ممكن مساعدة طلاب ادب قسم علم نفس ضرورى؟؟

[أسيل رزق]

أنا لو كنت أعرف إنك عاملة موضوع كنت كتبت الرد هنا على طول
بس كويس إنك عرفتى المطرح

ألف مبروك الأول على الإفراج النهائى من الثانوية

القسم جميل جداً بس عايز اللى يحبه و يتابع فيه لإن المواد محتاجة مذاكرة
بالنسبة لمستقبل القسم فا لما تتخرجى هتكون وظيفتك أخصائية نفسية فى مدرسة أو مستشفى أو أى مصلحة حكومية و طبعاً ده بيكون ب100 جنيه فى الشهر دا لو لقيتى وظيفة بس لو حبيتى حكاية أخصائية نفسية يستحسن تاخدى قرصات تنمية بشرية و غالباً الكلية يتنزل قرصات تنمية بشرية و كمان قرصات لغة و هتكون فرصتك فى الشغل أفضل بكتير ..
لو شديتى حيلك فيه و ده سهل تعمليه بس مع متابعة ومذاكرة و ربنا أكرمك فى تقدير ال4 سنين و بقيتى معيدة هيكون مستقبلك كويس جداً و ممكن لو ربنا وفقك و بقيتى دكتورة تاخدى حاجة اسمها رخصة العلاج النفسى يعنى ممكن تفتحى عيادة نفسية و نيجى نتعالج عندك ..
أو لو حبيتى تكملى مشوار علم النفس و تعلمى أجيال يعنى تبقى مدرسة علم نفس هتاخدى حاجة زى المعادلة أو بنسميها سنتين تربوى هتقضى سنتين فى كلية التربية هتاخدى مواد تربوية خاصة بالطلبة و تبقى مدرسة علم نفس و يبقى لونك أخضر هنا فى المنتدى و على فكرة أنا من وجهة نظرى إن خريجى آداب و خصوصاً علم نفس اللى بيطلعوا مدرسين بيكونوا أفضل من المدرسين المتخرجين من كلية التربية لإن بتوع آداب بيكونوا شربوا علم النفس و تعمقوا فيه أكتر من بتوع تربية ..
غالباً بيكون القسم بنات و بيدخلوه للإستفادة منه فى مستقبلهم مش للتوظيف ..
كفاية إنك هتتخرجى و هتكونى على وعى بكافة عقول البشر و على فكرة الدراسة فى القسم مش نظرى بس عندنا نظرى و عملى و بناخد مادتين لغة " إنجليزى " و طبعاً بندرس كل حاجة عن علم النفس و العلوم المتعلقة بيه زى البيولوجى و الإجتماع و الفلسفة والمنطق و حقوق الإنسان و غيرهم ده بالنسبة لسنة أولى .. من تانية لرابعة بتبدأى تتعمقى فى علم النفس بصورة كبيرة و فى عين شمس سنة تالتة اتقل سنة فيها حوالى 13 مادة و فى رابعة بتنزلى تدريبات عملى فى المستشفيات

يا رب أكون قدرت أفيدك

حقيقى سعيدة جداً إن فى حد فكر يتجنن و يدخل علم نفس

و ربنا يوفقك يا قمر