الاستاذ رمضان مبروك ابو العلمين حمودة

[أحمـدنجـم]

المشاركة الأصلية كتبت بواسطة mahmoud_taha

سلام عليكم

ازى حضراتكم يارب تكونو بخير
وكالعادة وزى معظم المصريين مش عارف ابدأ الموضوع ازاى
ندخل فى الموضوع علطول
فضلت الف وادور وانكش على صورة تصف الموضوع ده فاتكعبلت فى الصورة دى فى المنتدى

وفعلا هيا دى الحقيقة
موضوعى هيبقا عن حاجتين تلاتة كدا
اولا
التعليم فى بلدنا المحروسة
طبعا الكل شايف مناهج وكلام مكلكع فى الكتب الدراسية تكاد تكون المناهج دى اختفت من قرون فى العالم معدش غير البلد بتاعتنا دى ( ليه بقا لاننا مش زى اى حد احنا مش زى غيرنا )
ماشاء الله يدخل المدرس يقعد يتكلم على مدار الحصة او المحاضرة
ومعظم المدرسين ( معظم هاه )
معظمهم يعملو نفسهم بيشرحو والطلبة تعمل نفسها بتفهم وما شاء الله شغل عصير لمون فى بعضه وكأنك يابو زيدما تعبت نفسك فى المدرسة وجيت
ودا ذنب مين
مش هنقول اساتذتنا الافاضل ولا هنقول الطلاب المبجلين هنقول العيب فى النظام والبلدى يوكل
يعنى عايزين مناهج تدري مش مناهج تتصم وتدخل الامتحانات نرصها وفى الاخر استفدنا ايه ( استفدنا صلاة النبى )
كلامك لحد كبير صح يا محمود
بس كمان لا ننكر إن فيه تطوير في التعليم
زي مثلاً نظام الجودة والتعلم النشط
اعتقد النظام دا انت ملحقتوش يا محمود حظك وحش بقى
ثانياً في حاجة يا محمود اسمها إن الطالب أصبح مصدر المعلومة وليس المعلم
ودا نظام جديد برضه إنت محضرتوش
منكرش إن السلبيات دي موجودة بس صدقني
أنا بنفسي وبصفتي معلم بدأت ألمس تطوير وتعديل لسلبيات كتيرة جداً
وبالفعل العيب ليس على المعلمين
فالمعلم يتبع نظام تعليمي
إن أحسن النظام أحسن المعلم
وإن أساء النظام أساء المعلم

تانى حاجة
الدروس الخصوصية
طبعا ماشاء الله كلنا طلبة ( طلبة علم مش طلبة قرب محدش يفهمنى صح )
شايفين الدروس الخصوصية اللى بتجرى فى العروق المصرية مجرى الدم فى الوريد
معظم المدرسين ( معظم هاه ) بيبيعو ضميرهم
تلاقى المدرس من دول ماشاء الله يدخل الحصة يرغى ربع ساعة مع الطلبة فى الفاضى وربع ساعة على ما يكتب عنوان الدرس وربع ساعة يقول الطلبة بطلو كلام يا ولاد
وعشر دقايق يفضل ينصح فيهم وخمس دقايق يقول فيهم احنا هنشرح النهاردة يا ولاد ( وفجأة الجرس يضرب ويخرج المدرس ماشاء الله فارد جناحاته وفرحان ان الحصة خلصت
صدقت وفعلاً أنا بلاحظ دا بالذات في المدارس الثانوية
ربنا يصلح الحال
والطلبة طبعا عايزة حد يشرحلها تروح جرى على اقرب مدرس ( اللى مبيشرحش فى المدرسة ) ودرس خصوصى وسبحان الله الساعة بتاعة الدرس الخصوصى يفضل يشرحها كلها وكأنه بنى أدم تانى غير اللى كان فى المدرسة
وزى ما الكل عارف اسعار الدروس الخصوصية عاملة ازاى اسعار فى السحاب ماشاء الله ( اللهم لا حسد )
شوف يا حودة اعرف إن أي عمل
في الدنيا يحتمل الحلال ويحتمل الحرام
وصدقني المعلم اللي بيعمل كده مش مراعي لضميره
وصدقني ماله ليس حلالاً
وربنا بجد يصحي الضماير ويصلح الأحوال

والطلبة ياعينى مشحتين اهاليهم وراهم
خاصة فى مرحلة الثانوية ولى الامر بيدفع دم قلبه وفى الاخر تيجى امتحانات الثانوية زى السنة اللى فاتت والطلبة تنتحر
والمدرس نفسه بيشكى من غلو اسعا ر السلع
طب بتشتكى ليه منتا كمان اسعارك نار ومش حامل هم حد
ودا ليه ( لاننا مش زى اى حد احنا مش زى غيرنا )

تالت حاجة
نهاية المطاف
لقيت الصورة دى بردو واصفة كلامى

بعد كل التعب
ابتدائى واعدادى وثانوى وجامعة يبقا حالنا كدا !!!!!!!!!!!!!!!!
مفيش شغل وكله بيقعد يتفرج على شهادته اللى على الحيط ولما يزهق يروح يقعد على القهوة على بال ماحد يجيبله شغلانة حفر فى مشروع مجارى
والحقيقة مش عارف ايه الحل فى دا
نتعلم مش نافع نطلع من التعليم مش نافع
يبقا نعمل ايه؟؟؟؟؟؟؟؟
انا عرفت الحل لو انتو كمان عرفتو اتصلو بينا وانتو تكسبو شهادة تقدير تعلقوها جمب شهادة نهاية التعليم اللى على الحيط
وبعد دا كله نقول العيب فى مين
ودا ليه ( لاننا مش زى غيرنا احنا مش زى اى حد )
........................
عارف انى رغيت كتير ( طبعنا واللا احنا يعنى هنشتريه )
استحملونى معلش
ودايما نحب نختم الموضوع
بــ
دمتم فى رعاية الله
:::::::::::::::::::
لا اله الا انت سبحانك انى كنت من الظالمين

أنا قريت موضوعك بدراية كاملة وادعو الجميع لقراءته ونقده والوقوف على ما به من نقاط هامة
بالفعل بداخله سلبيات في طريقنا لحلها
ولكن بداخله سلبيات ما زالت قائمة إلى الآن
أنا لست ضد الدرس الخصوصي
أنا معه إن أدى المعلم أمانته داخل فصله
مش أخد أجازة بدون مرتب عشان يتفرغ للبيزنس
ودا كتير
بس تعرفوا
أنا ضد كلمة معظم المدرسين اصل بصراحة انا اتعلمت حاجة من الدنيا
لما ببص على الصح بلقاه المعظم
ولما ببص على الغلط بلقاه المعظم
يعني يا ريت يا محمود نبص على المعلمين الشرفاء من نماذجهم اساتذتنا هنا على المنتدى
كيف أنهم يقبلون على عمل تطوعي لوجه الله وأنهم يساهمون في رفع العبء عن الأسرة المصرية
جزاهم الله الخير كله
دمتم في خير