أغلى حبيب

[الشاعر/محمد علي]

صباح دايب ف أغلى حبيب
حاضر غايب هواه مايغيب
صباح شاعر وشاعر بالبِعاد قرًّب
ولو نهرب بنتلاقى
قلوب مشتاقه تجمعها حدود الكون
ولو ما يهون علينا نكون سوا مره
أكيد ف فراقنا بنقرب
ويجمعنا الأمل بكره
سنين بتمر مابنعرف ولا بنشوف أمل فيها
مفيش ولا ذكرى تجمعنا
ولايسعنا فضا الاحلام
كلام قلناه بيتسرسب
شراع مركب نجاه
وياه بنتهادى مع الموال
وعود وامال بتسرقنا
وتسبقنا الخطى وتدق على باب العذاب يفتح
مفيش ف هواكى غير مطرح
ولو يطرح ف شبّاكك أمل مجنون
يكون مسكون باحساسك
واكون مسجون ف أنفاسك
واخاف أرحل
لتفتكرى رحيلى هروب
واكون مكتوب ف احزانك
ألم شايلاه
منين ماتروحى قدامك
أمل سيباه
تموت جواه ف أحلامك
سنين الخوف على اللى جاى
يعلن بداية رحلة فى قلب اللى فات
يبدأ خريف الأمنيات
تتحول القسوة لعذاب
ومالاقى غير قلبك حنون
بيغير الدنيا ف مسار