سؤال هام وسريع لخبراء الاكسيل

[aminvip]

أنا أخوكم في الله أمين من البحيرة مدرس ثانوي صناعي قمت بعمل شيت كنترول متواضع للمدرسة عندي والشيت دة حجمة كبير جدا نظرا لكثرة المواد بالثانوي الصناعي حيث تصل في بعض الاقسام الي 17 مادة وتم برمجتة والانتهاء من كل شيئ فية وتوقفنا عند الطباعة حتي يرحمنا الله من مشكلة تبيض النتيجة اي الطريقة اليدوية لنسخ الشيت والمطلوب من الخبراء شرح طريقة طباعة الشيت علي الطابعات الكبيرة ( طابعة الرسومات الهندسية الكبيرة جدا ) أو إعدادات الطابعة علي الكمبيوتر لهذا النوع من الطباعة وللعلم هذة الطابعات متوفرة لدينا ولكن عند الطباعة عليها يخرج الشيت صغير في منتصف الصفحة التي ابعادها 120سم طول في 80 سم عرض تقريبا وأنا أريد أن يخرج الشيت ملئ الصفحة كما يأتي لنا من الادارة التعليمية شيت فارغ ملئ الصفحة ويوجد بالمرفقات شيت من شيتات المدرسة للاطلاع علية وصورة رسمة توضيحية لمشكلة الطباعة عندي الشكل النهائي للطباعة أفيدوني أفدكم الله وجزاكم الله خيرا

[rayes2009]

هل هذا هو المطلوب

[aminvip]

مشكور جدا علي المرور والاضافة الكريمة بس ممكن اعرف من حضرتك عملت الصورة المصغرة للشيت دي ازاي أو بأي البرامج لانة يوجد لدي الان 60 شيت وعاوز اقوم بطباعتهم

[rayes2009]

أى برنامج pdf معاه طابعة افتراضية بتنزل معاه وانت بتسطبه على جهازك خلى الطابعة بتعته هى الطابعة الافتراضية على جهازك
افتح الشيت بتاعك وعلم على الشيت كله الجزء اللى عايز تطبعه وحسب الأوفيس بتاعك اختر
من القوائم set print area ثم print و لما تظهر اسماء الطابعات اختر طابعة ال pdf ومن خصائص الطابعة خلى حجم الورق custom واكتب الابعاد الى انت عاوزها 120 × 80 أو حسب منت عايز واطبع حيطلعلك ملف pdf اعمل save فى اى مكان على جهازك

خد الملف الناتج ودخله على برنامج ال photoshop ومن حجم الصورة غير حجمها زى منت عايز
ثم save as واختر نوع الحفظ صورة jpg أو ممكن تطبعة pdf من غير متدخله على الفوتوشوب

أتمنى يكون دة المطلوب

[aminvip]

معلش أنا أسف بتقل علي حضرتك نظرا لجهلي انا لسة عندي مشكلة أنا معنديش معظم اللي حضرتك قولت علية
1- أنا عندي نسخة وندوز WINDOWS XP
2- أنا عندي نسخة أوفيس Microsoft Office AR 2003 ولا يوجد بها خاصية set print area
3- انا عندي برنامج Adobe Reader 9 ولم يقوم بتسطيب طابعة إفتراضية معة PDF

ماذا اصنع أنا أسف مرة تانية ممكن تقولي علي نسخة الاوفس عندك وبرنامج PDF

[rayes2009]

انا عندى أوفيس 2010 وبرنامج pdf اسمه foxit phantom pdf وبرنامج
adobe photoshop cs5 بس adobe reader 9 اللى عندك بينزل طابعه افتراضية اسمها
adobe pdf ممكن تشوفها من control panel مع الطابعات اللى نازلة على جهازك واتاكد ان مكتوب عليها علامة صح أى انها الطابعة الافتراضية على جهازك لو موصلتش للكلام ده سطب برنامج foxit phantom pdf وهو حينزل طابعة افتراضية اسمها Foxit PhantomPDF Printer
من خلال أوفيس 2003 الى عندك العربى حتفتح الشيت وتحدد الجزء اللى عايز تطبعه اللى هو الشيت كله الجزء اللى فىه كتابة ومن قائمة ملف فيه حاجه اسمها مساحة الطباعة أو منطقة الطباعة اختر منها قائمة فرعية اسمها تحديد منطقة الطباعة ثم اطبع حتلاقى صفحة طلعت تأكد ان الطباعة المختارة foxit phantom ومن properties اختر قائمة layout ومنها من page form اختر custom وحدد مساحة الورق 120 × 80 واطبع حيطلع ملف pdf احفظه على جهازك ودخله على الفوتوشوب وعدل ابعاده زى منت عايز ثم احفظه كصوره

[aminvip]

جزاك الله كل خير تمت المهمة بنجاح كامل بس المشكلة الصغيرة الاخيرة أنة عند طباعة بالطابعة الافتراضية PDF تخرج صفحة PDF مكونة من 3 أو 4 ورقات أو بمعني اخر يقوم بتقسيم الشيت الي 3 أو 4 ورقات وأنا عاوز ورقة واحدة كما هو ما هو الحل وأنا قمت بجميع الخطوات التي ذكرتها حضرتك ونزلت برنامج Foxit PhantomPDF إستندر مساحتة حوالي 150 ميجا بيت وأخترت في الاكسيل من قائمة ملف ناحية الطباعة ومنها تحديد ناحية الطباعة ولم اضغط علي اي شيء داخل الصفحة او أغير اي أبعاد هذا كلة بعد تحديد كامل الشيت طبعا ثم طباعة ثم اخترت الطابعة الافتراضية ثم قمت بتغيير الخصائص كما قلت وعند الحفظ خرج صفحة PDF مقسمة الشيت الي 3 صفح

[rayes2009]

بعد تحديد منطقة الطباعة من قائمة ملف اختر إعدادات الصفحة حتطلع قائمة أول حاجة فيها من فوق كلمة صفحة انزل تحت حتلاقى رقم 100 ومتعلم قدامة علم على الاختيار اللى تحتيه اللى هو 1 فى 1 حيطلعلك الشيت كله فى ورقة واحدة ثم كمل باقى الخطوات عادى طباعة ومن خصائص الطابعة الافتراضية من layout عدل ابعاد الصفحة واطبع حيطلع ملف pdf دخله على الفوتوشوب واظبط حجمه وحوله لصوره ولو فى مشكله كلمنى

[aminvip]

بجد مش عارف اشكر حضرتك ازاي ( روح ربنا يوقفلك ولاد الحلال يابني هههههههه ) هي في مشكلة صغنونة خالص بعد حل المشكلة السابقة خرج الشيت ورقة واحدة بالفعل ولكن صغيرة للغاية والكلام يكاد يكون مشوة وعندما أدخلتة علي Adobe Photoshop CS2 لم أعرف كيف أكبر الصور بدون رتوش أو تشوة لوصت يعني معرفتش اعملها معلش رخامة مني انا عارف تقلت علي حضرتك كتير وبشكر حضرتك مرة تانية

[rayes2009]

تلاقيك معدلتش أبعاد الصفحة فى الطابعة الافتراضية لأنة لو معدلتهاش حتطلع صفحة واحدة صغيرة
بعد متطبع من أكسل وتظهر صفحة فيها اسم الطابعة الافتراضية من فوق جنبها فيه كلمة properties
اضغط عليها حتتطلع صفحة تانية فيها من فوق كلمة layout ثانى عنوان وتحت فى أبعاد الصفحة الطول والعرض تحت عنوان page size خلى hieght=120 و width = 80 , وخلى طباعة الصفحة بالعرض من orientation فى نفس الصفحة اختر landscape واعمل اوك واطبع وممكن تشوف شكل الصفحة من معاينة الطباعة بعد الخطوات دى حتلاقى الشيت يحتل الجزء العلوى من الصفحة ولو عملت زووم عليه حتلاقى الكتابة واضحة حتاخد الملف الpdf وتدخلة على الفوتوشوب ومن حجم الصورة عدل الحجم من حيث الطول والعرض واحفظه كصوره ولو فى مشكله أنا معاك للأخر

[aminvip]

متشكر جدا جدا ياعبقري مش عارف اشكر حضرتك ازاي بجد انتي افدتني كتير جدا جدا ومعلش علي كتر الاسئلة ومتشكر للمرة المليووووووووووووووووووووووون

[rayes2009]

الشكر لله دى حاجة بسيطة المهم تكون العملية تمت بنجاح معاك

[maged_wil]

مشكوووووووووووووووووووووووووووووور

[عبدالسلام رجب]

بارك الله فيك وجزيتم خيرا

[المرشدالقوي]

السلام عليكم
يعنى انا بعد ما احفظ ملف الاكسيل او الشيتات بالابعاد 120 * 80 او ايا كان على شكل ملف pdf او صورة Jpg واخدتهم على فلاشة عشان اطبع فى اى مكتب تصوير هندسى ( الطابعات الكبيرة يعنى ) هيتم الطباعة بشكل طبيعى ولا لازم يحصل تعديل من تانى ؟؟؟