الشباب vs جوزيه

[Mimo 10]

بسم الله الرحمن الرحيم


أكيد كلنا كأهلوية يهمنا جدا مصلحة الفريق و كل واحد ليه وجهة نظر معينة

بعد رجوع الساحر مانويل جوزيه الكل بدأ يتكلم عن مصير اللعيبة الناشئين أو الشباب اللي في الفريق


أكيد طبعا بما ان الأهلي فريق كبير فلا شك ان عنده قاعدة كبيرة جدا من ناشئين على أعلى مستوى في كل المراحل العمرية

جوزيه لما جه وعد انه هيبني فريق كبير و لما بدأ بأسلوبه المعروف اللي هو الاستقرار الفني و تثبيت التشكيل بدأت الناس تتسائل عن مصير شكري - شهاب - عفروتو - أيمن أشرف و غيرهم كتير


بدأ جوزيه يختار عناصر الخبرة أكتر في التشكيل و بدأت الانتقادات تطلع ان جوزيه هيقضي على اللاعبين الصاعدين و هيعتمد على العواجيز تاني

و ظهرت على السطح مشكلة عفروتو و رغبته في الرحيل

و أنا ليه رأي في الموضوع ده

اللاعب في نادي زي الأهلي له مقومات و صفات خاصة جدا لإنه بيلعب في أكبر نادي في الشرق الأوسط و كمان على مستوى العالم

لا يكفي أبدا مستوى اللاعب الفني فلاعب الأهلي مطلوب منه مقومات فنية و بدنية عالية و مطلوب منه أخلاقيات عالية و مثالية

مطلوب منه النضج داخل و خارج الملعب

مطلوب منه الالتزام الأخلاقي

مطلوب منه التحلي بالروح القتالية و روح البطولة

مطلوب يكون عنده الشخصية القوية اللي تأهله انه يلعب لنادي كبير و يكون واعي و يقدر يتحمل ضغوط الجمهور و الإعلام

زي ما بنقول الجملة المشهورة ان تيشيرت الأهلي تقيل على فلان

احنا محتاجين اللاعب اللي يكون عنده كل المقومات دي عشان ينجح

أه عندنا لاعبين على مستوى فني عالي جدا انما مش بينجحوا مع الأهلي

الناس بيقولوا ما خدوش الفرصة

و بيروحوا ينجحوا في أندية تانية

و ده طبيعي لإني زي ما قلت لاعب النادي الأهلي له مقومات خاصة جدا

جوزيه مدرك لده تماما

عفروتو أنا هزعل لو مشي انما ما اقدرش أقول يا عفروتو غير انه لن يمثل الأهلي إلا من يستحق

بالجدية الحقيقية و الالتزام في التدريبات

اذا أنا شايف نسيب جوزيه يختار و يشتغل و نسيبنا من نغمة الناشئين دي

الفرق الكبيرة على مستوى العالم نادر جدا لما بتعتمد على الناشئين

لانها دايما بتلعب ع البطولة و جماهيرها لا تقبل منها غير الفوز مع أداء فني جميل

التاريخ مش هيقول احنا صعدنا كام ناشئ انما هيقول احنا كسبنا كام مباراة و حصدنا كام بطولة