هم بيكرهونا عشان .......

[د . رفعت اسماعيل]

طب بالراحه كده يا اخى محمد فوكس
بدايه انا مصرى زيك وبحب بلدى زيك بالظبط
بس بختلف معاك فى اللى بتطرحه وبتقوله
وانا مبختلفش معاك فى ان العرب بيكرهونا انا بختلف معاك فى اسباب الكراهيه دى
فحضرتك قلت التاريخ واحنا حاربنا واحنا عملنا وسوينا
فمبدئيا كلام حضرتك غلط لان كل العرب حاربوا وعملوا وسووا مش الجزاير دى على سبيل المثال اللى ضحت بمليون ونص مليون شهيد علشان تنال استقلالها
ومش الجزاير دى هى اللى دفعت تكاليف الاسلحه اللى حاربنا بيها فى اكتوبر وهى اللى بعتت اكبر مشاركه عسكريه فى حرب اكتوبر واللوا اللى شارك فى الحرب هو اللى دافع عن السويس بعد الثغره؟
ومش العرب اللى بتقول مستعدين يحاربوا لحد اخر جندى مصرى هم اللى دخلوا سلاح البترول فى المعركه وكان سبب رئيسى فى الضغط على اسرائيل لانهاء الحرب ومش يومها الملك فيصل الله يرحمه قال انه مستعد يفضل مانع البترول حتى لو رجعوا تانى يقعدوا عالارض وياكلوا تمر
وقبل كده فى حرب 56 مش جالك متطوعين يحاربوا معاك من كل البلاد العربيه ومنها الجزاير ؟
وقبل كده مش حرب 48 دخلها كل الجيوش العربيه النظاميه وحاربوا فيها وحاربكمتطوعين برضه كل العرب؟

فحلو اوى انك جبت التاريخ لان درس التاريخ الاول اللى نستفيده ان احنا عمرنا ماحققنا اى انتصار ولا هنحقق اى انتصار الا لما نحارب مع بعض كبلد واحده وامه واحده فعلا
وده اللى حصل فى 73
فبالعكس ممكن حد يرد على الكلام اللى بتقوله حضرتك ويعايرنا ويقلنا ده احنا اللى ساعدناكم فى 73 وقبل 73 (بالمناسبه مصر كانت بتاخد اعانات من الدول العربيه بعد النكسه علشان تقدر تخللى اقتصادها اقتصاد حرب وتسد عجزالموازنه)

وتانى درس هناخده من التاريخ اللى حضرتك بتستعرضه ان تاريخنا تاريخ المصير الواحد يعنى اكيد العرب مكنوش بيساعدونا علشان حبابى عنينا انما علشان مصيرهم مرتبط بانتصار مصر فى الحرب
فده اللى لازم نستوعبه ان حنا مصيرنا واحد واللى هيئذى الجزاير هيئذى مصر واللى هيئذى مصر هيئذى الجزاير وبقية العرب واحنا اقدر اقول ان كتير اوى من مشاكلنا جاى من احتلال العراق وفلسطين
لان انت كعرب غصب عنك تعتبروا بلد واحده فى المصير والمصلحه والجغرافيا وكل حاجه

فده اللى لازم نستوعبه وده اللى يخلينا احنا اللى لازم نشوف العرب بيكرهونا ليه ونشتغل احنا من خلال اعلامنا او حتى من خلال كلام كل واحد فينا على شات او ميل او فايسبوك او غيره مع واحد عربى نشتغل على ان العرب ميكرهوناش

ثانيا حضرتك اتكلمت عن التاريخ بس فين الحاضر؟
يعنى لو زى ماحضرتك بتقول العرب بيكرهونا علشان احنا كنا احسن منهم وحاربنا وعملنا طيب كنا ده فعل ماضى فين انت كمصرى دلؤت؟
فين انت فى كل المجالات
هل انت اللى بتصدر الغاز لاسرائيل وبتطبع معاها وبتقوى اقتصادها وهى بتقتل اخوانك ومحاصر مليون ونص مليون مسلم فى قطاع غزه وخايف من اسرائيل ولما حد يسئلك انت مدعمتش حزب الله ليه فى حرب اسرائيل ضده فقلت انتم عاوزنى احط ايدى فى بق الاسد
هل انت نفسك اللى بتعمل كده وبتقول مالي دعوه بالعرب يولعوا هل انت نفسك اللى حاربت وعملت وسويت؟

هل انت نفسك اللى كنت بتعمل حضاره وبتشع ثقافه عالعالم ايام الاربعينات والخمسينات والستينات هل انت نفسك دلؤت اللى اقصى حاجه بتصدرها الرقاصات وافلام عربى ام الاجنبى وشركات الكليبات ووووووووووو
وهل انت نفسك دلؤت اللى اكتر من نص شعبك جاهل وامى واللى بيتعلمه تعليم زى قلته وانتم فى بوابة الثانويه واكيد حاسين بكلامى وتتخرج معاك اى شهاده والسلام ولا لها قيمه او فايده

هيحقدوا عليك على ايه؟ على قطوراتك اللى بتولع ولا عباراتك اللى بتغرق ولا بيوتك اللى بتتهد فى الدويقه واسكندريه وغيرهم ولا شعبك اللى بيتخانق علشان رغيف العيش ومش لاقيه ولا ايه بالظبط

فحضرتك زى مابصيت التاريخك انظر لواقعك هتلاقى قيقه مؤسفه جدا وهى ان كل العرب احسن منك دلؤت وانت مش احسن من اى بلد عربى اللهم الا البلاد المنكوبه زى السودان والعراق والصومال
اينعم بفلوس البترول بس اهم استغلوا فلوسهم واتقدموا ببلادهم انت عندك فى بلدك ثروات قد كل العرب ومبتستغلهاش ولا بتتقدم

فبالتالى انت مش احسن من اى حد دلؤت علشان يحقد عليك
وبالمناسبه بما انك شعرت بالاهانه دلؤت علشان الضرب فى المصريين ليه مشعرتش بالاهانه لما المنتخب راح الامرات يدوهم منح ونفحات بمناسبة فوزهم ببطولة افريقيا وليه مشعرتش بالاهانه لما دكاتره مصريين اتجلدوا فى السعوديه ولما مصريين اتعدموا فى ليبيا ولما مصريين خطفتهم امريكا وحطيتهم فى جوانتنامو ولما مخبر يثبتك فى الشارع يقلك بطاقتك ومتقدرش تفتح بقك
ولما تلاقى واحد من اولاد بلدك فاتح عليك مطواه وبيقلك طلع اللى معاك ولما اطفال بلدك بيتخطفوا فى عز النهار وبيتباعوا اعضاء بشريه واللى بيبيعهم اولاد بلدك ولما بتسمع كل يوم تقريبا عن حوادث ****** لبنات بلدك علىايد اولاد بلدك من غير ماحد يعمل حاجه

فاهانتك وبعترة كرامتك فى الخرطوم ماهى الا نتيجه لسلسلة اهانات طويله بتحصلك جوه بلدك وبراها وانت ساكت ومبتتكلمش

فالاهم دلؤت ان يبقى كلامك اننا نحافظ على كرامتنا جوه بلدنا على تبقى محفوظه براها

النقطه الاخيره اللى عاوز اتكلم فيها هو القوميه العربي وكلامك اننا عملنا علشان العرب وفى الاخر بيكرهونا

المشكله ان حضرتك بتنسى ان عملنا علشان العرب ده مصلحتنا اولا
يعنى حضرتك جبت مثال لاننا حاربنا فى الخليج ضد العراق فده لو احنا مكناش بنحارب تحت سيادة الامريكان كان هيبقى مصلحتنا

لان امريكا مكنتش جايه تحرر الكويت انما كانت جايه تسيطر عالبترول فلو انت كنت بقيت فعلا بجد فى الموقف ده الدوله العربيه الكبرى ودافعت عن الكويت بكده انت كنت هتبقى بتستفيد من بترول الخليج بدل ا مر ي كا

و قيس على كده كل حرب كنا ممكن ندخلها وقلنا مالناش دعوه زى حرب غزه ولبنان لو كنا ادينا دورنا كدوله عربيه الكبرى وحاربنا كنا احنا اول ناس هنستفيد ونحقق مصالحنا
وبما انك بتتكلم عن التريخ احنا مبناش السد العالى ولا عملنا نهضه الا لما حاربنا فى 56

ولو انت كنت اديت دورك بجد كدوله عربيه كبرى كنت هتبقى ليك مهابه واحترام ومحدش يقدر يمس كرامتك

وعلشان تبقى الدوله العربيه الكبرى لازم تجزب العرب ليك وتحببهم فيك
فبدل ماتشتم فى الجزاير لو انت عاوز تاخد حقك لازم تكلمهم وتشوف هم بيكرهوك ليه وتشيل اسباب الكراهيه دى

والسبب الرئيسى للكراهيه دلؤت هو الموقف المصرى ايام الحرب على غزه
فلازم يبقى كلامك موجه للعرب بانك تقولهم وتشرحلهم قد ايه احناساندنا غزه ايام الحرب ووقفنا معاها وعملنا وسوينا

بكده هتخللى الناس تحبك فكرامتك هتيجى من محبة الناس ليك
وبكده هتخللى الناس تحبك فتبقى قوى ودوله كبيره فعلا بمحبة الناس ليك