ممكن تعرفنا بحضرتك ؟ ممكن ؟

[اية عميش]

اولا مشكور على الموضوع ما شاء الله حلو جدا

الصراحة انا دخلت اكتر من مرة و كنت هارد بس كنت مترددة شوية اصل سؤالك صعب اوي على الاقل بالنسبة لي يعني لسه بدور على نفسي حاسة اني مش وصلتلها بالضبط

المهم بقى انا هاعرف نفسي على قد ما انا عارفاها

انا اية مصرية بحب مصر جدا طبعا بس مش حاسة انها حاجة ممكن افخر بيها اوي علشان كده ان شاء الله نفسي اغيرها طبعا مش لوحدي . و مسلمة و افخر بذلك و مش مقتنعة بفكرة التقسيمات و الفرق اللي فيها ديه يعني انا مسلمة و بس مش منتمية لاي حزب سياسي لغاية دلوقتي بس انا اميل للمعارضة بس مش على طول معاها و مش بحب اقيد دماغي بفكر معين يعني بحب اخد من كل حاجة الجزء اللي عاجبني مش بحب فكرة اني اتحيز لشئ . مؤمنة جدا بان الولد مش ازيد من البنت في حاجة وبضايق جدا لما اشوف حد معتبر البنت كائن درجة تانية او اقل من الولد و مؤمنة بان لكل واحد حريته اللي المفروض مش حد يدخل فيها و لكن بردو مش تضر اللي حوليه يعني مقتنعة بان انت حر ما لم تضر. متهيألي ان فكري مش غريب اوي رغم ان في البعض بيشوفني اني غريبة بس اصل مش كلنا واحد فاكيد لازم يكون في اختلافات بنا

انا مش اجتماعية و مش بسهولة اني اكون صداقات و مش بحب الضوضاء و الزحمة و مش بحب اني اتكلم كتير يعني بحب اسمع اكتر من اني اتكلم علشان كده في ناس بتشوفني مغرورة. و مش سهل ان حد يعرف انا بفكر في ايه ولا ايه جوايا.
بالنسبة بقى للرياضة و كده انا مش ليا في الكورة اوي بس انا اهلاوية و بحب اتفرج على الجمباز و بحب اتفرج بردو على الباليه جدا


اعتقد مش عندي حاجة تاني اقولها و لو اكتشفت حاجة تانية هابقى اقولها و لو في اسئلة تانية فانا موجودة ان شاء الله

مشكور على الموضوع

و اسفة على الاطالة