رسالة المعلم أهم من الاموال التي تبحثون عنها

[محمودعيد]

ياناس انا اشتغلت كل شئ والله واكتر شغلانه فيها تعب وحرق اعصاب هى التدريس واقل شغلانه فيها فلوس ولما تتكلم عن المدرس يقولوا اصل بيدوا دروس احسب كام مدينة الدروس مجزية فيها غير مصر واسكندريه وشوف الامراض اللى عند المدرسين وشوف المدرس لم بيمرض بيتعالج فين والوزارات التانيه بيتعالجوا فين وايه اللى هيخليهم يمرضوا ولابيحسبوا الفلوس هتكفى اخر الشهر ولا لا زينا ولا بيتخصم منهم ثلث المرتب معاشات وتامين صحى ونقابات وغيرة والمرتب اساسا مش مستحمل ولا بيستلف لغايه لما يصرف المكافاءة ولا بيوجع فى قلبه طول السنه علشان الولد فاهم ولا النتيجة مش كويسه ولا دفتر التحضير عايز يكمل ولا بياخد الملفات يكملها فى البيت
البهوات اخرهم الساعه 2 شغل على المكاتب وبعدين يروح يستريح وياخد المدام والاولاد يفسحهم لان مرتبه 3 او4 الاف جنيه
غير شهر علشان رمضان وشهر علشان العيد وشهر علشان المدارس وشهر علشان المولد وشهر علشان العيد الكبير واخر السنه الارباح ياسلام مع انهم دخلوا كليات كانت بتاخد بنصف مجموعنا فى الثانويه والمدرس يطلع الصبح يرجع البيت الساعة 12 باليل علشان يحسن دخله ويقرب مرتبه من الاخوة التانين ومش عايزين الناس تكلم نفسها وفى الاخر يطلع وزيرنا الهمام كل يوم بكلام للتهدئه ويهرب وفعل مفيش والله لو عايزين يكون لينا كرامة نقف ومفيش واحد يطلع يقول مطالب فئويه لان دى مطالب ادميه وهى المطالب اللى الثورة قامت علشانها حياه كريمة ياخونا شغلونا بس نلاقى ناكل

[أحـمد قرنى]

يا أستاذى الفاضل ده لا فى مال ولا احترام ولا تقدير

[محمد ابراهيم عبد الباقى]

اللهم صلي على محمد وعلى أل محمد ♦ كما صليت على ابراهيم وعلى أل ابراهيم ♦ وبارك على محمد وعلى أل محمد ♦ كما باركت عل ابراهيم وعلى ال ابراهيم ♦ في العالمين انك حميد مجيد ♥♥ وانشرها فى كل الجروبات التى لديك و كل الصفحات خلال ساعه ستكون كسبت 10 مليون صلاة على الحبيب في صحيفتك بإذن الله.. لاتقول مشغول هذه مليون ...حسنة

[alaasoudi]

الى الاخ صاحب الموضوع انت اخذت درجة الامتياز مع مرتبة الشرف فى الهدوء وراحة البال مع انك ولعت فى كل المعلمين

[على سمسم]

اخي الفاضل انت لازم تعرف اني اللي طمعانين فيه ده ابسط حقوقنا
والمفروض اننا نعلم الاجيال اني الساكت عنه حقه شيطان اخرس
التعليم اخي الفاضل مش التدريس وبس
التعليم انك تعلم الجيل اللي من بعدك ازاي ما يسكتش عن حقه
وده جزء من رسالتنا الشريفة
التعليم مش بس دروس داخل كلاس لالالالالالالالالالالا
التعليم هو دروس كمان بره بالشارع وداخل المجتمع اللي انت عايش فيه
التعليم هي انك تعلم شخص ايا كان انه يعيش حياة كريمة ومحترمة

زوجة علي سمسم

[AYMAN12344]

عمل المدرس علاقه بينه وبين المولى سبحانه وتعالى بس حضرتك فين متطلباتنا ومتطلبات اولادنا من حقنا حياه كريمه لينا ولا ولادنا ولادنا كرهوا مهنه التدريس من كتر كلمنا عن الحياه الصعبه امكهم لو ابنك فى مدرستك وبن رجل اعمال شوف زميلك حيقدر مين اكتر شوف منظر المدرس وهو بيدق جرس الباب لتلميذ لو فى مرتب يكفينى انا ومعظم الزملاء لا يلزمنا مثل هذه الاهانات
من حقنا ناخد حقنا علشان نتفرغ لرسالتنا واظن والله اعلم ان معظم المدرسين بيأدوا للان بضمير لان داين تدان ولنا اولاد فى المدارس برضه

[محمد حسين الشربينى]

الكل تساوى وتخطى المعلم

والسبب الكادر الذى أضاع

كرامتنا ودرجاتنا وترقياتنا

وحسبنا الله ونعم الوكيل

[mollto]

انا مش قادر افهم الناس دى الست اللى بتقول انت رضيت ومرضيتش طبعا هيا مش حاسه باى حاجه انا بعت اللى قدامى واللى ورايا عشان اعمل عمليه لبنتى ومكنش ف بيتى اى فلوس وبعدين حضرتك انا مش بطلب فيلا ف مارينا او يخت فى اليونان او قصر ف باريس انا بطلب راتب يضمن لى حياه ادميه وبلاش فلسفه وبعدين اى علاقة الشغل بالاجر ما احنا شغالين والواحد بيعامل ربنا ف الفصل واللى مش عايز يشتغل لو صرفوله مليون جنيه مش هيشتغل بطلوا خنوع بقى واطلبوا حقكم العامل فى اى وزارة تانيه بياخد ضعف مرتبك يا محترم انتا وهوا وهيا بصراحه الست دى حرقت دمى منها لله

[malakdarsh]

احنا هنضحك علي بعض؟
دول شوية نصابين
وبعدين يا اخوة يا افاضل احنا رضينا وكلنا رضينا لاننا كنا مغصوبين
اه
ممكن حضرتك تقولي خريج التربية هيشتغلوا اية غير كدة؟
وانا المعلم صاحب الرسالة ال بعلم الاولاد قول الرسول صلي الله عليه وسلم ( سمحا اذا اقتضي )من نص الحديث
ازاى بقا الاقي حقي بيضيع ومطالبش بية؟
انا هتحاسب علي حقي ال بيتسرق منى لو ما طالبتش بية!

[alneseem]

اكيد انت ادارى بتقعد على مكتب لو كنت بتدخل الفصول وتتعامل مباشرة مع الطلاب اكيد كنت ها تشوف المر والعزاب والتعب الشاق الذى يتذوقه ويعانيه المعلم ابو طباشيرة وفى هذه الحالة مكنتش ها تقول هذا الكلام مطلقا نعم رسالة المعلم سامية ولكن علشان يؤديها بنجاح ويحقق رسالته كاملة لازم الدولة تكفل له حياه كريمة مثل القضاه او بتوع الضرائب او بتوع البنوك او .... او .... او ...... حتى علشان الطلبة يسمعوله ويتخذونه قدوة ومثل اعلى لكن تجاهل الدولة للمعلمين هو انتكاسة للتعليم
ومثال بسيط نعيشه هذه الايام عملونا كادر واتناقش فى مجلس الشعب وبعد سنتين مناقشة وقف الريس بجلالة قدره وقال وعملنا للمعلم كادرا خاص ( يا فرحتى بيك يا خويا ) وامتحنا واتهنا واتعزبنا وزدنا كام 50 % ثم 50 % يعنى كله 100 % وكمان استكتروها علينا عملوها على الاساس القديم شوف الوقت بتوع المحليات ها يزيدو 200 % ومن غير قوانين ولا امتحانات ولا شهادة تربوى ولا icdl ولا ريس يقف يتنفخ ويقولك وعملنا كادرا خاص يعنى العامل فى المجلس المحلى ها ياخد اكتر منك يا بتاع الرسالة السامية

حرام حرام حرام هذا الظلم للمعلمين

[احمد على2011]

الفيلسوفة اللى بتقول انت ارتضيت بالعمل ده والمرتب ده
يا شيخة حرام عليك اشرح ازاى وانا عندى سكر وضغط وضيق شرايين وديون بسبب الوظيفة دى وتقولوا رسالة
نفسى اشوف عملتى ايه فى رسالتك انت( تلاميذك) اكيد فشلة لانهم تعلموا منكى الخضوع

[عماد ابوخليل]

صاحب الموضوع كلامه مستفز جدا و غريب جدا و يثير الدهشة والتعجب
بيتكلم عن الضمير والكلام الفاضى اللى مالوش اى لازمة
و عمال يقول مهنة المعلم رسالة من عير مقابل
والله العظيم اكتر كلام مستفز قرأته فى حياتى كلها
وان شاء الله لن اعمل بضمير مطلقا فى مهنة التدريس الا بعد زيادة المرتبات
بلا رسالة بلا مصر بلا كلام فاضى

[sammos]

ياجماعه هى الحكومة التزمت بالعقد علشان نلتزم بيه
مش من التزامات الحكومة ان مرتبنا يعيشنا عيشة معقولة الحكومة اخلفت بنود العقد لما ادتنا راتب قليل جدا ورفعت الاسعار ارتفاع مهول مش المفروض يبقى مقابل ارتفاع الاسعار ارتفاع مرتبات ولا هى مهمتها تدينا قرش وترفع الاسعار مية قرش ياجماعه احنا قرفنا وماحدش يتكلم بقه فى الموضوع ده تانى لما الحكومة تقدر تتحكم فى اسعار السلع نبقى نتكلم عن العقد

[نزيه الصعيدى]

المشاركة الأصلية كتبت بواسطة شحاته احمد حميدة

ايها المعلمون والمعلمات المحترمين - الذين يعانون منذ سنوات طوال - هذه رسالة قصيرة من معلم يعاني مثلكم من ذل تلك المهنة التي هي من اقدس المهن على وجه الارض فلقد اصبحت رقبة التلميذ برقبة الف معلم كما تعلمون ولكن في اعتقادي ( أن المعلم يختاره الله عز وجل لتلك المهنة الشريفة ورسالتها المقدسة ) فنحن لا نبحث عن اموال - هل رأيتم مدرساً مليونيراً في يوم من الايام ؟ - فنحن من نصنع الاجيال التي تصنع الثورات فرجاءاً لا نريد مطالب فئوية بل نريد رفعة مصر ونعيد لمصر شبابها بعدما شاخت في عصر مبارك ، فلقد قبلنا العمل بقروش في بداية عملنا في تلك الوزارة ، فدعونا من السؤال عن الحد الادنى والاقصى يكفينا قوت يومنا ولنجعل سمو مهنتنا رسالة الى المصريين جميعاً .

-اقبل النقد بصدر رحب

على فكرة انت كاتب الكلام الهجص بتاعك دة عشان اكبر عدد يرد عليك بس
وانت مش مثالى اوى للدرجة دة
تلاقى عندك ارض او مشروع او دخل تانى
والمرتب دة مش فى دماغك
انا اسف ان احتديت فى الكلام

[نزيه الصعيدى]

المشاركة الأصلية كتبت بواسطة رضا عبد الحميد عبد الرازق

أيها المعلمون مهلا مهلا طالما انت رضيت بهذا المرتب البسيط لابد ان تعمل بجد وتراعى الله فى شغلك ووالله بعقد الهاء سيبارك الله لك فى هذا القليل

وانت اية يهمك انت مدرس انجليزى وتلاقيك بتدى دروس على اخرك
وسلملى عالضمير