يابتوووووووووع علوم ..عوزاكوا ؟؟؟

[جنــة]

انا علوم عين شمس وهرد عليكي من خلال ده

أولا : بالنسبة للأفضلية بين علوم وألسن فده طبعا اول حاجه هيرجع لك انتي في نظام الدراسة
لو دخلتي أي حاجه منهم لازم تبقي محدده اللغة أو القسم اللي انتي عايزاه
بالنسبة للوضع الاجتماعي في علوم هيكون كويس جدا لو انتي حطيتي في دماغك انك تبقي مميزة نفس الوضع بالنسبة لألسن .. بس في رأيي الشغل بالنسبة ليكي من خلال علوم كبنت هيكون أفضل ..
بالنسبة لماديا الشغل هيكون احسن ولا لأ .. ده حسب برضو انتي هتشتغلي في ايه على حسب الكلية والتخصص كمان
الفكرة اني ماينفعش اديكي مقارنة بسيطة كده بين الكليتين لأن كل واحده فيها اقسام كتير .. فعلى أساس كل حاجه هتلاقي فرق .. بس اهم حاجه تحددي انتي عايزه تكوني ايه مش عشان الناس .. عشانك انتي
يعني ماتفكريش بالوضع الاجتماعي قد ما تفكري بالاستمتاع في المذاكرة والشغل عشان يبقى عندك دافع انك تذاكري وتتفوقي

ثانيا : موضوع كيمياء حيوي ده ممتاز جدا .. وتقدري تقولي ان ده طموح اغلب طلبة علوم هو وقسم الميكروبيولوجي
لأنهم بيشتغلوا في التحاليل وبياخدوا لقب دكتور !! وانا على فكرة مش منهم خالص . لأني برفض الفكرة دي(:
بس شغلهم ماديا مربح جدا .. وممتع إلى حد كبير
بس اهم حاجه تسعي الأول اثناء الدراسة تكوني بتتدربي في معامل مش تستني بعد ما تخلصي
وبعد ما تتخرجي مش هتفتحي معمل على طول لازم يكون معاكي دبلومه على الأقل
ولازم تشتغلي في كذا مكان الاول تاخدي الخبرة العملية اللي انتي كنتي مفتقداها في الدراسة النظري وتعرفي الأجهزة المناسبة اللي هتحتاجيها والأدوات الكيميائية وتحاولي تكوني خبرة كويسه عشان لما تفتحي معمل ماتبقيش زي أي معمل عادي .. لأنهم كتروا برضو الأيام دي
ولو حاولتي تشتغلي في بحث علمي او تكملي ماجستير اعتقد الفترة الجاية هيكون في اهتمام أكتر بالعلم وهتكون الفرصة كويسه .. بس اهم حاجه تعرفي ميولك . انتي حابه تكملي بحث ومذاكرة ولا حابه تشتغلي بس في معمل !
ومافيش مانع لو فتحتي معمل وناس شغاله فيكي فيه وانتي بتكملي دراسة .. ده هيخدمك اكتر

ثالثا : بالنسبة لعلوم حلوان انا رحتها مرة الكلية رائعة جدا وفيها دكاترة متميزين والكلية تم تطويرها قريب .. يعني هتلاقي التعليم فيها كويس ان شاء الله
وعلوم القاهرة كويسه جدا ( وانا كان نفسي ادخلها بس ما عرفتش بسبب التوزيع الجغرافي ) لأنها فيها نظام الساعات المعتمدة إنك بتختاري المواد اللي انتي بتدرسيها وبتتخصصي من سنة أولى ( مش عارفه حلوان طبقوا فيها نظام الساعات المعتمدة ولا لأ ) وفيها قسم الفيزياء الحيوية وده مش موجود غير في القاهرة وعين شمس تقريبا .. بس لو انتيمش عايزاه مش هتفرق معاكي ومش هتكون نقطة ترجيح لأي كلية فيهم
شوفي نظام التشعيب جوا الجامعتين وعلى هذا الاساس هتقدري تحددي وأكيد هتلاقي ده على موضع الكلية
وبالنسبة لقرب البيت عن الكلية صدقيني هيفرق معاكي جدا في الوقت والمذاكرة
لو انتي قريبة هتعرفي تذاكري في اليوم اللي بتنزلي فيه الكلية .. لكن لو بعيده مستحيل
وهتلاقي مذاكرة المواد كلها بفروعها متراكم عليكي في آخر الاسبوع الاجازة اللي المفروض ترتاحي وتذاكري فيها

يارب اكون افدتك ..
بس خلاصة الكلام رأيي في كل اللي سألتي أو لو ماكنك هعمل ايه :
هدخل علوم مش ألسن
هدخل علوم حلوان مش القاهرة وبعد المكان استخدمه لصالحي واحاول اتفوق واتميز
هدخل قسم كيمياء حيوي لأن ده اللي انا حابه مجاله

بس نصيحة .. حاولي تعرفي كل اقسام الكلية ومش تعرف مجالات العمل بيها ايه بس
حاولي تعرفي مناهجها ومواد الدراسة ايه كمان

انا قلتلك لو مكانك هدخل كيمياء حيوية لأن ده اللي انا بحبه ( على لسانك مش على لساني )
لأني عايزه ادخل قسم فيزياء حيوية .. لأني مقررة من قبل ما ادخل الكلية
عشان كده بقولك ابحثي واقري التخصصات واعرفي كتيييييييير اوي قبل ما تدخلي الكلية