قالوا في الصعيد زمان

[blackcat.13]

المشاركة الأصلية كتبت بواسطة mezostaregypt

مع كامل احترامي للكلام اللي مكتوب ده كلة
الكلام دة غير حقيقي بالمرة
ونمسك الامور بالعلاقنية شوية

الصعيد فيه تقريبا 40 مليون مواطن
الوجه البحري فيه 40 مليون هو الاخر

السؤوال وجه بحري طلع فيه كام مليون
والوجه القبلي فيه كام مليون

وهل لو طلعت مظاهرة نقول حتي فيها 300 الف بني ادم في الصعيد ومش هقول مليونية
هل كان الاعلام هيتجاهلها - مستحيل طبعا

وبعدين العنوان مستفز
وانا برفض انه يتقال علي اهل الصعيد انهم نسوان او بنات ..الخ الخ
لاني لو احنا نسوان يبقي مصر اصلها بلد النسوان
لاني اظن الصعيد كان هو اصل الحضارة المصرية واسئلي الملك مينا وحضارة بلاد طيبة واسئلي اكتر من 35% من اثار العالم موجودة في الصعيد - تلتها فقط في الاقصر اللي بتتبع الصعيد
ولو احنا نسوان ياستي الف شكر
احنا زمان في التاريخ القديم الحريم او النسوان هما اللي حرروا مصر من حكم الهكسوس اللي ذلوا المصريين
جاه الدور علي ابناء بحري يقوموا بالواجب ويردوا الجميل ...- مش كدة ولا ايه ؟!!!


الصعيد طلعت فيه مظاهرات لكن كانت استحياء ...- لاني مكنش فيه الدافع المعرفي الكافي عند الناس علشان تطلع المظاهرات دي
وباكد ليكي كمان علي كلامي اني المظاهرات دي طلعت ربما هي مش عارفة هي طلعت ليه
لاني اللي بيحصل في بحري مظاهرات مستمرة ...انما هنا
سمعتي اني اسيوط ليها 12 يوم مظاهرات مثلا
هل سمعتي اني قنا فيها 12 يوم مظاهرات ...الخ
واي حد بيقول اني الاعلام مش بيغطي هنا
طيب ازاي مش بيغطي هنا
وهل كل التغطية مطلوب انها تكون بالكاميرات
اظن قناة زي الجزيرة تتمني فقط حتي وجود اشاعه بتقول اني فيه مظاهرات عارمة في الصعيد
السؤوال قناة الجزيرة جابت كام خبر عن مظاهرات الصعيد وكام خبر عن المظاهراه في الوجه البحري
وطبعا الجزيرة كل اعتمادها في الاساس علي فيديوهات متصورة من علي النت ومكالمات تليفونية
هل لا سمح الله مفيش كمان تليفونات في الصعيد تكلم قناة الجزيرة
انا عارف اني حصل مظاهرات في عدة مدن في الصعيد لكنها قليلة جدا جدا ومقدرش اشبهها بالمظاهرات الضخمة اللي حصلت في بحري
يعني مينفعش اشبه مظاهرة فيها 2000 واحد بمظاهرة فيها نص مليون !
ويكون معلوم لحضرتك
في الوجه البحري وبالاخص الاسكندرية والقاهرة والمحله ... للمتابع لحكرات المظاهرات في المدن دي هيعرف ...اني دي مش اول مظاهرات تتعمل عندهم وحركات التغير وتنظيمات الشباب عندهم كتيرة - غير المنظمات الحقوقية اللي عندهم
تقدري تقليلي في الصعيد اخر مظاهرة بتنقد النظام طلعت امتى


اصلي الامور تتاخد بالعقل
انا مش مستغرب اني فيه مظاهرات تطلع في القاهرة
لاني السنة اللي فاتت حركة شباب 6 ابريل طلعت بمظاهرة كبيرة وحركة كفاية من قبلها
يعني اللي بيحصل في القاهرة ده مش لاول مرة بيحصل وتقدري تقولي عليها مظاهرة متطورة
التطور دة حصل نتيجة المظاهرات اللي حصلت قبل كدة

اما في الصعيد مفيش والمظاهرات بدات تقريبا في سنة 2004
بالله عليكي في الصعيد من سنة 2004 اذكري ليا اسم مظاهرة واحدة وليها تاثير وكانت ضد النظام المصري


السؤوال بقي ليه الصعيد محصلش فيه مظاهرات - بمعني كلمة مظاهرات لاني اللي حصل في الصعيد دة مظاهرات لسة جديدة او هي اللي قلت عليها مظاهرات سنة 2004

الصعيد بختصار مطلعش مظاهرات بشكل حاشد
لانه منفصل فكريا عن الوجه البحري - ومش قصدي اقول اغبية لا سمح الله - بس هما منفصلين ثقافيا عن ثقافة الحرية السياسية في شمال مصر
اللي تقريبا بيكون الاعلام مسلط الضوء الاكثر عليه وده نتيجة لاني القاهرة والدلتا ومدن القناة والاسكندرية في الحيز الجغرافي قريبين من بعض ومؤسسات الدولة كلها مجتمعه في الجزء ده
يعني طبعا اكيد حضرتك تعرفي مثلا اني القاهرة الكبرى دي تعتبر فيها 5 محافظات
واكيد تعرفي اني كل وسائل الاعلام بكل مقوامتها وامكانياتها وركزي علي كلمة امكانيتها دي
متركزة في الوجه البحري
يعني الصعيد اقصى شئ فيه هتجدي مراسل لقناة ويبقي الف حمد وشكر لو المراسل دة معاه كاميرا بيصور بيها والف حمد وشكر لو لو فيه قناة ليها مكتب او فرع في الصعيد


غير كدة الصعيد بـ ابناءة من ايام عهد السادات ويعتبر انفصل عن الدولة عمليا واصبح ابناءة لا يعتمدون عليها بشكل كبير في امور حياتهم
وارقام العملين في الخليج من ابناء مصر هي خير دليل واللي اغلبهم من الصعيد
بعكس الوجه البحري المتركز اغلب ابناءة داخل حدود محافظاتهم - يعني محدش كتير فيهم بيسار بكثافة زي ابناء الصعيد وده معناه اني معاناة ابناء الوجه البحري بتكون اشبه بالقنبلة الموقوتة في وجه الدولة


واهم شئ بقي هو الثقافة المعرفية وخلينا نتكلم واقعيا بدون زعل
المستوي المعرفي والثقافي هناك يعتبر اعلي بكتير من المستوي المعرفي في الصعيد خصوصا لو عرفنا اني مصر فيها نسبة جهل 45% ونسبة كبيرة جدا من الرقم دة في الصعيد


انفتاح المجتمع القاهري والسكندري وبعض محافظات الدلتا
منتشر عندهم ثقافة الانترنت اكتر من عندنا بكتير
والدليل علي كدة شوفي كام موقع مصري اصحابة من الصعيد وكام موقع اصحابة من الوجه البحري
وكام نسبة مستخدمي الانترنت في الوجه البحري وكام نسبة مستخدمي الانترنت في الوجه القبلي



انا عارف اني كلامي ده بيزعل بعض الناس بس الحقيقة لازم تتقال


الصعيد مش نسوان او عالم جبانة بالعكس
الصعيد منقطة صعبة جغرافيا يعني منطقة مهئية جدا لاي صراع واكيد شفتي حتة قرية صغيرة اللي اسمها النخيلة اللي كان فيها عزت حنفي تاجر المخدرات وشفتي لما الداخلية فشلت في اقتحام الوكر بتاعه - واستعاتن بالقوات الخاصة من الجيش علشان تقدر تقتحم المكان بتاعه


والصعيد اكبر نسبة سلاح موجودة فيه واكبر نسبة عصبيات قبلية موجودة فيه
واكيد انتي عارفة اي اي خناقة كبيرة فيه بتقوم بالسلاح - مش بالسنج والمطاوي !


بس القصة كلها زي منا قلت فيه عوامل كتيرة بتدفع الناس في الصعيد انها ميكنش ليها قناعه داخلية نفسية تخليها تخرج علي النظام


عندنا في الصعيد المجتمع قبلي - وبينظر واللي فيه بيحترم دائما كبير العيلة
ومش هنكر واقول كتير عندنا بيحترموا الرئيس مبارك كا شخص
وبقول كمان اني الرئيس مكنش بينجح في استفتئاتة الا بغالبية اصوات اهل الصعيد


ممكن تقولي علينا ناس طيبين او دي عادتنا - سميها زي متسميها
بس المظهاهرات اللي طلعت دي مظاهرات انطلقت شرارتها من الانترنت - من قبل مجموعة خالد سعيد ومجموعة 6 ابريل وحركة البرادعي للتغيير
بالله عليكي الناس دي ليها وجود في الصعيد
كام ناشط منهم منتمي للصعيد وهل عمل قبل كدة مظاهرات سابقة زي ما هما عملوا


لو بتلومي علي الصعيد
لومي كمان اهل النوبة اللي الدولة ظالماهم ظلم شديد جدا من ايام عبد الناصر
له هما كمان معملوش مظاهرات


المظاهرات دي طلعت تعبر عن مجتمعها اللي انطلقت شرارتها منه
والمجتمع ده في القاهرة واخواتها مجتمع متاثر بثقافة معرفية معينة مختلفه عن الثقافة المعرفية لاهل الصعيد
وانا بقول كلامي ده لاني المظاهرات دي او الثورة دي اصحابها هم جيل الانترنت وانا اعلم واكثر درايه من غيري بـ اقول نظرا لتواجدي في شبكة الانترنت من فترة ليست بالقصيرة


وانا مش بلوم علي اهلنا هنا لاني المظاهرات والاحتجاج دي ثقافة
حرام تظلمي الصعيد اللي متعودش علي الثقافة دي

زي ماهو بردو الاخذ بالثأر ده ثقافة
حرام تظلمي او تتريقي علي اي عيلة في القاهرة مش بتحب تاخد بالثأر

وثقافة الاحتجاجات في القاهرة ووجه بحري لو انتي متابعه بدأت سنة 2004 مع ظهور حركة كفاية

وهذكر شئ تاني بسيط
في برامج التوك شو
بزمتك ياشيخة اغلب حلقاتها كانت بتجيب شئ عن الصعيد
مش كان كل شئ مختزل في محافظات الوجه البحري


يعني حتي الاعلام اصلا ساهم بشكل كبير في شعور الناس هنا انهم منفصلين عن بلدهم
وبردو الاعلام القاهري نمى وطور ثقافة الاحتجاج عن اهل القاهرة واخواتها
بكثرة ما كان ينقلة دائما من اي تجمع او مظاهرة صغيرة - بعكس الصعيد المجهول تماما بالنسبة ليهم


وانا سألت وقلت اخر مظاهرة حاشدة في الصعيد كانت امتى
هقلك انا كانت في سنة 2010 - وقامت في اخميم - وكان عدد الحشود فيها 15 الف مواطن
وسببها اعتراض اهل اخميم علي قرار المحافظة بنقل المقابر الخاصة بيهم - لمكان تاني

يعني حتي لما بنتظاهر بنتظاهر بسبب اشياء في موروثنا الثقافي تعتبر حرمات ومن اصل التقاليد عندنا
محدش بيتظاهر علشان مش لاقي ياكل لاني ده في نظر اغلب اهل الصعيد امر غير مقبول والمفروض البني ادم يتحمل الظروف ومتاعب الحياة ويصمد امامها في سبيل تحقيق هدفة - وده في اعتقاد اهل اتلصعيد من مقومات الرجولة

------------
الصعيد لما حصلت فيه فتن مع الاخوه الاقباط كانت بمثابة مدبحه
زي مدبحة الكشح
ومدبحة نجع حمادي

تعرفي ايه سببهم
بردو - شئ حصل مس العقيدة الاخلاقية عند الصعايدة
حادثة الكشح وكما ورد الجرائد سببها واحد مسيحي - ضرب ست مسملة بالقلم - علشان كانت بتفاصل معاه في السعر
حادثة نجع حمادي - قامت علشان البنت بتاعة فرشوط اللي اغتصبها واحد مسيحي

يعني حتي شوفي مش حوادث علشان مختلفين معاهم في الدين او معتقدهم لا حوادث تمس الشرف عن اهل الصعيد

يعني الصعايدة عندهم موروث ثقافي وتقاليد بالنسبة ليهم اشبه بالعقيدة حتي لو تم عولمتهم بالغزو الثقافي التكنولوجي - لاني فيه لحظات لو تم المساس ثقافتهم دي ممكن يحصل ما لايحمد عقباه - ووقتها لا تقليلي شرطة ولا حكومة

يعني نفهم من كدة اني اهل الصعيد اغلبهم او في ثقافة اغلبهم فيه اشياء معينة هي اللي ممكن يثوروا ليها....غير انهم زي مقلت سياسيا او ثقافة ارتباطهم بالواقع الحالي او الواقع القاهري تعتبر بعيدة شوية وده مش بمزاجهم لاني المجتمع القاهري هو اللي طلعهم بنفسة وبـ اعلامه خارج اطار الاهتمام اللي يستحقة الصعيد...

وبناءا عليه انا مقدرش احاسب الناس هنا علي ثقافتها - او مقدرش احاسبهم وانا معرفش ثقافتهم وحياتهم شكلها ايه ..ومقدرش احاسبهم وهما اصلا منسيين في كل شئ تقريبا

وياريت يا جماعه محدش يحكي في الموضوع دة
اللي بيحصل في بحري بيأثر علي الصعيد والعكس صحيح يعني لما كان فيه اضطراب
امني في الاقصر ومدبحة للسياح ده اثر على مصر كلها
اللي عاوز يحلل الامر يمسكة بالراحة وبدون عصبية واهانة للطرف الاخر ويشوف ايه السبب بالعقل وبالمنطق مش بالاهانة والتجريح ومحدش ينسى انها والله ثقافة - هو الصعيد كدة منطقة ليها عادات وثقافة خاصة بيها وبكل صراحة ثقافة الثورة المعلوماتية وعولمتها لسة لم تغزوا الصعيد

وعلي فكرة انا ... للمرة التانية علي فكرة برد علي موضوعك اللي عنوانة مستفز ومهين في نفس الوقت
ولو فعلا حد بيقول اني اهل الصعيد نسوان زي مبتقولي يبقي هاتي لينا المواقع واللينكات اللي مكتوب فيها كدة
ويكون مكتوب من ناس ليها مصداقية مش مجرد شباب هايف ميعرفش عن الصعيد غير انه
شوية زرع ونخل وترعه وحمير .. ! والاكل عسل اسود و مش !

انا مش بحجر عليكي التعبير عن وجهة نظرك
بس انتقي الالفاظ - وعيب تنشري موضوع بالعنوان ده في المنتديات وكانك بتاكدي افكار الناس التافهه عننا
الموضوع مش قصه اننا .. ننشر ونصحح الفكرة او الصورة عن.. اهل الصعيد
ولو علي النشر الحمد لله بالامكانية نشر الموضوع في مئات المواقع العربية مش المصرية كمان
لكن كل شئ نتكلم فيه بالعقل وبدون مبالغة
يعني نقول اللي لينا واللي علينا
الصعيد اه محصلش فيه مظاهرات كتيرة واهلة في عزوف عن التظاهرات دي
طيب هيجي واحد ساذج يقلي ليه
الاجابة بقي تحتاج سطور قد اللي كتبتها دي عشرين مرة
يعني مش علشان الصعيد مطلعش مظاهرات يبقى دول نسوان
لاء لازم نعرف ايه السبب في كدة ...
وعلي فكرة كمان بحري فيه احزاب سياسية - صحيح تاثيرها ضعيف بس همها الاول علي الاقل تركز التاثير دة علي القاهرة ونواحيها - ولما ربنا يكرمها شوية ربما تفكر في الصعيد

غير بقي وجود حركة الاخوان المسلمين واندساسها وسط مجموعات المتظاهرين
مع اني الحركة ليها تواجد قوي في اسيوط بس التواجد دة علي ارض الواقع مكنش موجود لانهم لم يجدوا من يتعاون معهم في المظاهرات - بعكس ما وجدو من تعاون او اندساس واختلاط في القاهرة واخواتها
...................
وبالمناسبة .. الجنوب دايما بيكون مظلوم في البلاد العربية واقرب نموذج عندنا اهو جنوب السودان وجنوب اليمن وده بسبب الاهتمام الزايد بالجزء الشمالي من البلاد والنظر بشكل متدني لمناطق الجنوب
...................
وياريت متغضبيش من كلامي اللي كتبتة انا داخل موضوعك انفي اغلب اللي مكتوب فيه واقول اني فعلا مكنش فيه مظاهرات في الصعيد تستحق انها يتقال عليها مظاهرات وفي نفس الوقت انا بدافع عن اهلي وبلدي او الجنوب اللي بنتمي ليه وبحاول بقدر الامكان اقول لبعض الجهلة ليه الصعيد معزول عن الاحداث دي - وكمان مش هبالغ واتبع منهج التهويل واقول ده حصلت مظاهرات حاشدة عندنا - لاني لازم الحقيقة تتقال ومعاها الترجمة او التفسير التابع ليها

تحياتي

طب ايه رايك فى فالصعيد كتير من بحرى
ومصر فيها ناس من كل حته وكمان صعايده
من الآخر قبلى وبحرى واحد ومتقلش ثقافه دلوقت فى نت وكل حاجه
وعدد السكان فى القاهره معتقدش يساوى عدد سكان اى محافظة تانى