. : : مجرد علاقة بريئة : : . ليس مكررا

[kaml_klamk]

السلام عليكم ورحمة الله وبركاته

مجرد علاقة بريئة
حينما تسال احد الطلاب انت واقف مع زميلتك ليه يقولك مجرد علاقة بريئة
حينما تسال احد الطالبات انتى واقفةمع زميلك ليه تقولك مجرد علاقة بريئة
حينما تسال اختا انتى بتتكلمى مع زميلك فى الشغل ليه تقولك مجرد علاقة بريئة

والعلاقة البريئة تتطور الى missed بريئة تتطور الى message بريئة تتطور الى مكالمة بريئة تتطور الى مصائب بره بريئة .

عارفين بقى إيه سبب كل العلاقات البريئة حاجه واحده بس " الاختلاط " .
موضوع الصحوبية موضوع خطير لازم نتكلم فيه .
تقريبا هو سبب كل المصائب اللى بتحصل اليومين دول اللى وصلنا للزواج العرفى والزنا كان سببه الاختلاط والصحوبية والعلاقات البريئة
افتكر مثلا وده شىء موجود فى مجتمعنا واحد اتجوز واحده عرفى بعدها علاقته باهله دمرت وعلاقته بدراسته دمرت وعلاقته بيها فى النهاية دمرت وكان بداية الموضوع علاقة بريئة

افتكرى مثلا صاحبتك اللى اتعلقت بواحد لدرجة كبيرة جدا وفى الاخر سابها واتجوز واحده غيرها وهى الوقتى فى حالة نفسية سيئة جدا واكتئاب وعواقب كلنا عارفينها وكان برضه بداية الموضوع علاقة بريئة .

كل المصائب بتخرج من الاماكن اللى فيها " اختلاط "
كل حالات الحب والجواز العرفى خرجت منين يا جماعه من الجامعة اكبر مكان فيه اختلاط
يبقى كده كل المصائب اللى بتحصل كان سببها الرئيسى هو الاختلاط

يبقى كده لازم نتفق من الاول ان اى علاقة بريئة بين ولد وبنت طريق من اوسع الطرق الى النـار والعياذ بالله .
و ان اى علاقة بريئة بين ولد وبنت طريق من اوسع الطرق الى غضب الله علينا .
و ان اى علاقة بريئة بين ولد وبنت طريق من اوسع الطرق الى خسارة الدنيا وخسارة الاخرة .

ومظاهر الاختلاط اللى بقى فى دم وعروق كل منامثلا الاختلاط فى العمل زى السكرتيرة والمدير ، الممرضة والدكتور، البائعة وصاحب المحل .. كمان الاختلاط فى التعليم مثل المدارس المختلطة من الحضانة الى الجامعه والسكاشن والدروس كل الأماكن دى بقى فيها اختلاط .

كمان الاختلاط فى الرحلات والنوادى والمصايف والشات والنت والبلوتوث .
والاختلاط فى الافراح دلوقتى الواحد يصرف على الفرح 70 او 80 الف جنيه ويخرج من الفرح ب 70 او 80 مليون الف سيئة وده اول حاجه بيقدمها لربنا جزاء وشكر لله على انه رزقة الزوجة .

كمان الاختلاط فى الاسر زى صديق الاسرة كل واحد قاعد وزوجته قاعده وكاشفه شعرها ادام صديق زوجها وسهرانين للصباح ويقولولك ده صديق العائلة

وتسالها مثلا مين ده تقولك ده ابن عمى ومين ده دا زميلى فى الشغل ومين ده دا صديقى او صاحبى ومين ده دا صديق زوجى وتقولك على كل ده عادى اما تقف معاهم امال مين اللى بقى مش عادى ؟؟
ومثلا رجل كبير واقف مع بنت واحد صحبه وتساله مين دى يقولك دى زى بنتى وتسالها مين ده تقولك ده عمو وعامل ايه يا عمو وتضحك مع عمو وتهزر مع عمو والله اعلم عمو بيفكر فى ايه " ألا ليت الشباب يعود يوما ".

وفى موقف مضحك جدا " والدة طالبة تروح المدرسة وتكون عارفة واحد جارهم مثلا مع بنتها فى نفس المدرسة وتقولة خد بالك من بنتى والرحلة اللى هتطلع لو انت مطلعتش فيها انا مش هطلع بنتى ده نسميه ايه بالله عليكم ؟؟
وتقوله كمان انا مئامنش على بنتى غيروهى معاك وهو يقولها من عنيا يا طنط و اى خدمة تانى يا طنط تقوله ربنا يخليك يا حبيبى .
وموقف تانى مضحك بس فى الجامعة " احد الشباب المعمرين فى الجامعة يعنى بقالو كتير فى الجامعه فبنت داخله لسه سنة اولى فابوها يتصل بيه يقوله يابنى دى زى اختك خدها وعرفها الكلية والكتب وكل حاجه يعنى الم يذكر قول الله تعالى " قو انفسكم واهليكم نارا " وابوها اللى بيعمل كده فى بنته بيفتح عليها باب من ابواب جهنم .

فاصبحت قضية الاختلاط الوقتى عادى جدا فى المجتمع اللى احنا عايشين فيه .

وتكلم الراجل الوقتى يقولك انا واثق من بنتى طب تعالى يا عم الواثق وشوف البنات الوقتى على ارصفة الجامعات اتنين اتنين " ولد وبنت يعنى " وتعالى يا عم الواثق اسمع هما بيقولو ايه لبعض ولما تيجى تقوله على اى موقف من دول يقولك انا بنتى غير كل البنات دى او ابنى حاجه تانية واخويا حاجه تانية انا نفسى حاجه تانية
حاجه تانية ازاى اللى بيدخل فى اى بيئة من دى هو حر فى اللى هيحصله .
دلوقتى مش قادرين نتصور درس خصوصى من غير اختلاط او دورة كمبيوتر من غير اختلاط .
مصيف من غير اختلاط او رحلة من غير اختلاط والوقتى الولد بيبقى نفسه الموبايل بتاعه يكون ممتلىء بارقام البنات .

وتيجى تتكلم مع حد وتنصحه يقولك يا عم بلاش العقد اللى انتوا فيها دى انت تعرف نيتى ايه ولا نيتها ايه احنا اخوات ولا اصحاب وحتى لو بنحب بعض فكل حاجه ادام الناس وادام المجتمع

ماذا تعنى يا اخى بانك تكلم البنت ادام الناس والمجتمع ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

هو الوقتى المجتمع اعترافه بقى دليل شرعى طب ماهى الخمرة الوقتى بقى فيها خدمة توصيل للمنازل فى القاهرة يبقى شرب الخمرة شىء عادى الوقتى ؟؟

تيجى بقى لواحد تانى يقولك ده انا بصحيها لصلاة الفجر او هى بتصحينى لصلاة الفجر ، احنا بنتعاون على تقوى الله ومرضاته من خلال اللقاءات اللى احنا بنتقابل فيها .

والاب الوقتى يقول لبنته يا بنتى انا هسيبك على راحتك بس اوعى تعملى حاجه غلط يعنى هو انت عشان قلتلها متعمليش حاجه غلط يبقى هى مش هتعمل " على اساس ان مفيش شيطان موجود "

ده بالظبط زى واحد جاب بنزين وكتب عليه ممنوع الاشتعال وسابه جوا النـــار هل كده البنزين مش هيشتعل ؟؟

هو انت عشان قلتلها ممنوع يبقى البنت لما تدخل جوا النار اللىهى الاختلاط مش هتتاثر بيه ؟؟

أفشات السينما الوقتى تحس انها افجر من الفجور والعياذ بالله ولا الدش اصبح لا يترك فى قلب كل شاب او فتاه لا دين ولا حياء ولا احترام ولا التلفزيون يتنافس مع الدش لكى يحافظ على جمهوره . من خلال عرض الصور والفيديوكليب والاشياء الخليعة .

أصبح سعار عرض المراه فى كل مكان .
دلوقتى الشاب بقى ماشى مش قادر يعمل حاجه ، والبنت ماشية مش عارفه تعمل ايه ؟؟
بتوع الثانوى ولا الجامعه ولا الكبار مش عاملين حساب يوم هيتقفل القبر عليهم ويتسالوا عن الملابس اللى كانوا بيرتدوها .
دلوقتى تفتح التلفزيون تلاقى واحده طالعالك ، تفتح المجلة تلاقى واحده طالعالك ، تفتح النت تلاقى صورة واحده طالعالك ، تفتح الثلاجة تطلع حاجه ساقعة تشربها تلاقى عليها صورة واحده طالعالك ، ناقص تفتح علبة التونة تلاقى واحده طالعالك .
كل ده الشباب بيظغط وبيظغط ينزل الشارع او الجامعة يلاقى الفرصة مفتوحة ادامه

ده باب من ابواب الهلاك وهى الاختلاط . يقع الشباب فورا فى الاختلاط .

" عايزين نعمل فيلم كده اول مشهد فيه متصور من ساعة الجامعة الصبح لحد الساعة 3 العصر من تبرج وسفور وعرى والعلاقات اللى الله اعلم بيها ، والمشهد التانى متصور من فرح فى فندق اى فرح من افراح المسلمين فى اى فندق من الفنادق بما فيه من تبرج وعرى وسفور ، والمشهد الثالث مشهد لبلاج من احد البلاجات وقت الصبح ، ومشاهد كثير وناخذ هذا الفيلم ونطلع بيه على رسول الله صلى الله عليه وسلم نقول له شوف يا رسول الله شوف حال المسلمين وصل لايه يا رسول الله .
قضية الاختلاط يا جماعة انا ليه اتكلمت عنها ليه مثلا متكلمتش عن الزواج العرفى مثلا او اى موضوع لان موضوع الاختلاط هو تقريبا السبب فى معظم المشاكل اللى بنقابلها فى حياتنا .


"احد الفتيات اتصلت باحد الشيوخ وكانت منهارة تماما فسالها الشيخ ما بكى يا اختى ؟؟
فقالت بدات العلاقة طبعا مش صداقة دى كانت علاقة بريئة دى مكنتش علاقة اصلا ده كان كلام برىء تطور الى علاقة بريئة تطور الى علاقة غير بريئة ثم الجريمة التى يهتز لها عرش الرحمن ولا يهتز لها عرش الانشا جيمة الزنا والعياذ بالله وبعدين البنت عايزه تخرج معاه وتتفسح معاه فقالها قولى لاهلك انك بتشتغلى فى شركة وانا هديكى 600 جنيه فىالشهر تديهم لاهلك على انهم المرتب " طبعا الشاب كان غنى " وتمشى معاه زى ماهى عايزه وطبعا من غير جواز وبعدين فوجئت انها حملت فكانت واثقة فيه تمام الثقة فرفضت تجهض نفسها وبعدين قعدت لحد اما مكنش ينفع تجهض نفسها فقالتله اعمل ايه قالها اتصرفى فذهبت لوالدته مسحت بيها الارض طب تعمل ايه بدات مظاهر الحمل تظهر عليها فخافت من اهلها فقال لها قوليلهم انك هتسافرى تبع الشغل عشان تهربى فقالتلهم على موضوع السفر طبعا اهلها رفضوا ازاى بنتنا تسافر لوحدها فقالها قوليلهم انك هتاخدى ثلاث الاف جنيه مقابل السفر ده طبعا أهلها وافقوا وطبعا يا بنتى احنا واثقين منك ومش هتعملى حاجه غلط وسافرت وقعدت شهر ولسه معاد الولاده مجاش فاتصلت وقالتلهم خلاص اسبوع او اتنين ثم تمت الولاده وعادت الى اهلها ولكن عندما فاقت من الولاده لم تجد ابنها وعندما سالت عنه قالوا لها بعدين بعدين وطبعا عادت الى اهلها بعد الولادة مباشرة وهى فى قمة التعب وعندما سالوها يا بنتى فى ايه قالت انها وقعت من على السلم فقالو لها معلش يا بنتى اتفضلى ادخلى ارتاحى .

طبعا البنت منهارة لسببين :
الاول انها فقدت ابنها الله اعلم راح ملجا ولا دار ايتام ولاايه بالظبط .
الثانى انها فقدت عذريتها وخسرت كل شىء . "

قصة اخرى
فى يوم من الايام كان هناك سائق تاكسى عائد الى بيته فىساعة متاخرة من الليل فوجد امرأة فى طريقة تستغيث به ان يوصلها الى اقرب مستشفى فوافق السائق على الفور رفقا بحالتها فذهب معها الى المستشفى وسلمها الى المتخصصين فقالوا لهسجل اسمك هنا فقال يا جماعه انى سائقتاكسى وهى استنجدت بى فوصلتها وليس لى علاقة بها فقالوا له لابد من تسجيل اسمك وباقى البيانات عنك ثم سجلها وذهب الى بيته وتانىيوم اتصلوا به فاخبروه – مبروك جالك ولد – فقال لهم يا جماعة والله ليس لى علاقة بها فقالوا اذا يجب عليك التحليل D N A وبعد التحليل اتصلوا به وقالوا انت فعلا مش والد هذا الطفل قالهم يا جماعه منا قلتلكوا من الاول قالوا له انت اصلا مبتخلفش فتعجب الرجل !! ازاى مبخلفش وانا عندى 5 اولاد فذهب الرجل وحلل مره اخرى على نفقته الخاصة فاتضح له نفس الكلام فذهب الى بيته بعد نتيجة التحليل وسال زوجته " اولاد مين دول ؟؟؟؟؟؟؟ فقالت له زوجته أولاد اخوك !!!!!!!!!!! لا حول ولا قوة الا بالله

تخيل 5 أولاد فى كام سنه وصاحبنا نايم فى العسل .
وصدق رسول الله صلى الله عليه وسلم حين قال " الحمو الموت "


هنا بقى انا عايز اكلم اللى بيقول الوقفة مش حرام الا لو تطورت لحب او لغير ذلك

بمجرد انك تقف مع البنت يبدا عدادا السيئات فىالعد

اسمع معى قول رسول الله صلى الله عليه وسلم " كتب على ابن ادم نصيبه من الزنا مدرك ذلك لا محالة : العين تزنى وزناها النظر ، والاذن تزنى وزناها السمع ، واليد تزنى وزناها البطش فما هو البطش يا رسول الله قال اللمس واللسان يزنى وزناه الكلام والقلب يهوى ويتمنى ويصدق ذلك الفرج او يكذبه ".

شفت بقى ان الحب 6 انواع من الزنا

طب انا هسال كل واحد وقف فى موقف اختلاط وليس حبـــــــا

1 - انت حاسس بعد ما خلصت الوقوف معاها قربت من ربنا ولا بعدت عنه ؟؟
2 - الارض اللى انت وقفت فيها معاها هتشهد ليك ولا هتشهد عليك يوم القيامة ؟؟
3 - فى ملك يمين بيكتب حسنات وملك شمال بيكتب سيئات هل وانتواقف اكتبلك حسنات ولا سيئات ؟؟
4 - قلبك بعدما خلصت الوقفة دى مايل انه يروح يصلى ركعتين لله ولا مايل لسماع الاغانى ويعيش حياته ؟؟
5 - كل يوم بتعملفيه طاعات بتزيد املاكك فى الجنة وكل يوم بتعمل فيه معاصى بتزيد املاكك فى النار ، اليوم اللى انت وقفت معاها فيه انهى املاك ليك هى اللى هتزيد اللى فى الجنة ولا اللى فى النار ؟؟


كل الكلام اللى فات ده عن موضوع واحد وهو الاختلاط
والاختلاط هو اللى بيسبب العلاقات البريئة اللى بعد كده بتكون علاقات غير بريئة

كده انا خلصت موضوع العلاقات البريئة واسبابها وتطوراتها

انا هتكلم باختصار عن العلاقات اللى بين الشباب والبنات :
طبعا يا جماعة كل المسلمون والمؤمنون اخوة بمعنى ان البنت اللى انت بتحبها دى اختك فى الله طب بتحبها ليه ؟؟ والمشكلة ان الحرم الجامعى او الجامعة هو البؤرة لكل هذه العلاقات المحرمة
تعالوا نسال احد الشباب كده فى الجامعة انت حبيت كام مرة تخيل هيقولك ايه !!! انت قصدك على السنة الاولى ولا السنة التانية والتالتة ولا الرابعة ؟؟ ما رايك بهذا الرد
تقوله فى الاربع سنوات على بعض يقولك متعدش واحد تانى يرد ويقول انا مكنتش فاضى فكانوا حوالى 15

اول ما الشاب يدخل الجامعة يلاقى بنات كتير جدا يقول كل دى بنات يبدا بقى يختار البنت اللى هو عايزها او البنت اللى بيحلم بيها او حسب اختيار كل واحد .
واحد يقولك انا عايز اكلم واحده شعرها اصفر وعنيها خضراء واسنانها زرقاء ده اللى هو عايزه .
واحد تانى يقولك انا عايز اكلم واحده تكون محترمة ولابسة خمار او نقاب " والله بيحصل انزل جامعة المنصورة تلاقى المنقبات ماشيين مع الشباب " سيجازيهم الله على تشويه صورة الاسلام .

تدخل الجامعة بقى تلاقى اغلب الشباب والبنات ثنائيات كل خروف ساحب معزة وهيمانين وقاعدين فين بقى فى شارع الحب اللى جوا الجامعة . وتلاقى الولد والده شغال طول اليوم وطالع عينه فى الشغل عشان يصرف على ابنه فى المقابل ابنه بيشتغل ايه ؟؟ حبيييييب .
وكل الافلام اللى شافها زمان عايز يطبقها فى الجامعة ماهى حاجات مكبوتة وطبعا عايز يعمل قصة حب تسجل فى التاريخ زى قيس وليلى ، بكيزة وزغلول واخر حاجه كانت احمد ومنى ولا فى حاجه تانية الله اعلم ....

وتلاقى واحد عامل علامة على التيشرت بتاعه مثلا وتساله علامة ايه دى يقولك انت متعرفهاش تقوله لا والله يقولك دى علامة كيوبيد تقوله ايه كيوبيد ده " كيوبيد حشرى "؟؟؟؟ يقولك كيوبيد يا سيدى هو اله الحب " لا اله الا الله " . بقى الوقتى فى اله للحب وعيد للحب فى حد موحد بالله او فى بطاقته مسلم يقول الكلام ده انت شرط انك مسلم ان تشهد ان لا اله الا الله . وبعدين الرسول عليه افضل الصلاة والسلام قال " للمسلمين عيدان " عيد الفطر وعيد الاضحى " وتلاقى الناس بتحتفل بعيد الحب والناس كلها لابسه احمر وورد احمر وهدايا حمراء .

الشاب بقى عايز يكلم البنت يعمل ايه يبدا الاول بكشكول المحاضرات مره تانية يرجع كشكول المحاضرات ويحضر معاها السكشن وهكذا مره فى مره فى مره وطبعا اكيد معظمنا عارف الكلام ده وفى مره يصرح لها بحبه تبدا البنت ترفض يحاول مره فى اتنين فى تلاته يقولها فى الاخر عشان يقنعها طب هنقعد فى مكان عام .

يبدا بقى يسالها انتى برج ايه تقوله العقرب يقولها اه يعنى شهر مايو وانت برج ايه يقولها الدلو تقوله ماهو باين !!!!! .
طبعا بقى صاحبنا روميو قلبه اتعلق بالبنت يروح المحاضرة مش مركز فى اى حاجه يفتح الكشكول يلاقى صورتها يجى ياكل فول يلاقى صورتها عائمة على الزيت وخصوصا لو كان زيت حار المهم انه بيفضل طول حياته مشغول بهذه الفتاة .
ولو هى اتجوزت حد غيرة وهما مع بعض ممكن يجنن ولو هو اتجوز حد غيرها برضه هى ممكن تجنن .
طب تعالى نسال الشاب انت بتحب واحده الوقتى جاهز تتجوزها الوقتى يقولك منين ؟؟ طب ينفع امتى يقولك يعنى انا فاضلى اربع سنين دراسة و بعدين الجيش وبعدين اخرج ادور على شغل عشان اساعد والدى وبعد الشغل يمكن اسافر بره وبعد ما تسافر بره ممكن ارجع تانى جوا يعنى وبعد ده كله يمكن اتجوز واحده غيرها . طب وليه تشغل نفسك من الوقتى ما تصبر اما ربنا يكرمك وتشغل نفسك بطاعة ربنا " اللهم اهدى شبابنا وبناتنا "
تعالى بقى للمصيبة الاكبر واحد كان بيحب واحده وبعدين ايه اللى حصل يقولك انا التزمت وبعدين دعيتها فالتزمت هيا كمان كده بقى الوضع اتغير بقوا الاتنين ملتزمين ويقولك الحب دلوقتى اختلف انا دلوقتى بقى بحبها فى الله تقوله يعنى بتحبها فى الله يعنى بتعمل ايه يقولك مبعملش حاجه غلط غير بس انى بكلمها فى التليفون تقوله بس كده حرام يقولك طب اعمل ايه انا مبعملش حاجه غلط غير كده بس وبعدين انا بكلمها وهى بتكلمنى عشان نعين بعض على طاعة الله ويتصل بيها يقولها متنسيش الليله دى يا سمسمة قيام الليل تقوله حاضر تقوم هى بقى تقوم الليل تدى وهى ساجده يارب يكون بيحبنى زى ما بحبه . يا جماعه والله الكلام ده لا يجوز ولو انت حتى خطيبها برضه ميجوزش ليه لان الخطوبة دى وعد بالزواج وليست الزواج نفسه . انما الكلام ده كله لا يجوز الا بعد عقد الزواج " كتب الكتاب فى مصر " تقولها بقى زى مانت عايز ونشوف حاجه غريبة قبل الجواز تلاقى كلام الحب قبل الزواج كتيييير وبعد الزواج الواحده تقولك دنا بشحت من زوجى كلمة بحبك تقوله مثلا بتحبنى يقولها .... يجوز . طب ليه انت متقلهاش كلمة حلوه دى مراتك حبيبتك لو انت مقلتلهاش مين هيقلها .

طبعا كل اللى احنا فيه ده اتعلمناه من الغرب هل كان نبينا صلى الله عليه وسلم يفعل ذلك ؟؟ لا والله .
الرسول صلى الله عليه وسلم كان بيعلمنا الاخلاق والمبادىء والمعاملات لقد وصفه الله تعالى وقال فى كتابه العزيز " وانك لعلى خلق عظيم " .
مشكلتنا بقى اننا بنقلد الغرب وبناخد كل ما عند الغرب الا شىء واحد وهو التقدم .
واحنا فاكرين ان ما عند الغرب هو اللى هيخلينا نتقدم ولكن بالعكس والله مافى الاسلام هو اللى هيخلينا نتقدم ونكون احسن ناس فى الدنيا زى ما رسولنا الكريم صلى الله عليه وسلم قال " تركت فيكم ما ان تمسكتم به لن تضلوا بعدى ابدا كتاب الله وسنتى " صدق رسول الله صلى الله عليه وسلم.

مثلا تيجى تسال واحد بيعمل شىء وتساله تقوله الشىء اللى بتعمله حرام يقولك لا مكروه مش حرام فتساله وتقوله انت بتحب والدك يقولك طبعا تقوله انت بتعمل حاجه يكرهها يقولك لا طبعا بقى انت مش عايز تعمل حاجه والدك يكرهها وتعمل شىء الله يكرهه .
لما تيجى تنصح واحد وتقوله ما بلاش التدخين ما بلاش المخدرات ما بلاش كذا يقولك دى مش حرام دى مكروهه مع العلم انها حرام بس نفرض جدلا انها مكروهه حسب قوله ، هل انت ترضى تعمل حاجه ربنا يكرهها دى يا جماعه بتقبح فى محبة العبد لله . لو محبتك خالصة وصادقة لله يبقى مش هتعمل حاجه هو بيكرهها يبقى دى اول حاجه البعد عن الله .
تانى حاجه التربية الخاطئة يوجد اباء لا تعرف مسئوليتها تجاه الابناء مع العلم بقول الرسول صلى الله عليه وسلم " كلكم راع وكلكم مسئول عن رعيته " . صدق رسول الله صلى الله عليه وسلم .
كثير من الاباء معتقدين ان الشهادة الجامعية هى السلاح الذى تحمى به البنت نفسها فى الزمن الذى نعيش فيه مع العلم ان البنت لا يوجد سلاح ينفعها او يحميها الا منهج الله . هذا السلاح الذى تظن انه سيحميها فمثلا لو البنت اخدت مش ماجستير لا دكتوراه وبعدين تزوجت ثم طلقت والله هذا السلاح لن ينفعها وكله يتدمر مع كلمة " انتى طالق " . فاذا اعظم سلاح تحمى به ابنتك هو منهج الله .
قول الله تعالى " وليخشى اللذين لو تركوا من خلفهم ذرية ضعافا خافوا عليهم فليتقوا الله وليقولوا قولا سديدا " كان سيدنا سعيد بن المسيب رحمه الله والله انى لازيد فى صلاتى فى الصباح فى اليوم والليله رجاء ان يحفظنى الله فيك وكان يقول ذلك لابنه بيقول له انا بزود فى صلاتى اللى هى صلاة النافلة رجاء يعنى برجو من ربنا ان يحفظك الله .
وبعدين دلوقتى لو البنت ماشية محترمة عمر الشاب ما هيفكر انه يبصلها ولو بص قلبه ولا تفكيره هيتعلق بحاجه لانه مشافش منها اى حاجه . انما التانية متبرجة شايف عينيها وجسمها وشكلها فيتعلق بجمالها وليس بشخصيتها .
ولذلك نعيب على كثير من الشباب انه يركز ان البنت جميلة فقط ويتغاضى عن كثير من الاشياء المهم انها جميلة .
النبى عليه افضل الصلاة والسلام اختارلك اول حاجه الدين
قال رسول الله صلى اللع عليه وسلم : تنكح الزوجة لاربع " لمالها وجمالها ولحسبها ولدينها " فقالوا يارسول الله ان لم نجد الاربع صفات فقال فاظفر بذات الدين سلمت يداك " اى اختار التى على خلق ودين فهى افضلهم" .
حدود العلاقة بين الشاب والفتاة " منقول من رد المشتاقة الى الجنة "
نحن نعيش مجتمع واحد فيه الشباب والفتيات ولابد ان يحدث هناك احتكاك خاصه اذا كانوا في مكان تعليمي واحد ولكن كيف يكون هذا الاحتكاك وما هي حدود العلاقه بينهما :
1)ديننا لا يعرف معني كلمه صداقه بين شاب وفتاه ،وحرم ذلك علي المؤمنين وعلي المؤمنات "ولا متخذي أخدان "،"ولا متخذات أخدان "...يعني لا يعرف ان تكون هناك علاقه دائمه بين الشاب والفتاه يتعاملا فيها كأنهما جنس واحد ،،،،،،لماذا؟؟؟؟؟
الرجل والمراه جنسان مختلفان دائما ا يريد كل منهما الانجذاب للخر ولكن الانجذاب هذا قد يؤدي الي عواقب غير محموده خاصه وان معظم النار من مستصغر الشرر ،وان منهج ديننا الحنيف في علاج اي مشكله لا ينتظر الي ان تحدث ولكن يقطع جذورها من الاصل ،فكان لزاما قطع الاسباب التي تزيد الانجذاب واولها الاختلاط
2)بفرض ان كانت هناك ضرورة للكلام ،يعني مصلحه معينه تريدها الفتاه من الشاب اي مصلحه سواء دينيه او دنيويه ،بحيث لا تتم هذه المصلحه الا بهذا الشخص فعليها الاتزام بالتي:
أ/ عدم الخضوع في القول اي عدم تليين الصوت وترقيقه ،وورد هذا النهي في سوره النور لنساء النبي صلي الله عليه وسلم الطاهرات العفيفات فما بالكم بالنسبه لنا ؟؟"ولا تخضعن بالقول فيطمع الذي في قلبه مرض وقلن قولا معروفا"
ب/مراعاه عدم الخلوة بينهما بمعني الا يكونا معا وحدهما لان حديث الرسول صلي الله عليه وسلم ينص علي انه ما اختلي رجل وامرأه إلا وكان الشيطان ثالثهما ...
ج/ان تراعي الا تزيد في الكلام عن المطلوب يعني لا يخرج عن مجال العمل او المصلحه المشتركه
د/ان تلتزم هي بحجابها الشرعي الخالي من الاسراف في الزينه الغير معطر الفضفاض الغير شفاف ..
هذه هي الشروط ،ولو فقد شرط منهم فهما علي مدخل للفتنه

وفى النهاية فى حديث عن الرسول صلى الله عليه وسلم يقول " ان الفرد ليلقى الكلمة لا يلقى لها بالا تلقى به فى النار سبعين خليفة " صدق رسول الله صلى الله عليه وسلم
حد ممكن يقولى انه ايه اللى ضمنه ان مش ممكن الكلمة اللى تقولها ليها هى دى اللى هتلقى بيك فى النار وطبعا لما حد بيحب مبيقولش كلمة واحده ده بيقول كلام كتير جداااااااااا
" اللهم احفظ السنتنا من قول السوء " " اللهم اجرنا من عذاب النار "

والله يا جماعه الموضوع كبير جدا وانا كده اختصرت الموضوع وده يعتبر ربع الموضوع فقط بس انا هختم بالحب الحلال
الحب الحلال
1 - حب الله اى حب الفرد لذات الله " واللى هيحب حد عمره ما بيعمل حاجه تزعله فما بالك انك تحب الله فهل تريد ان يغضب منك . " اللهم ارزقنا حب الله ومحبة الله لنا "

2 – حب رسول الله صلى الله عليه وسلم " فهو الذى نقتدى بسنته ويجب الا نخالف اوامره حتى ندخل الجنة ".
3 – حب الوالدين :" المفروض ان ده حب بالفطرة ولو انت اعقت والدين فان الله سيغضب عليك لان الله لا يدخلك الجنة وانت عاق لوالديك وهناك شىء جميل جدا فاذا رضى عنك والديك ودعوا لك فان دعائهما هو اعظم دعاء وهو دعاء الوالدين " .
4 – حب الناس جميعا فى الله وبدون مصلحة ويكون الحب خالصا لله والله ان فعلت ذلك ستكسب حب الناس فى الدنيا وحب الناس دليل على حب الله لك .

اعتذر عن طول الموضوع ولكن لاهميته
اعتذر عن الاخطاء الاملائية
اعتذر عن طول الموضوع ولكن ينقصه ايضا بعض النقاط

والسلام عليكم ورحة الله وبركاته

[The_Relativistic200]

انشالله يارب يفرمنى تروماى
بس انا شوفت الموضوع ده قبل كده
فين مش فاكر
وبعدين محدش بيقول علاقة بريئة مين اللى قالك كده.....؟

[kaml_klamk]

والله يا جماعه الموضوع انا مجمعه واى موضوع فى المنتدى ليا انا شخصيا .
غير منقول ولو منقول انا هكتب منقول .
حتى الفقرة اللى نقلتها من الرد كتبت جنبها منقول والشخص اللى نقلتها منه .

وجزاك الله خيرا على قراءة الموضوع عسى الله ان يهدينا جميعا

[Miss_CaR!zma]

جزاك الله خيرا على الموضوع
بس دايما النقطه اللى بتلفت نظرى
ليه انت قلت ان كلام البنت والولد على النت نوع من الاختلاط
ازاى؟
مستنيه ردك ومتفقه معاك فى باقى النقاط وخصوصا تجمعات البنات والشباب فى الجامعه
وربنا يعين الجميع لان الملتزم دلوقتى معقد وبيئه
مستنيه ردك

[kaml_klamk]

جزاك الله خيرا اخت dare angel لكن انا عايز اوضح ان المقصود بالنت هو الشات وطبعا الشات بيتطور
ممكن اسال سؤال هنا اللى بتكلميه على النت وطبعا هنفرض انك متعرفهوش او كل الكلام برىء بيتطور موضوع الكلام الى صحوبية وارقام موبايلات طبعا فى ناس هتقول انا مبديش رقم موبايلى لحد بس فى غيرك بيدى رقم موبايله يبقى هنا النت سبب من اسباب الاختلاط ولا لا

فى سؤال تانى ؟؟
فى بنات بتدخل نت من ورا اهلهم صح ايوا صح وهى عارفه ان لو اهلها عرفوا الموضوع ده ممكن يموتوها وطبعا مينفعش نخالف اوامر اهلنا والا يبقى عقوق والعياذ بالله . بس ده مش موضوعنا انما برضه يجب التوضيح

الشات كله ايه بنات وولاد وده بيتعرف على دى ودى بتتعرف على ده وبيتطور الموضوع بعد كده لو طلعوا من نفس البلد او لو مطلعوش بيكون فى اتصالات وطبعا الاتصال ده حرام حتى من غير ما يشوفها

يبقى يا جماعه فى شبهات فى موضوع النت ده

والرسول عليه افضل الصلاة والسلام ذكر لنا ان نبتعد عن مصادر الشبهات

بس يا جماعه النت نفسه عادى يعنى مثلا فى الابحاث والاستفادة من النت دى اشياء عادية

[Miss_CaR!zma]

النت زى اى حاجه سلاح ذو حدين
اهم حاجه الاستفاده
واعتقد رايك ان الاستفاده تقتصر على المنتديات بس والمواقع
لكن برده ممكن استفاده عن طريق الشات
و بصراحه مغفل اوى اللى يتعامل بسلامه نيه على اساس ان اللى بيكلمه صادق
هو اه فى ناس صادقه بس تعدهم لانهم مش كتير والنسبه الاكبر لناس بتتسلى
وعموما رايى ان كل واحد مسئول عن نفسه ادام ربنا بغض النظر عن اهله او او او....
وشكرا لموضوعك الجميل مره تانيه

يبني انا قلتلك كلمة انا لو عاوز اقنعك بتفكيري هقنعك

اما قلتلك ولمليون مرة انا مش هعصي ربنا عشان علاقه مهما كانت

وانا واضح قوي وصريح وانا مثلا لو ليا علاقة ببنت وزي الاخوات واهلي واهلها بيعرفوا وبنكلم بعض هل دي حرام ؟؟

مش فاهم يعني انتا كاتب دا كلو وفي الأخر بتتكلم كدا


يعني انتا من شوية رادد لواحد في موضوع بتقوله ادخل النت ساعه وقولته اذكر ربنا وصلي واقرأ قران

طيب انتا دلخت نت انهاردة كام ساعه؟

متشتغلنيش وحيات اغلى حاجا عندك في موضوع الحب دا لاني مليت من كتر الرد على الموضوع دا وهقولك كلمة

انا لو بحب انسانه هخاف عليها من نفسي وعمري ما هغلط معاها ومش كل التفكير للشباب متشابه

وانا مقتنع اني ليا فلسفة خاصة في كل حاجا واني تفكيري اكبر من تفكير اي حد في سني ومفتخر بكدا وانا مغرور عشان حد يقولي انتا بتتكلم بثقة ليه


ومبحبش اعك كتير انتا خنقتني بأم الموضوع دا معلش اسلوبي مش حلو بس انا طهقت حب حب حب

هو مفيش في الموقع الا موضوع الحب يجماعه فكروا في حاجا عدله شوية

سلام عليكم بات حاجا تخنق وربنا

[د.حاملة المسك]

جزاك الله خيرا
بجد موضوع حلو اوى
سبحان الله الغلط انتشر جامد فى مجتمعنا لدرجة ان كتير اوى بقوا بيقولوا على الموضوع ده عادى
يا رب اهدى شباب وبنات المسلمين يارب

[kaml_klamk]

وانا واضح قوي وصريح وانا مثلا لو ليا علاقة ببنت وزي الاخوات واهلي واهلها بيعرفوا وبنكلم بعض هل دي حرام ؟؟
اه طبعا حرام من القرآن هل عندك دليل اقوى منه قال الله تعالى " ولا متخذى اخدان " وتفسير الايه هو صحوبية الرجل للمرأه


يعني انتا من شوية رادد لواحد في موضوع بتقوله ادخل النت ساعه وقولته اذكر ربنا وصلي واقرأ قران

طيب انتا دلخت نت انهاردة كام ساعه؟
انا اقولك انا طول اليوم على النت بس بنية ايه انى بدعو الناس على النت والله وحده مطلع على النوايا وبعدين انا بشتغل فى مقهى نت يعنى كل اللى انا بعمله اضافة لشغلى
الرسول صلى الله عليه وسلم قال " بلغوا عنى ولو آية "

انا لو بحب انسانه هخاف عليها من نفسي وعمري ما هغلط معاها ومش كل التفكير للشباب متشابه.
اذا كان الصحوبية حرام زى ما ذكرنا فوق عايز تفهمنى ان الحب مش حرام
وانا كاتبلك فى الموضوع ان الحب فى انواع من الزنا فى 4 منهم للى مش بيحب للى بيقول انه مصاحب او زى الاخوات
1- العين تزنى وزناها النظر
2 - الاذن تزنى وزناها السمع
3 - اليد تزنى وزناها البطش البطش هو اللمس .
4 - اللسان يزنى وزناه الكلام
5 - القلب يزنى وزناه الهوى " التعلق بالحبيب "
6 - الزنا الحقيقى

المشكلة انى بقنعك بالقران والسنة نفسى اعرف دليل على كلامك اخ محمد !!!!!!!!!

وانا مقتنع اني ليا فلسفة خاصة في كل حاجا واني تفكيري اكبر من تفكير اي حد في سني ومفتخر بكدا وانا مغرور عشان حد يقولي انتا بتتكلم بثقة ليه

ياريت يكون تفكيرك سليم ومبنى على اسس سليمة واعتقد ان مفيش اسس غير القرآن والسنة للمسلم


ومبحبش اعك كتير انتا خنقتني بأم الموضوع دا معلش اسلوبي مش حلو بس انا طهقت حب حب حب

انا اسف انى خنقتك

هو مفيش في الموقع الا موضوع الحب يجماعه فكروا في حاجا عدله شوية
فى مواضيع كتير بعد الامتحانات انشاء الله

[Xx.Youri.xX]

انت كتبت الموضوع ده لوحدك ..

ده انت فاضى بقى .

شكرا يا مان على الموضوع .

يمكن اعرف ارد احسن من كده بعد ما اكمل القرأه .


سلامى ..

[Merooo]

جزاك الله خيرا .
بجد موضوع اكثر من رائع.
ربنا يجعله فى ميزان حسناتك ان شاء الله.

[حنان سليمان]

بارك الله فيك ربنا يهدينا و يهدى ولادنا

[يالا بينا]

بغض النظر عن التكرار
هو الموضوع حيوي فعلا
ووجود الكلام دا واقع وحقيقة
يا ريت بقى تصلحوه
كده هيبقى احسن ما تقولوا انه موجود....

[هانى الشرقاوى]

أختلف مع حضراتكم فى القضية دى
الاختلاط مش أصل المصايب اللى حضراتكم بتقولوا عليها

الاختلاط يا سيدى عنصر هام فى الحياة البشرية
وبعدين المجتمع المغلق اللى حضرتك بتنادى بيه ده ما هو بيحصل فيها انحرافات أكتر من كده
وعندك الدولة السعودية كمثال

يا سيدى
المشكلة مشكلة أخلاق وتربية غلط من الأساس
مش مشكلة اختلاط

[shorouk20000]

والله فعلا موضوع جميل