بالـــراحه شويه عالورقه ياعمو

[أسيل رزق]

على فكرة الموضوع مش فى وقته المناسب خالص

وحكاية الظلم ده من وجهة نظرى بتكون حالات نادرة جداً

ممكن أقولك إن التصحيح بالذات فى مدرسين مش بيراعوا الطلاب كويس

بس لو الطالب أصلاً عامل حاجة فى الورقة مخلى اللى بيصحح عايز يحرق الورقة بصاحب الورقة زى مثلا نقش الفراخ ( الخط الوحش يعنى ) وعدم تنظيم الورقة بيلاقى كله سايح على بعضه وحاجات بالمنظر ده

مش كل حاجة نرميها على المدرس ..

وماننساش برده إن المدرس اللى بيصحح ده مثلاً ممكن يكون ساكن فى مصر الجديدة ورايح يصحح فى السيدة زينب وهيصحى من احلاها نومة وينزل يتشحطط فى المواصلات ويمكن يكون مافطرش و الجو حر ويدخل على أول ورقة ويصححها تخيلوا لو الورقة معجبتوش ولا لقى فيها شىء غبى إستفزه بصراحة أنا لو مكانه مش بعيد أقطع الورقة و أولع فيها

و غير كل ده فى طلبة كتير جداً يخرجوا من الامتحانات مبسوطين جداً وبيقولوا إحنا مقفلين الامتحان و يحبطوا اللى خارج مصدوم من الامتحان ويوم النتيجة نلاقى المصدوم ده جاب أعلى من اللى خارج فرحان

ده لسببين .. يا إما اللى خرج مبسوط ده كان عايز ينجح وبالنسبة ليه كلمة مقفل الامتحان يعنى ناجح
يا إما هو فعلاً متأكد من كلامه ويقول أنا اتظلمت و لما يقدم التماس أو تظلم يروح يشوف الورقة يلاقيه غلط فى نقطة معينة فى مسئلة مثلاً ضيعت منه 5 درجات وهكذا ..

فا ممكن يكون الطالب هو اللى غلطان أصلاً حط سالب بدل الموجب وكمل .. نفى الجملة وهى المفروض تتثبت .. إلخ

أنا بقى اتظلمت بس مش فى التصحيح ولا الثانوية العامة كانت فى نتيجة اولى اعدادى المفروض المجموع 343 هما غلطوا فى الجمع وخلوها 323 وكانت أيام مايعلم بيها إلا ربنا .. و كانت غلطة 3 مدرسين واتنقلت من مدرسة لمدرسة وانا ناقصة ال20 درجة بس الحمد لله رجعتهم