مشكله تاعباني

[bosy .. mostafa]

بسم الله الرحمن الرحيم

هههههههههههههههه
يا نهار ابيض
دا كله وصابره

شوفت بقى

اولا حاولي متهتميش بالموضوع دا كتير
يعني خدي الامور ببساطه
لما تكوني عايزه تذاكري ذاكري " مش ذاكري بالذال " مش عايزه متغصبيش ع نفسك
وبلاش توتر الموضوع ميستهلش الثانوية العامه كلها متستهلش

عارف انا محدش في البيت بيضغط عليا و يقولي ذاكري بالعكس بيقولوا لي بطلي شويه حرام هتزهقي و مش هتطيقي الكتاب قبل الامتحان و وقت المراجعه مع انه الأهم و ممكن ده يرجع لإني اخر واحده و عندي اخواتي واحد خلص طب و التاني في هندسه و يمكن لاني تعبانه صحياً و ده بيتعبني اكتر

انا اول مره افتح الكيميا كانت ف اخر 4 وجبت خمسين الفرنساوي اول مره اذاكره كانت ف 3 وجبت خمسين

مهو اللي يقرف بقى المدرسين كل شويه امتحان زي ماتقول ادمنوا الامتحانات دي

محدش بيدخل الامتحان مش مخلص
وع فكره اهم حاجه التركيز مش المذاكره الكتير
وكل حاجه بتتجاب ف الاخر
والحمد لله ان الطب ضاع منك عشان متندميش طول حياتك انك دخلتيها

ولو احتجتي اي حاجه ف اي حاجه الموقع تقريبا فيها مدرسين كويسين جدا واساتذ قمه ف الادب والعلم ممكن تسألي أي حد

بحاول اركز على اد ما اقدر .. و المشكله انا نفسي لوامه لو يوم عدى (غير يوم الخميس) من غير ما ابص في الكتاب تلاقيني بلوم نفسي اوي و اقول في نفسي(انا مش فالحه انا مش نافعه انا انا )

==

يا نهار ابيض دى عقدتينى يا بنتى
ربنا يوفقك طول ما انتى مصعبة الدنيا على نفسك كدة
هتلاقى الدنيا بلاك فى بلاك
خدى الثانوية العامة على انها مرحلة عادية
اوك هى صعبة ومسئولية جامدة والناس اللى قبلنا خوفونا منها من قبل ما نجرب
يلا ربنا يسامحهم
ربنا يوفقك ويوفقنا

كله بيقولي دي سنه زيها زي اي سنه و مافيهاش حاجه و دول خمس مواد مش مليون يعني و في قمة السهوله .. بس انا بقى اشوف لك الناس تقعد تقولي المجاميع و مش المجاميع و معرفش الامتحان جاي ازاي
و اصحابي بقى اللي تقعد تعيط لي و تقولي انا مش عارفه انا معرفش ايييه
والدي قالي دول بيقولوا كده عشان يهبطوكي انتي و يطلعوا هما و انا بصراحه شايفه ان كلامه ده صح لإني وقعت في الخطأ ده و انا في تالته اعدادي

==

انا اعرف واحده بتذكر 20 ساعه في اليوم والله العظيم
بس ايه بئا مبتركزش ابدا كل تفكيرها في الامتحان وياتري هييجي ازاي وهيبقي عامل ازاي
وانا خايفه انا مرعوبه
وطبعا جايه تسالني لاني يعتبر خبره

انا باخد ان العبره مش بعدد ساعات المذاكره بس بالمعلومات اللي طلعت بيها
بس انا عيبي من النوع اللي بيقلق اوووووووي لدرجة اني مره اخدت مضاد للقلق !!

قولتلها بصي انا غلطت غلطات في تانيه بالهبل وهي اللي وقعتني

وهي اولا عدم التركيز دا
ثانيا اني كنت بصدق كلام صحابي
وثالثا ودا الاهم ودا السبب المباشر هو اني كنت مغروره جدا

ربنا يطمنك ده انا اكتر واحده متسرعه ربنا خلقها مش بصبر زي ما اكون في سباق

علي فكره بئا امتحانات الثانويه العامه قمه التفاهه
ولما بيكون الامتحان صعب مش بيكون كله صعب
لا بيكون فيه سؤال او سؤالين اللي صعبين بس بيكون فيه شويه مبالغه
لان اللي بيحط الامتحان بيبقي عامل حسابه علي انه في مستويات
مستوي الضعيف
مستوي المتوسط
مستوي الجيد
ومستوي الممتاز ودا للي بيبقي يطلع من الاوائل

ساعات بييجي يستعبط زي امتحان الكيميا السنه اللي فاتت

يعني مينفعش يجيبه لا سهل اوي ولا صعب اوي

بصي هقولك علي حاجه مزكرتك طول السنه دي ولا ليها لزمه
اهم حاجه من اول ما تبدائي المراجعه الجزئيه لحد الامتحانات
انا ذاكرت طول السنه وجيت اهملت في ال3 شهور دول
والناس كلها عملت العكس

ما أنا شكلي عملت العكس فعلاً

وزي ما قال بسام اوعي تذاكري وانتي ملكيش مزاج
ذاكري وقت ما تكوني عاوزه تذاكري
بس مش يبقي طول الاسبوع ملكيش مزاج
يعني دا اسمه استعباط

انا بذاكر و انا بمزاج و ماليش مزاج

وعشان متحطيش نفسك في المشكله دي حطي لنفسك هدف وافتكريه عالطول
ان شا الله تكتبيه في الاوضه وتعلقيه في اي مكان

والكيميا دي بلاش تاخديها علي انها ماده

خديها علي انها تسالي وحاجه كدا الواحد يعد في الروقان يستمتع وه بيحل
ان شالله تعدي في مسئله اسبوع بس تبقي عارفه انك هتجيبيها ف الاخر
والرياضه كذلك

الانجليزي عاوز كلمات اكتر من قواعد لان اساسا القواعد تافهه ومفيهاش مشاكل
لكن الاهم هو الكلمات واعملي حسابك ان لازم يكون في كلمه اوي كلمتين يمكن تلاته هتلاقيهم غراب ومش عارفه معناهم وحل الموضوع دا انك لازم يكون عندك مرونه بحيث انك تعرفي تتصرفي لو وقعتي في موقف زي دا

اما العربي انا عارفه ان مشكله الناس الادب بس مش عارفه انا كنت حافظاه عادي
والنصوص خديها علي انها بلاغه بس اهتمي اوي بالتعليق والماخوذات علي النص

والقراءه والقصه لعب عيال

مفيش غير النحو ودا ملوش حل يا اما تكون شاطر يا اما تكون خايب فيه

بالنسبه للغه الاجنبيه التانيه انا كنت الماني ومعرفش بيتذاكر ازاي بصراحه


اخر حاجه متسمعيش للناس اللي بيبالغوا عشان اعصابك متتعبش ولو حصل وسمعتي غصب عنك
خليكي بارده

واوعي تعملي بنصايح اصحابك لانهم بيقولولك علي النصيحه ويعملوا العكس

يلا انا رغيت كتير اوي سلام

جزاكِ الله خيراً
بجد كلامك ريحني جداً
و هحاول اعمل بيه