التوك توك

[M.Ahmed Elsaid]

اولا اشكرك على طرح الموضوع المهم
لكن زى اماكن كتير فى مصر فيها اكتر من 5 الاف توكتوك ودا عدد فوق الطبيعى

بس لو جينا نحسبها هنلاقى ان التوكتوك دا فاتح بيوت كتيرة ومشغل ناس كتيرة دى حقيقة لازم تتقال
والله انا اعرف ناس خريجين سياسة واقتصاد وحقوق ومدرسين وكتير غيرهم سايقين تكاتك حرام دا ولا حلال
طيب دا جه منين ؟! المشكلة مش فى ترخيص التوكتوك عشان المصايب متحصلش زى السرقة والخطف وغيرها المشكلة
ان الناس دى بتعمل ليه كدا بطالة بئة او فقر او جهل او غيره دا مش ذنبهم واللى عايز يعمل حاجة هيعملها من غير توكتوك
لو عايزين نحل مشكلة الترخيص المفروض الحكومة تسهل الامور شوية على اصحاب التكاتك لان حرام انه يركب فبر او صاج باكتر من 500 جنيه غير الترخيص نفسه وغيار زيت وغيره والتوكتوك بيجيب كام اصلا عشان يعمل كل دا يعنى لو فكر يرخص هيدفع على الاقل الف جنيه حتة واحدة يبقى هيروح للعيال بكام ؟؟؟
وبعدين لو كانت الحكومه رافضه وجود التوكتك مكنتش وفقت علي دخوله البلد من الاساس
لكن هنقول ايه ؟
الحكومه هي اللي سمحت من الاول لشركات الاستيراد والتجارة انهم يستوردوه
والحل من وجهة نظرى :
1- نطلب من الحكومة انها تسهل موضوع الترخيص على الناس بدال ما يبقى الف جنيه يبقى حتى 100 جنيه
2- لا يقل سن سواق التوك توك عن 16 سنة وحصولة علي رخصة سواقة
3- لا يمشى في الطرق العامة السريعة فهو مخصص بس للاحياء الشعبية والشوارع الصغيرة
وبكدا لو حصل حادث اصطدام بين توك توك واي انسان او عربية او حادث سرقة يكون للتوك توك نمرة ويتعرف ويتجاب بيها صاحبها

وربنا يحفظ امهاتنا واخواتنا وبناتنا وكل اهالينا من الشر والسوء
وشكرا مرة تانية لطرح الموضوع المهم دا