د فاطمه عبد الحميد باحث مساعد في المركز القومى للبحوث
الاسم: فاطمة عبد الحميد
سنة التخرج: 1998- جامعة المنصورة
المؤهل: ماجستير كيمياء حيوية 2004 و مسجلة دكتوراه بقالي 3 سنين
الوظيفة: باحث مساعد في المركز القومي للبحوث
ما تفتكروش ان الوظيفة دي جت على طبق من فضة بالعكس انا من يوم ما اتخرجت و انا حطيت هدف في دماغي لازم اسعى له كان بكل سهولة اخد دبلومة اسكندرية و ارفع قضية و افتح معمل اقعد فيه زي الباشا بس الحكاية مش كل طموحاتي
طموحاتي ان العلم اللي اتعلمته مش لازم يقف عندي لازم اتعلم زيادة و اوصل علمي ده للناس و علشان اتعلم زيادة لاوم اتعب و اجيب العلم و لو في الصين و اكتسب خبرة كتيييييرة علشان اقدر اقف قدامكوا دلوقتي و اديلكم الخبرة دي فيه مثل انجليزي بيقول N pain No gain يعني بالبلدي ان ما كنتش هاتتعب مش هاتلاقي ان مكنتش هاتزرع مش هاتاكل انا من يوم ما تخرجت اشتغلت في حاجات كتير و تدربت في معامل تحاليل بدون مقبل طبعا لمدة طويلة و بعدين اشتغلت في مركز ابحاث خاص كنت باشتغل و باحضر ماجستير كنت باسافر من بلدي و اجيب عينات و ارجع تاني في بلد تانية و اعملها في محافظة تانية كنت باكتب رسالة الماجستير بتاعتي و في نفس الوقت لما باحتاج حاجة ناقصاني في الكتابة بادور عليها في مكاتب كتير زي مكتبة اسكندرية -معهد البحوث الطبية في اسكندرية-طب القاهرة - طب عين شمس - طب المنصورة كان طموحي مالوش حدود كنت عايزة الرسالة بتاعتي ما تبقاش شبه اي رسالة كنت باتعب جامد و ساعات بييجي عليه اوقات اقول لنفسي هاخد ايه في الاخر رسالة هاتتحط في الدرج و خلاص و بعدين ارجع لنفسي تاني و اقول ان الله لا يضيع اجر من احسن عملا
نكمل بعد الماجستير و التعب و المصاريف الكتير نزلت لسوق العمل اشتغلت مندوبة مبيعات كنت باسافر على الاقل 3 اماكن مع بعض و اشيل و اودي و الكيماويات تبقى تقيلة و اتبهدل في الشمس بس طلعت بحاجة من شغل مندوب المبيعات ده اخدت خبرة في معاملة الناس بكل طبقاتها في مجالنا من الدكتور للممرضة للفني عرفت اتعامل مع كل فئة و ارد عليها كويس و اخرج بعلاقات جديدة فادتني بعد كدة في حياتي و اتعلمت ان مش بس اللي بياخد درجة علمية له خبرة كبيرة و لا اللي بيحبس نفسه وسط معمله و ابحاثه يبقى نجح لكن اهم نجاح هو معاملة الناس و الخبرة لكسبهم في صفكو هايفيدك بعد كدة بشتى الطرق و اتعلمت كمان ان ما القيش فرصة قدامي و ما اخدهاش لا يا بيه لازم امد ايدي و اخدها لأن ربنا حطها قدامي علشان دي بتاعتي على فكرة انا ما باحبش لا وسايط و لا رشوة اتعرض عليه شغل قبل كدة فيه وسايط و رشوة و رفضت لأن ده حرام على فكرة دي مش شعارات هي دي الحقيقة لأني انا شايفة ان ده حق مش حقي المهم و قعدت سنتين في شغلة المبيعات لغاية ما جالي تعيين المركز لأنهم نزلوا اعلان في الجرايد و كنت متابعة مع واحد زميلي في اعلانات المركز و اتعينت بالماجستير و بالتقدير و عرفت فعلا ان ربنا يمهل و لا يهمل
|
08-08-2009, 09:12 PM
العرض المتطور
