كل ماتريد معرفته عن احواض اسماك الزينه

سيدة الاحزان · #1 02-12-2011, 01:54 PM

تشغيل الحوض
****************
بعد جمع كل مكونات الحوض اللي قلنا عليها الموضوع مش هيكون (حوض +ميه + سمك) وخلصت
كده هتفرح بالسمك يوم وهتصحي تلاقي نصه ميت والحوض مشبر ابيض زي اللبن
فيه خطوات مهمه لاعداد الحوض لاستقبال السمك
1- غسل الجرش جيدا بالماء وتصفيته اكتر من مره للتاكد من نضافته
2- وضع الالعاب والنباتات بعد غسلها طبعا في الحوض وتوصيل الموتور بالسكريه وتركيب الفلتر

3- عدم وضع اي اجزاء معدنيه او ملونه تتفاعل مع الماء و تموت السمك
3- تهيئه الدوره البيولوجيه للحوض عن طريق وضع حبيبات مزيل الكلور للتخلص من الكلور من الماء او ترك الماء في الحوض لمده يوم وتشغيل الفلتر الجديد لمده يوم علي الاقل بدون وضع سمك للبدء في تكوين البكتريا النافعه (يمكنك وضع اسماك تستحمل هذا الوضع في الحوض وتساعد في الاسراع من اعداد الحوض زي (الزبالات الكات فيش - والبليكو ستومس ماسحه الزجاج )

4- عند شراء الاسماك يجب التركيز علي نشاطها في الحوض وحركتها قبل النظر الي شكلها الجمالي لانها ربما تكون مريضه

5- عند شرائك لاسماك متنوعه يجب التاكد من ملائمتهم للعيش مع بعض في البدايه اذا كان صاحب المحل حاططهم مع بعض يبقي مفيش مشكله لكن لو محل كبير وهتنقي من كذا حوض يجب معرفه طبيعه كل سمكه ومدي قابليتها للتعايش مع انواع اخري بسؤال التاجر

سيدة الاحزان · #2 02-12-2011, 02:04 PM

6-بعد شراء الاسماك لاتضعها مباشره في الحوض بسبب تغير الوسط البيئي اللي بتتعرض له السمكه من حوض التاجر الي الكيس الي الحوض الخاص بك يمكنه ان يقتل السمكه او اصابتها بفزع يفضل وضع الكيس علي سطح الحوض حتي يكتسب حراره الحوض بعد 5-15 دقيقه وتخريم الكيس بعد ذلك ليختلط ماء الكيس وماء الحوض وحرر السمكه بعد ذلك

7- عدم اللعب والتغيير في ديكورات الحوض كثيرا
8- تعويض الناقص من الماء المتبخر في الحوض
9- تشغيل الفلتر لفترات طويله لضمان نقاء ونظافه الحوض وتنظيفه (الاسفنجه) بشكل اسبوعي من الشوائب في ماء من الحوض للحفاظ علي البكتريا النافعه

10 -عدم شراء اسماك بعدد اكبر من مساحه ومقاس الحوض
11- تغيير ماء الحوض بشكل كامل له اضرار كبيره ويفضل تغيير ربع الماء فقط
12- عدم الافراط في اطعام السمك لانه بيزيد الفضلات وبواقي الاكل مما يرفع من نسبه الامونيا في الحوض وهي سامه للسمك ويجب تغيير ربع الماء كل يوم او يومين حتي تختفي من الحوض مع تشغيل الفلتر
13- استخدام ملح مخصص لاحواض السمك يجعل ماء حوض السمك زي البلور الصافي (انا بصراحه بحطه كميه قليله من ملح الطعام مش بلاقي ملح احواض وبلمون بأه ياااااااه بالهنا والشفا هههه)
14- شرح مصور وافي لكيفيه تنظيف حوض السمك بعد 6 شهور او سنه وممكن اكتر حسب نضافه الحوض ورعايتك ليه

سيدة الاحزان · #3 02-12-2011, 02:12 PM

انواع الاسماك (المتوفره في السوق المصري)
***************************************

السوق المصري بيمتاز بتنوع الاسماك الموجوده فيها طبعا مش زي روعه اسواق السمك الموجوده بره
بس علي الاقل فيه اكتر الانواع شعبيه وخصوصا السمك رخيص الثمن والمتوسط وده مايمنعش وجود اسماك غاليه واسماك صعبه الرعايه والتربيه للمحترفين جدا
طبعا يفضل للمبتدئين البدايه بالاسماك الرخيصه اللي بتستحمل عشان يقدر يتفهم طبيعه الحوض والاسماك ويكتسب خبره والخسائر تبقي مقدور عليه
-انا هبدا بالاسماك الشعبيه والرخيصه الثمن والمتوسطه الموجوده في السوق وعند اغلب المربين
-لكن في البدايه هبدا بالمحبين للسمك وعايزين حاجه بسيطه وخلابه ورخيصه الثمن
زي اللي بيحب يربي في بلوره بسيطه او كاس زجاجي والاشكال الزجاجيه المختلفه الجميله اللي بتبقي موجوده في محلات الديكور وفي نفس الوقت مش محتاج كل التجهيزات السابقه
- معظم اللي بيربي في البلورات السمك بيموت منه بعد كام يوم او ميه الحوض بتشبر والريحه والمنظر بيخرب وبرضه السمك بيموت منه والتاجر عايز يبيع او صاحبنا بيفضها سيره ويحرم
افضل واجمل سمكه لهذا النوع من التربيه
الفايتر
Siamese Fighting
السمكه الخلابه دي

ايوه السمكه الخلابه دي متوفره في السوق المصري في المحلات وسوق الجمعه
ودايما للاسف بتلاقيها في اكياس او برطمانات
- من اهم مميزات السمكه دي انها بتعيش اصلا في المياه المستقره وتستطيع التنفس من الهواء لذلك فهي بيئتها المفضله ومناسبه جدا للعيش في بلوره او حوض صغير
- السمكه دي عدوانيه جدا لنفس النوع يعني لايمكن تربيه اكثر من واحده ذكر في البلوره او الحوض وممكن تهاجم الانواع الشبيهه لها زي الجورامي القزم يفضل عند تربيتها في احوض مع سمك اخر ان يكون مسالم لان سباحتها هاديه ويمكن لبقيه السمك تقطيع زعانفها او قتلها
- انثي السمكه تشبه البساريه ولا يربيها احد الا بغرض التفريخ

- اكلها قليل جدا ويمكن اطعامها كل يومين حبه اكل او قشور لن تلوث الحوض او تخرب المنظر
- السمكه الجميله دي ب 6 - 7 جنيه للواحده فقط
واتفرج علي منظرها ونضافتها قطعه ديكور جميل وبسيط في الشقه

صوره حوضي الخاص بالفايتر
حوض صغير مقسوم بفاصل زجاجي متحرك عشان اربي سمكتين واتفرج علي الخناقه لانه بيستعرض زعانفه وخياشيمه لما يشوف ذكر منافس وبيظهر جماله

سيدة الاحزان · #4 02-12-2011, 02:13 PM

انواع الاسماك المفضل تربيتها للمبتدئين
***************************
1- الجوبي :- الجوبي من اجمل الاسماك ومن اشهر الاسماك ايضا وهي تعتبر من الاسماك الولاده ...
وهي مش محتاجه اكثر من مياه نظيفه ودرجة حراره
بين 23 الي 27
وهي تهتم بالزرع جدا فمن المهم ان يكون في الحوض زرع
وتعتبر ارخص نوع سمك في السوق
ودي صور لهذه السمكه الجميله

سيدة الاحزان · #5 02-12-2011, 02:17 PM

- المولي :-
هذه السمكه جميله ايضأ ...
وهذه السمكه نشيطه ...
وتعيش في درجة حراره 23 الي 27
ويجب اضافة بعض الملح الي الماء ...
والوانها جميله جدا فمنها الاصفر ... والبني والفضي و الابيض المنقط باسود ومنها ايضا الاسود واحلي نوع للسمكه دي المستورد الشراعي لانه اكبر واجمل من التفريخ المحلي قصير الزعانف
واغلي حاجه بسيطه
ودي صورللسمكه

سيدة الاحزان · #6 02-12-2011, 02:18 PM

- السورد تيل :-
اجمل واحلي الاسماك في الحوض لونها وشكلها المميز ورشاقتها في الحوض
وهي سمكه وديعه جدا
ويوجد لها الوان في غاية الروعه والجمال ...
وهي تعيش في درجة حراره من 23 الي 27 ...
ودي صور للسمكه ...

سيدة الاحزان · #7 02-12-2011, 02:20 PM

- سمكه الكوري كات فيش :-
او الزبالات باللغه الدارجه وهي اسماك لايستغني عنها اي حوض وتقوم بتنظيف الحوض من الفضلات في القاع وبين النباتات وزينه الحوض سمكه النضافه الاولي في الحوض تتغذي علي اي شئ في قاع الحوض بتتباع الواحد ب 50 قرش /1 جنيه وتستخدم كزبالات ولونها رمادي او ابيض
مفيش حوض بيستغني عنها لتنضيف القاع والصخور وبين المستلزمات وتربيتها سهله جدا
(مشكلتها انها صغيره وممكن السمك الكبير ياكلها زي الجولد فيش او الكوي)