تفتكروا الثورة فادة البلد في حاجه ؟

[sanawyastudents]

مفيش تغيرات بتحصل من يوم وليلة ...

أولا الثورة لسه مكملتش ومينفعش نحسب نتائجها من دلوقتي
لسه رأس الأفعي متقطعش ... يوم ما هيتحاسب الظالم، ويقضى علي جميع أعوان النظام ويتم محاسبتهم محاسبة عادلة، الناس هتشعر بالرضا وساعتها نقدر نقول إن الثورة نجحت، إنما للأسف الشديد محاولات أعوان النظام السابق مازالت مستمرة في إحداث الفتن الطائفية وإحداث الوقيعة بين الجيش والشعب، نشر سياسة التخوين بين التيارات المختلفة .... إلخ.
للأسف الشديد الشباب دلوقتي مشغول بإمتحانات الثانوية وإمتحانات الجامعات ... والمدرسين مشغولين بالمراقبة والتصحيح .. ولكني عندي أمل كبير أوي إن شاء الله في خلال الأسابيع القادمة سيثور الشعب من جديد ولن يهدأ حتي تتم الثورة بنجاح

ده من ناحية .... من ناحية تانية، للأسف الجيل الحالي - وإن رفض سياسة النظام السابق - تربي في عهد النظام السابق، عاش حياة من الظلم والفساد، تأثر بها بشدة، وعلم إنه لن يجد لقمة العيش إلا إذا حارب من أجلها، عاش تحت شعار "نفسي نفسي" أو " أسرتي أسرتي" ، مدرسوا الدروس الخصوصية مثلا ظٌلِموا قبل أن يظلموا .. لو كان المرتب بتاعه كافي ليحيى حياة كريمة له ولأسرته مكنش هيضطر يدي دروس خصوصية .. بس للأسف النظام السابق ربى الناس علي الفساد وقبول الرشاوى والعيش بقوانين الغابة التي تكفل البقاء للأقوي ... وحتي إن كانت الناس ذات نفسها معترضة علي تلك السلوكيات فيهم إلا إنها صعب تغيرها في يوم وليلة بعد أن تربينا عليها علي مدار 30 سنة .. الناس وصلت لمرحلة من التعود علي الخطأ إنهم مبقوش حاسين إن ده خطأ أو فساد .. بالعكس حاسين إن ده الطبيعي اللي شافوه من يوم ما إتولدوا ...
يعني مثلا بالحديث عن الأحياء الفقيرة، الطفل من يوم ما إتولد لقي إن الناس بتتخانق علي طابور العيش، لقي الناس بترمي اكياس القمامة في الشارع، لقي المجاري مغرقة الشوارع ... لو جينا إحنا عاقبنا رئيس الحي أو المحافظ المسؤول عن هذا الحي الشعبي وجبنا محافظ جديد يمسك المنطقة دي ... هل من المنتظر إن الأهالي يتغيروا في يوم وليلة ؟؟ طبعا لأ ... السبب مش إنهم مش حابين التغيير .. بالعكس، السبب إنهم ضحية المحافظ الفاسد اللي قبله اللي ربى الناس في البيئة دي لحد ما غصب عنهم إتعودوا عليها ومبقوش حاسين إن فيه حاجة غلط، وعشان نفهمهم إن المفروض ميرموش القمامة في الشارع لازم الأول نبدأ نصلح الأوضاع قدامهم، ونحسسهم إنهم كانوا عايشين في فساد وإن من حقهم يعيشوا حياة أحسن من كده ونبدأ نغير المفاهيم والسلوكيات معاهم مع الوقت، وطبعا ده هياخد وقت كبير جدا عشان نحس بتغيير فعلي، أما التغيير التام هيظهر في الجيل التالي لهم أو التالي له.

أنا بدأت بنفسي علي الأقل ، قبل ما أقول الناس مبتتغيرش بدأت أغير نفسي الأول ، الحمد لله الواحد بطل يرمي أي حاجة في الشارع ، والواحد إتعود يكلم الناس في الشارع بإحترام وإبتسامة ، إتعود لما يشتري حاجة يقول للبياع "ألف شكر" ، إتعود يركب المترو من الأبواب المخصصة للصعود ........ وحاجات كتير الحمد لله. ومازلت أؤمن بقدرات الشعب المصري علي إنجاح الثورة، ومازلت أؤمن بأن الأفضل لم يأت بعد .. ولن يأتي إلا بالقليل من الصبر والإصرار
The Best Is Yet To Come ....
Haitham