مجرد رأي

[Engineer ..]

المشاركة الأصلية كتبت بواسطة 222ahmed222

طبعاً زي ما كلنا متفقين إن المنتدى دا بشكل عام والقسم دا بشكل خاص من افضل الأماكن ال الواحد دخلها ع النت كله وشاف فيها احسن ناس
الواحد شاف هنا ناس في منتهى الذوق والأدب والأخلاق
وأذكر إن شخص من هنا ف القسم دخل على البروفايل بتاعي ع موقع ask.fm
وسألني سؤال عن القسم هنا قولتله بصراحه انا الناس ال هنا ف القسم مبقتش عاجباني
واقصد بمعنى مش عاجباني زي ما ممكن تفهموا انتم
بس فعلاً فعلاً فعلاً انا كنت بدأت اقلل اوي من دخولي للقسم هنا لبعض الأسباب
أولها:
طريقة تعامل الناس هنا مع بعض مبقتش زي ساعة ماعرفته
يعني زي ما بيقولوا بالإنجليش وزي ما صاحبي بيقول
fake and over
ios
ثانياً :
في ناس بدأت تحس إن القسم ملك لأحدهم او لأي منهم ودا مش حقيقي
بمعنى إن شخص من الأشخاص بيقول لشخص تاني ايه ال دخلك هنا القسم بعد إذنك امشي
لطالما هذا الشخص معروف عنه حسن أخلاقه انت ملكش الحق إنّك تقوله امشي ولو كنت مين
وكل الأعضاء هنا سواسية
ثالثاً :
بعض الأشخاص وأخص ال متداومين على موضوع " مجرد فكرة"
لما حدثت مشكلة في الموضوع دخل اكتر من شخص ونبه وقال خلاص المفروض الموضوع يتقفل وبلاش شات جماعي
المشكلة مش في إنّهم استمروا في الشات لأ طبعاً دي حرية
بس المشكلة إنّهم ضربوا بكلام الكل عرض الحائط ومكلفوش نفسهم حتى يردوا عليهم ويقولولهم حتى إنّ وجهة نظرهم غلط.
رابعاً :
إنّ شخص هناك في الموضوع دا دخلت أبدي استيائي من ال حصل منهم إنّهم استمروا فبيسأل او بتسأل حصل ايه ؟ قولتلهم إنّكم نفضتوا ولا كأنّ حد قال حاجه وقعدت اقول وجهة نظري كامله ولقيت تجاهل تام منه او منها
ومرضيش او مرضتش ترد وقولتله/ا خلي بالك انك مش بترد/ي
ولا من مجيب
مع العلم إنّه/ا كان/ت شغال/ه تعليقات في نفس الموضوع الفتره دي وحتى لحد بعد ما مشيت
بصراحه شديده
انا اذكر ان ساعة ما حصل مشكلة من مشرف القسم السابق احمد عادل
كان القسم بدأ ينهار وكنت انا وكام شخص تاني قررنا نمشي منه بس تراجعنا لأنّنا بنحب القسم بجد
بس فعلاً مبقاش في شيء يتحب في القسم دلوقتي
وياريت جميعكم تعرفوا إنّ الموضوع مش متشخصن ولا مكتوب على شخص معين أو بسبب شخص معين لأنّ انا مفيش حد يمكن هنا اعرفه كويس اوي غير الباش مهندس محمد إنّما الموضوع انا كتبته عشان اصلاح القسم لأنّي بجد حاسه اتغير
بعد إذنكم
وتذكروا أولاً وأخيراً أنّه مجرد رأي قد تتفقوا معه أو لا تتفقوا

كلام محترم من شخص غاية في الإحترام والفضل ...
والله يا باش مهندس أحمد بغض النظر عن انك صديق طيب ومحترم وصاحب فضل بعد ربنا في ابقاء روح العقل ـ وركز على الكلمة دي ـ في المنتدى إلا إني فعلاً من شهر كده بدأت أأنب نفسي اني دخلت القسم تحديداً لعدة أسباب ... جايز من أهمها المراهقة الجوفاء فتتلاقي الواحد منهم وكأنه فرض عليك انك تعمله اللي هو عايزه هنقول عشم مثلاً ماشي يا سيدي مش مشكلة أنا متصدق بعرضي لله مع التحفظ على كرامتي طبعاً ... لكن انه ميردش عليك بإسمك دي اللي بتخنق جداً وبتخليني ممكن أكون غضبان منه لأيام ... وبعدين بنسى برده واقول عيل صغير لسه مشافش الدنيا ... أي نعم احنا مشوفناش الدنيا برده بس ربنا ميز بينا ان فينا الصغير الكبير (الراجل) والكبير الصغير(العيل) ....
حاجة كمان ضايقتني جداً وهي التجاهل !!!
الواحد بقدر الإمكان لما يدخل أي مكان بيكون شغله الشاغل انه يوحد الشمل ويكون الهدف والرؤية ثابته للجميع ومتباينة على قدر طموحاتهم ... بمعنى ان كلهم طلبة ثانوية عامة فلازم تكون غايتهم هي النجاح والتفوق مع التباين في اللي عايز يدخل تجارة أو أداب أو اقتصاد وعلوم سياسية أو طب أو هندسة أو صيدلة أو علوم .....الخ) فكلنا أصحاب رؤية ثابته وواضحة ... تييجي تعمل موضوع عن فايدة في علم معين تتلاقي واحد داخل الموضوع وسايب تعب صاحبه ويعلق على موقف قديم !!!
شلل بعيد عنك بيصيب الواحد في نفسه لما يحصل حاجه زي كده بتتراقم وتتفاخم الأسباب ، وأصلاً أقسم بالله أنا ورايا حاجات ما يعلم بحجمها إلا الله ...
ممكن أكون فاضي في الدراسة لقلة مذاكرتي لكن في الاجازة مستحيل أكون فاضي بالرغم ان الفيس مفتوح تقريباً طول ما الجهاز مفتوح يعني 12 ساعة مثلاً ... بس الله أعلم أنا بعلم ايه في الوقت ده ... وهو أمر أسأل الله أن ينفعني به يوم العرض عليه ...
لكن محدش فعلاً بيقدر وتشتعل نار فقد الثقة ...
وانا والله اتعرض عليا الإشراف من زمان في المجموعة الهندسية والقسم ده ولكن رفضت لإني مش داخل عشان أكون مشهور ومش هدف أكون في يوم كنت سلطة على حد ،،، الله أعلم أنا عايز ايه ...
ممكن نكون مختلفين في مدى حرصنا على مصلحة بعض ، لكن دا ما يمنعش إننا نساعد ولو بشكر لله ...
ربنا ينفع بيك وينفع بينا ويوفقنا ويوفق كل الطلبة ويصلح حال الجميع ويرفع مصر في أعلى الدول دينياً و اقتصادياً وعلمياً وثقافياً و كل وجه من وجوه العلم والعمل والخير لمصرنا الحبيبة وربنا يهدي حكام العرب لإصلاح ما بقي من ملكهم ويمكن للمستضعفين في بقاع الأرض ... ويهلك كل من بغي على الله وترافع على الجبار بجبروت ذرة في ملك الله ... أسف للإطالة يا باش مهندس والسلام ختام