متابعة متجددة : الأخبار الإيجابية والسعيدة في بلدنا مصر

[Mohammad Asaad]

النماذج المشرفة موجودة في كل مهنة وكل مكان، بس نموذج أستاذة وداد حمدي نموذج مختلف شوية، لأنها لما عملت شغلها والتزمت بمنع الغش في لجان الامتحانات بدل ما أولياء الأمور يقدموا ليها الشكر البعض منهم اعتدى عليها!
الحكاية حصلت الأسبوع اللي فات وكان بطلتها الأستاذة وداد حمدي رئيس لجنة امتحانات بمدرسة محمد الشقري بالسنبلاوين بمحافظة الدقهلية، لما تعرضت للاعتداء من بعض أولياء أمور الطالبات لحرصها الدائم على منع ظاهرة الغش خلال الامتحانات، الواقعة اللي حصلت كشفت لنا عن استمرار بعض أولياء الأمور في الحرص على غش أبنائهم، وبتقول إننا مش بس محتاجين نغير التعليم والمناهج لكن كمان محتاجين نغير ثقافة البعض عن التعليم نفسه ونتكلم عن بديهيات إن الغش حرام وإن التعليم في حد ذاته هدفه التعلم مش النجاح والمجموع.
وحتى لو السوشيال ميديا مهتمتش بالأستاذة وداد حمدي بطلة الواقعة لكن وزير التربية والتعليم د.طارق شوقي اهتم واستقبلها النهاردة، وخلال الاستقبال دا الأستاذة وداد قالت إنها فرحانة إنها بتتكرم من الوزارة وإن اللي عملته دا واجبها وواجب كل معلم وإنها اتعودت تتبع أخلاقيات المهنة من ساعة ما بدأت تشتغل مدرسة، ولما الوزير سألها عن رأيها للقضاء علي حالات الغش جاوبت بمنتهى الحسم إنه من الضروري إتباع إجراء بمنع تواجد أي ازدحام أمام المدرارس خاصة فترات الامتحانات لأن دا بيأثر بالسلب على انضباط عملية الامتحانات داخل أسوار المدارس.
أستاذة وداد حمدي قالت رسالة لكل ولي أمر وهي أحسن حاجة لازم كل أولياء الأمور يركزوا عليها: "أزرع جوة ابنك اجتهد وذاكر وأعمل اللي عليك وبلاش تبص للدرجة هتوصل لتحقيق حلمك بدون غش".
وبرغم إن د.طارق شوقي كرمها وأهدى ليها شهادة تقدير تكريمًا لها على تفانيها في العمل، إلا إننا عايزين نقول لأستاذة وداد أنها نموذج مشرف ومخلص لعمله، وفاهمة أهمية منع الغش وإننا هدفنا من التعليم مش إننا نمتحن الطلبة ونخوفهم بالسقوط ونحفزهم بالدرجات العالية، إحنا هدفنا انهم يتعلموا معنى العلم، ويعرفوا أهميته وإن المجتمع محتاجهم يحققوا حلمهم بالاجتهاد والمذاكرة والفهم مش بالغش.
#بالعامية_المصرية