهج دي و روحي صبيها في الامتحان و اطلعي من اللجنه ابيض يا ورد و ارفعي شعار (لا مذاكره بعد اليوم اكل المحشي اهم اهم )
و هتجيبي 100% بأمر الله الواحد الاحد
العمليه مش صعبه خالص لو حسبناها صح صدقيني
انا قعدت مع نفسي و حسبتها كويس لقيت مافيش ادنى صعوبه
طالما بشتغل بهدف اني ارضي ربنا عني و اسعد اهلي و اللي بحبهم و اوصل للكليه اللي بحلم بيها
يبقى كل صعب يهون

تعرفي احنا عاملين زي ايه ..
زي واحد مسافر في طريق طويل .. بعربيه ..
البنزين في الحاله دي هي طاقتنا و دافعنا اللي بيخلينا اذاكر
و المكان اللي عايز يوصله هو الهدف
و المشي ده بقى مذاكرتنا

في يوم هنلاقي ان البنزين خلص .. مش مشكله نريح شويه و نرجع تركيزنا و نجدد النيه من فتره لفتره
نفتكر المكان اللي عايزين نوصله و نعرف ان لسه ادامنا فرص كتير
و الامتحانات اللي في الدروس دي مجرد تدريب عالحرب الكبيره (الامتحان الاصلاني )
و نكمل مشوارنا تاني و نرجع له و نرجع لمذاكرتنا

ياااارب كل واحد يحقق هدفه يارب
و يارب ينصر اخواننا في فلسطين

معلش يا منمن صدعتك و طولت اوي
بس اهو بقى قولت لك فيه رغي كتير
بحبك في الله
على فكره يا بت وحشتيني اوىىىىىىىىى نفسي اكلمك اوي