عاجل / إسرائيل تعتذر رسمياً لمصر عن أحداث سيناء

[Eng. Ahmed Said]

أولاً موضوع الإعتذار ده مكسب جامد لينا الحمدلله، إسرائيل كانت بتموت ناس ع الحدود والأمور بتعدي كأن مفيش حاجة ومفيش إعتذار..ردود الأفعال بعد المظاهرات قدام السفارةة وبيان مجلس الوزرا كان له رد فعل عندهم جامد وخوفهم جامد جداً وأهم أساساً أجبن خلق الله

إسرائيل إعتذرت لإننا إتحركنا وبقي عندنا كرامة..إسرائيل إعتذرت عشان الثورة إللي خليتنا رجالة وعندنا جرأة ونخوة ودم

شكراً يا ثورة مهما قالوا فيكي

أنا شايف إننا برضه نسحب سفيرنا ونستغل موقفنا القوي دلوقتي ونرتب معاهم علي إنتشار قوي للجيش في سينا

ونفتح تحقيق ونطلب التعويضات إللي بتيجي جنب أي إعتذار، أصل الإعتذار غير الآسف




الإعتذار بيتبعه تعويضات لأهالي الشهداء، أما الأسف فده غير رسمي وكلام ضحك علي الدقون

لو إترفض طلب إنتشار جيشنا علي الحدود، يبقي بالسلامة سفيرهم لحد ما يثبتوا حسن نوايا ويلموا الدور لإنهم مالهمش أمان وخبر التليفزيون المصري خير دليل

شايفين إني مبالغ شوية والمفروض إننا نهدي اللعب شوية ونكتفي بالإعتذار ولا إيه؟

ياريت نشوف آراء الجميع