|
||||||
| ركن العائلة منتدى يهتم بكل ما يخص الأسرة ( زوج - زوجة - أبناء ) |
|
|
أدوات الموضوع | انواع عرض الموضوع |
|
#11
11-07-2009, 12:20 AM
|
||||
|
||||
موضوع ظريف
 ع الرغم انه هيسبب ذكريات مؤلمه للبعض مضحكه للبعض الاخر الا ان شخصيا ذكرياتى ومواقفى مع المطبخ قليله ومخزيه الصراحه يعنى لانى لغايه دلوقتى والحمد لله كانت اكبر مهامى المطبخيه قليه كام بيضه وكبايه شاي اللى الصراحه نادر لما تطلع كويسه بس منذ الصغر ونظرات الخوف كانت بتطلع من عين ابويا وامى ( او بابى ومامى لزوم الرقه المصطنعه ) لمجرد دخولى المطبخ لقضاء ابسط الاحتياجات اشرب ميه اجيب طبق جيلى - بحب البتاع ده- ولانى والحمد لله اتمتع بخيال خصب بطريقه مبالغ فيها اوى يعنى فكانت كل حاجه بتكلمنى صاحبتى بمعنى ان التلاجه كانت اعز اعز اصحابى الصراحه عمرى مطلبت حاجه وقالت لا والارانب كانت الاناتيم :D -احيانا الحيوان والجماد بيفهمك اكتر من الانسان- وبما ان الموضوع متعلق بالمطبخ ولانى وعدت ارنبى ان اقول قصتنا -زمان قبل ميتم قتله مع سبق الاصرار والترصد- وانى هنشرها حتى لو فى مجله ميكى المهم ان الاخ الارنب ده كان سبب فى قطع علاقتى مع الوالد والوالده لمده اربع ساعات تقريبا وذلك لانه الارنب الوحيد اللى فهمنى وكان الوحيد اللى اكل من ايدى جزر دونا عن اولاد العماره كلهم الا ان بابا قتله اودبحه -لتجميل الصوره - وبعد بكاء وشحتفه وتشنجات عصبيه منى ومن الارنب اعتراضا ع هذا القرار الذى يخرق كل قوانين حقوق الحيوان -ع اساس ان احنا فى بلدنا بنحترم حقوق الانسان- الا ان بابا ضرب بكلامى ونهنه الارنب مش عرض الحائط بس لا وطوله كمان وتم قتل الارنب ذا اللون الاسود والعيون الحمرا والفيونكه الفوشيا -كان جميل والله-  ومن هنا اندلعت الحرب فى البيت واقسم بالله اننى لم اتذوق -غير الرقبه بحب امصمصها- *** وفى يوم من الايام الغبره -لا اعادها الله- طلبت الحاجه الوالده انى اعمل طبق سلطه الموضوع قد يظهر للبعض تافها فى الوقت اللى كان عمليه انتحاريه من الدرجه الاولى بالنسبه لى وبعيدا عن صباعى اللى كان هيطير من السكينه الا ان والحمد لله اتعمل احلى طبق سلطه بس الصراحه بردو ان الضيوف اللى عندنا كان سبب فى عياطهم بل والوصول لدرجه الشحتفه طبعا مش عشان فكرت عمو بطبق سلطه مامته الله يرحمها  الا ان كميه الفلفل الاسود والشطه كانت ممكن تحل مشاكل كتير فى البلد برطمان الشطه ادلق منى -غصب عنى والله- فكانت النهايه المآسويه وطبعا الضيوف دول منوروناش تانى *** وبما ان الموضوع واقع ملبوس (ملموس يعنى) والمنحوس منحوس وان الواحد اتفضح وبقت سيرتنا ع لسان كل زائر هقلكم ع وصفه جميله اسمها (الروموعسل) كلمه مش أبيحه الترجمه تحت الرو=الرومان مو=موز عسل عسل مش عاوزين زكاوه حطوا حبات الرمان ع شرايح الموز وعليهم كميه من العسل الابيض ودوق وان شاء الله خير *** الا انى مازلت اذكر حريق مطبخ عمتى واللى كنت سبب صريح فيه وطبعا اعتقد ان الموضوع ناقصه ريحه الشياط دى واللى بقيت مشهوره فى العيله بمستر كيس بدلا من اكس وسبب الحادث الاليم وهو كان حريقه فعلا بجد حقيقى حيث كنت فى زياره تقيله لعمتى وكنت قاعده مع بناتها نشاهد احد افلام الرعب ع mbc2 والصراحه الواحد مدمن افلام رعب ومع استغراقنا فى مشاهده هذا الفيلم نسيت الزيت ع النار واللى كان من المقرر وضع بعض شرايح البطاطس لنفاذ المؤنه بتاعتنا من الكرانشي المهم انا اتشغلت بمشاهده لقطات الفيلم حيث تقدم البطل -اللى مطلعش بطل فى الاخر- من البطله - اللى مطلعتش بردو البطله - واداها بالسكينه اللى مازلت متأكده انها مطوه قرن غزال متسربه من مصر لامريكا المهم ان احنا لقينا نور احمر فى اخر الطرقه طبعا واضح ان احنا كنا متأثرين فطنشنا الا ان فى الاخر اكتشفنا ان المطبخ ولع والحمد لله الذى لا يحمد ع مكروه سواه واولاد الحلال كتير متقلقوش ومن ساعتها بطلت ادخل مطابخ *** وقررت ان شقتى فى المستقبل البعيد اوى اللى هو مش هييجى ان الشقه هتتجهز من غير مطبخ ولكن كعاده كل امهات مصر وان البنت ملهاش غير بيت جوزها وانى لازم اتعلم وضل راجل ولا ضل حيطه واللى ملوش كبير يسيب البلد احسنله ويطير او يعد ويجيله انفلوانزا خنازير ومتسألش ايه علاقه ده بموضوعنا كانت ماما بتاخدنى من ايدى وتقعدنى اتفرج عليها عشان اتعلم واشوف النفس العربى الاصيل والمغامرات والالعاب الاكروباتيه الا انى بكتفى بالغنى والترزيع فى الحلل فى الاخر بطرد طبعا من المطبخ وانا بفضل كده وبما انى طفله وديعه-بلاش تريقه يا ست زينب- ومليش فى التهزيق وقله القيمه كانت ماما دايما تصبرنى وتقلى ان شاء الله فى انطلاقه تانيه وهتبقى كويسه فى المطبخ وكنت بكتفى بالنظر لرجل الكنبه وافتكر الرئيس المبارك اللى بيوعدنا دايما بالانطلاقه التانيه واننا ع مشارف مستقبل احسن وان قضى ربع القرن اللى فات فى الانطلاقه الاولى هل كان يقصد انطلاقنا فى المطبخ ولا احنا اصلا مش قادرين ع التقدم حتى لو استعنا بخبرات اجنبيه او حتى بخبرات منى عامر كفايه كده شكرا يا محمد ع الاستضافه الكميله :D آخر تعديل بواسطة COoL HEaRT ، 11-07-2009 الساعة 05:02 AM 
|
| العلامات المرجعية |
«
الموضوع السابق
|
الموضوع التالي
»
العرض الشجري
|
|
جميع الأوقات بتوقيت GMT +2. الساعة الآن 08:27 PM.
