قصيدة للشعب على لسان الريس....مش أنا اللي كاتبها متودوناش في داهيه!!!

[علاء سيف]

اخي الحبيب
القصيدة - ان كنت تراها كذلك وأنت اعلم مني بالشعر وعروضه-
اراها نوع من ادب الحشيش فقط ثرثرة مساطيل
ويجوز تنفع كلها ماعد اخر سطر على العصر الناصري
ايام ماكان اللي بيقول نكتة لصحبة بيروح ورا الشمس
مش كده برضة
اما الان فما اكثر الشتامين في الصحف والفضائحيات
ودمت بخير وموفق

[السيد صابر]

المشاركة الأصلية كتبت بواسطة علاء سيف

اخي الحبيب
القصيدة - ان كنت تراها كذلك وأنت اعلم مني بالشعر وعروضه-
اراها نوع من ادب الحشيش فقط ثرثرة مساطيل

أخي الأستاذ علاء
بعد التحية
هي فعلا من أدب الحشيش زي ما حضرتك تكرمت ووصفت
لإن الحشيش ده أصبح اشهر وأسهل من العيش البلدي
ولو حضرتك بجد عايش في مصر يبقى أكيد عارف ان مفيش ناصية فيكي يابلد إلا فيها المساطيل المحششين قاعدين واخدين حقهم على الآخر
ولو حصل وواحد راح للقسم بيرجع قبل ما يوصل ولو وصل بيخلص نفسه بالحشيش برده

ويجوز تنفع كلها ماعد اخر سطر على العصر الناصري

العصر الناصري
كان فيه حاجه اسمها صناعة ثقيلة
لكن دلوقتي فيه الصناعات الصغيرة والتي يسجن أصحابها من كثرة الديون التي لا يستطيعون أن يسددوا منها شيء ده غير البطالة المعاش المبكر والخصخصة و... و.....
وحاجة اسمها كرامه
ودلوقتي والحمد لله العالم كله بيدينا بالجزمة ومتقدرش تقول لأ
لإن معندكش حد بيحترمك في الداخل يبقى ليه تلاقي حد يهتم بأمرك في الخارج
وحاجه اسمها مصر أم الدنيا
دلوقتي صعاليك العرب وأغبياء العالم
شايفين ان احنا أنصار اليهود وذيول لأمريكا وأوربا
والسبب في الحصار على غزة والخراب اللي في العراق بتكاسلنا وتهاوننا
حتى أفريقيا
أصبحوا بيدوسوا علينا وعايزين يبيعولنا مية النيل
وكمان حاجه اسمها لا لمهادنة الأعداء
وأيام عدوان الأمريكان على العراق كان جناب الرئيس بيقول لا للحرب على العراق ودي حرب غير مشروعة وأمريكا بتنتهك القانون الدولي
وفي نفس الوقت سفن أمريكا بتعدي من القناة
ودلوقتي احنا بنحاصر غزة مش اليهود
وبعد ما كانت حماس من سنة وللا اتنين
حركة المقاومة الإسلامية حماس
أصيحت حركة الإرهاب حماس
علشان الحاجات دي العالم الغربي كله كان بيحارب عبد الناصر وعصره
أما الفقراء في إفريقيا والعرب والعلم التالت كان عبد النصر بالنسبه لهم الميه والهواء
يكفي أنه لم يفرط في حق مصري خارج بلاده
وعمل السد العالي للمصريين
وأمم القناة للمصريين
بل ساعد العرب والعالم الفقير كله
ومقلش مصلحتي والكرسي أولا
وعايز أسألك سؤال
فين اللي نافس مبارك على الكرسي الانتخابات اللي فاتت؟
ليه ممنوع من ممارسة العمل السياسي؟
ليه دخل السجن واتهموه بالتزوير؟
ولو هو مزور زي ما قالوا
فين لجنة الأحزاب اللي وافقت على حزبه من الأول؟
هو أي حد يقول عايز اعمل حزب يتعملو حزب؟
مفيش حد سأل ولا عرف هو جاب الأوراق المطلوبة لخروج الحزب للنور من أين؟
أنا معرفوش أوي ومعرفش هو ممكن يعمل إيه للبلد أو فيها
ولا هو اللي انا عايزه يكون في المنصب ده
بس مينفعش أنه يتعدم سياسيا لأنه نافس على الكرسي

ايام ماكان اللي بيقول نكتة لصحبة بيروح ورا الشمس

مش كده برضة

جايز
بس لكل شيء سلبيات وإيجابيات
ولو قارنت فساد عصر عبد الناصر بفساد العصر الحالي
يبقى بقارن بين المية والنار
أو السما والأرض

اما الان فما اكثر الشتامين في الصحف والفضائحيات

المفروض إن الإعلام بكافة أنواعه مرآة للحاكم
يرى فيها سلبياته قبل إيجابياته
واعترف إن مبارك اعطى الإعلام في الفترة الأخيرة الحرية في كثير من القضايا
بل قل
غرقنا حرية صحافة الأيام اللي فاتت
والأمر ده غريب علينا شوية
علشان كده الكل بدأ يتكلم ويقول السلبيات اللى هو شايفها
وعلشان كده بقى كتير من الناس شايفه عرض السلبيات كأنه شتائم واللى بيقول الحقيقة والواقع شتامين
لأنه مش متعود إن حد يقول للحكومة إنك غلط
وكل واحد بيعبر بالطريقة اللي تعجبه
ومع الأسف الشديد
لا توجد في هذه القصيدة الحشيشية
إلا الواقع دون أي تزييف
كل الاختلاف إن اللي كتبها قالها لعموم الناس
اللي بقى معظمهم عايش ميت
ملوش في الدنيا هم غير لقمة العيش وازاي ينسى همومه
ولو كان فيها ما يخالف هذا الواقع أرجو أن تخبرني ولكم الثواب عند الله

ودمت بخير وموفق

دمت أخي بألف خير ووفقك ربنا لما يحبه ويرضاه
بس مقلوتليش حضرتك
إيه رأيك في السطر الأخير
مش هو ده أبو الواقع وامه وخلته وعمه والعائله كلها كمان