إمتيـاز مع مرتبــة الشرف

[vampire1188]

ماهو كورس iti ??

دا ياسيدي عبارة عن منحة مجانية (مابتدفعش ولا مليم) ..

وبيكون تحت رعاية معهد النظم والمعلومات iTi

والمنحة اسمها برنامج تنمية مهارات طلبة وخريجى الجامعات EDU Egypt

المنحة متقسمة لمراحل متعددة اسمها phases .. كل مرحلة منهم بتمثل جزء معين من البرنامج

المرحلة الاولى : اللغة الانجليزية

ودي تحت رعاية معهد بيرتلز للغات .. ودا أحسن واغلى مكان بيدى كورسات انجليش في مصر كلها

المرحلة التانية : مهارات الكمبيوتر

المرحلة التالتة : مهارات التعامل والتنمية البشرية Communication Skills

طبعا اظن بعد ما اطلعت على مراحل البرنامج أكيد عرفت انها منحة جامدة جدا جدا جدا

لان فيها كذا ميزة :

1- مجانية بضمير .. مافيش قرش واحد بتدفعه

2- بتاخدها اثناء دراستك .. يعني فيه توفير للوقت

3- مافيش تعارض مابينها وبين محاضراتك لان جدول الكورس محطوط بالتعاون مع ادارة الكلية نفسها

4- فيها كل حاجة انتا عايزها .. انجليش وكمبيوتر ومهارات اتصال

5- اللي حاطط البرنامج دا اصلا شركات IBM - Raya - Mobinil - Etisalat - Wasla - WebPro - Vodafone

زائد بنك HSBC ودا طبعاااااا غنى عن التعريف لانه اعلى مرتب بنوك في مصر .. بيبدأ من 4200 جنيه في الشهر

عشان تخش المنحة دي لازم يتوافر فيك حاجتين :

1- تكون جايب تقدير جيد فيما فوق في (سنة تانية)

وسمعت طراطيش كلام كدا ان فيه نية ان الدراسة تكون للطلبة سنة تانية وبالتالى التقدير هايكون للي جايبين في سنة اولي

فاشد حيلك بقى .. عشان اول سنة اساسا تنزل لسنة تالته هيا السنة دي .. فاتقدر تقول ان حظى حلو

2- انك تكون عندك دراية بنسبة جيد جدا بالانجليش والكمبيوتر

لو ماعندكش الاتنين دول .. أنصحك بلاش تروح عشان ماتتعبش نفسك

فيه طبعا حاجات تانية كتير وكلام كتير عن المنحة دي ..

وان شاء الله هابقى انزلها موضوع مخصوص شامل فيه كل حاجة من الألف للياء

أنت ناوي تدخل قسم أيه ( محاسبة _ إدراة _ تأمين ) ؟؟ ولمــاذا ؟؟

أكيد محاسبة طبعا .. ودا لكذا سبب :

1- شغل المحاسبين على قفا من يشيل .. لان مافيش حتة في مصر بتشتغل من غير محاسب

2- فرصتك لما تبقى خريج محاسبة أكتر من فرصتك لما تبقى خريج ادارة في الشغل

3- خريجى الادارة معظمهم بيطلع يشتغل في شركات مبيعات وبيتمرمطوا أخر مرمطة

وبيرسى الامر في الاخر انه يروح ياخد دبلومة محاسبة في اي حتة عشان بس يعرف يشتغل محاسب مالى

4- لو كنت خريج ادارة وعايز تشتغل في حتة محترمة لازملك واسطة تقيلة (ودا عن حاجات حصلت قدام عيني)

5- عشان تخش تأمين لازم تبقى عبقرى في الرياضة وصاروخ في الحسابات

6- لو انتا خريج تأمين وعايز تشتغل في شركة محترمة لازملك تقدير يكون عالى مش اقل من جيد جدا

وعشان كل الاسباب دي معظم الناس بتخش محاسبة .. بالرغم من ان قسم المحاسبة هوا الاصعب والارخم

طبعا انا عارف انك اتظبطت في الادارة وحبيتها وقولت انا خلاص هاخش قسم ادارة ان شاء الله

بس عايز اقولك اني كنت زيك برده .. بس لما توصل وتبقى زيى هاتغير رأيك تماماً

وعموما ربنا معاك .. عدى بس في الترم الاولانى دا وشد ان شاء الله الترم دا

وربنا يجيب اللي فيه الخير