من فضلكم ..مطلوب نصيحة ... أيهما أفضل لولدى .. التعليم العام أم الأزهرى؟

[teacherhg]

أولا أشكركم جميعا على الاهتمام بالموضوع و الرد عليه
اسمحوا لى أعرفكم بنفسى كمقدمة لما سأكتبه
أخوكم ( مش أختكم ) مدرس دراسات بالتعليم العام يعنى خريج مدارس حكومية عام مش أزهر
بفضل الله أجيد الكمبيوتر و أستخدمه منذ 13 سنة تقريبا و بأدرب icdl المنهج الأصلى بالانجليزى مش نظام سؤال و جواب و برامج تانية
بالنسبة للانجليزى بفضل الله أجيد الانجليزية إجادة تامة و ممكن أقعد أسمع الcnn لساعات و كنت بأشوف الأفلام بدون ترجمة و سكور اختبار التويفل بتاعى 570
لاحظوا أنا كنت تعليم حكومى و الباقى كان بفضل الله مجهود منى و تشجيع من أهلى
ليه أنا بأقول الكلام ده
لأنى غير مقتنع بالتجريبى لغات و مش شايف إنه الوسيلة الوحيدة لتطوير المهارات فى اللغة أو غيرها
و من الخطأ من وجهة نظرى إن الطالب و أهله يهتموا بالانجليزى من بداية تعليمه أكثر ممن اللغة العربية
و مع مرور الوقت و كل ما يكبر الولد يتقوقع مع زملائه بس و يتكلموا مع بعض بالانجليزى و يحس إنه طبقة تانية عايشة فى مصر غير الناس العادية - المهم ده مش موضوعنا
التجريبى و الحكومى العام ما أظن الفرق كبير
أى مكان الطالب فيه بدون متابعة جيدة و تضحية من المنزل لا فائدة منه ( عندما كنت طالبا كنا ممنوعين من مشاهدة التلفزيون طوال الأسبوع عدا فيلم سهرة الخميس و سينما الأطفال بالجمعة و فسحة أسبوعية و المدهش أن أهلى كانوا يمتنعون عن المشاهدة هم أيضا )

كان هدفى من الموضوع إننا نتعرف أكثر على الأزهر لإنه مجهول بالنسبة لكتير مننا
و لو لاحظتم هتلاقوا إنى قلت أن كتير مننا متأثرين بروايات من حولهم عن الأزهر
أحيانا بتكون نظرة محدودة أو غير موضوعية
و للأسف ده أنا شفته فى مشاركات كتير رغم تقديرى لأصحابها
ردود تعتمد على الرأى الخاص أكثر من الحقائق الموضوعىة
ردود تسفه من رأى الأخر و كأن صاحب الرأى يملك الحقيقة المطلقة
ردود لم تجد ما تكتبه سوى الإساءة

و الكل معذور يمكن لإنهم مثلى معلوماتهم عن الأزهر قليلة أو مغلوطة

أنا كمان ممكن أقول لكم قصص تفوق و قصص فشل من داخل الأزهر

لكن أنا أردت مشاركة من معلمى الأزهر أنفسهم
مشاركة تتضمن حقائق و ليس أراء
...
سعيد بمشاركاتكم
أتمنى فقط أن نبتعد عن الإساءة ليستمر النقاش و يصبح موضوعاً مفيداً لنا و لمن بعدنا
جزاكم الله خيراً و أسف للإطالة و ما زلت بانتظار مشاركاتكم